VOV4.K’ho- Tơnơ̆ 3 ngai gơtìp gơrềng bơh mìu càl rơbŭt dờng sồ 2 lơh gơbàn mìu dờng sùm tàm uă tiah, gĭt nđờ rơhiang nơm hìu đam bơh làng bol dê mờ gĭt nđờ rơbô lồ kòi mờ phan tam lơyah ngai làng bol dê tàm ală tiah tàm càr Gia Lai neh gơtìp hoàc huơr mờ ngơr bam dà.

Dùl ƀlàng sre tàm kơnhoàl Phú Thiện gơtìp ngơr bam dà tàm uă ngai do

Jat tơrgùm kờp bơh Mpồl đơng lam rcang sơndră trồ tiah lơh aniai mờ jòi dong kờl rềs àr càr Gia Lai yal, bơh ngai 7/08 tus drim ngai 10/08, xã Ia Piơr, kơnhoàl Chư Prông geh 125 nơm hìu làng bol gơtìp ngơr băm dà. Tàm do, kung geh uă gơl gùng gơtìp dà wềl, lơh tam cah is, gơnoar atbồ tiah do pal ntrờn 24 hìu bơnhă. Bal mờ hơ̆, 1 rơbô 500 lồ kòi mờ phan tam lơyah ngai bơh làng bol dê kung gơtìp ngơr băm dà. Tàm hơ̆, ală tiah geh bă tam phan lơh sa suơn sre gơtìp ngơr bam dà uă ngan rlau jơh là Phú Thiện mờ 447 lồ mờ kơnhoàl Chư Prông mờ 368 lồ; ală kơnhoàl, thị xã ndai bè kơnhoàl Ia Pa, Chư Pưh mờ thị xã Ayun Pa kung geh gĭt nđờ rơhiang lồ kòi mờ phan tam lơyah ngai bơh làng bol dê gơtìp gơrềng. Tŭ do Mpồl đơng lam rcang sơndră trồ tiah lơh aniai mờ jòi dong kờl rềs àr càr Gia Lai mờ ală kơnhoàl, thị xã sùm yal tơngĭt jơnau yal, đơng lam ală mpồl pơs wàs tiah ơm kis tàm ală tiah gơ tìp ngơr bam dà, tơnơ̆ tŭ dà hoài soăt.

Cau mblàng K’Hạnh