VOV4.K’ho - Ngai òr (17/05), Kes priă rơcang sơndră mờ chơ̆t jê câu Á (AIP) pơgồp bal mờ Mpồl sền gàr niam ờ do ờ dă tàm gùng lòt càr Gia Lai bơyai lơh sền wơl cồng nha tơngai dơ̆ 2 bơh rơndăp broă lơh “Tơmù khà jờl-Hìu bơsram ờ do ờ dă” tàm ƀòn dờng Pleiku.

                                      Mpồng hìu bơsram kấp 1 Chu Văn An ƀòn dờng Pleiku

Rơndăp broă lơh geh lơh tàm ƀòn dờng Pleiku, càr Gia Lai bơh nhai 07 nam 2020 tus tŭ do. Jăt jơnau đơs bơh ồng Lê Văn Hạnh, Phó kwang atbồ drơng broă Sở Giao thông Vận tải, Phó kwang atbồ mpồl duh broă sùm ờ do ờ dă tàm gùng lòt càr Gia Lai yal, ală hìu bơsram kấp 1 tàm ƀòn dờng Pleiku neh gàr niam ală jơnau kờñ bè broă lơh tàm tiah hìu bơsram ờ do ờ dă. Jăt mờ hơ̆, tàm tiah mpồng hìu bơsram 29 hìu bơsram kấp 1 tàm ƀòn dờng Pleiku, mpồl lơh jăt rơndăp broă neh lơh niam wơl, pờ ơnàng, lơh pa rơlao 800 rơbô thơ̆k vuông gùng dă mờ cài, dă mờ bêtông sơmang; lơh rơlao 2 rơbô thơ̆k vuông jăt gah gùng; ai 136 anih cih jơnau yal gùng lòt tàm ù gờl tàm tiah mpồng hìu bơsram; bơtơl phan treh gùng; mpồl gùng treh tơmù bơta jờl...

Bal mờ hơ̆ là ală broă lơh nàng tơnguh uă jơnau git wă mpồl bơtiàn mờ pơgồp bal mờ mpồl kảnh sát sền gàr gùng lòt ƀòn dờng pleiku lòt sền gròi, lơh glài ală cau lơi tìs mờ kơrnoăt pa bè khà jờl tàm tiah hìu bơsram.

Cau mblàng Ndong Brawl