VOV4.K’ho- Ngai 12/08, Ngai chờ jơh gùt làng bol sền gàr bơta lơngap lơngai dà lơgar nam 2022 geh càr Gia Lai bơyai lơh tàm 2 kơnhoàl Chư Păh mờ Phú Thiện. Bơh bồ nam tus tŭ do, tàm càr Gia Lai, bơta cau lơh tìs kŭp jàm gơmù uă ngan jơh bal bè khà mờ dơ̆, khà cau chơ̆t mờ khà cau sồt să. Tàm hơ̆, khà dơ̆ kŭp cau lơh tìs kơn jơ̆ ngan, ngan là bơta kơn jơ̆ geh 93,5%. Broă lơh bơt bơtàu srơh jơh gùt làng bol sền gàr bơta lơngap lơngai dà lơgar sùm tam gơl pa jơh bal bè tơngume mờ broă lơh, gơ hòi gơ jà uă ngan làng bol tus bal. Tus tŭ do, gùt càr geh 550 dơ̆, sơnah ƀòn, thôn, ƀòn, hìu bơsram, anih lơh broă dà lơgar, mpồl lơh sa kă bro mờ rlau 50 rơbô 450 nă cau tus bal tàm srơh, pơgồp bơnah kwơ màng bal mờ mpồl lơh broă geh gơnoar tam dră wơl, rcang sơndră mờ cau lơh tìs; gàr niam bơta lơngap lơngai, rơndap tap sèng.

Kwang đơng lam bồ kwang àng càr Gia Lai pà sră jờng rơ ai ală cau dùl nă să is pơn rơ jak tàm srơh tàm kơnhoàl Chư Păh

Tàm tơngai tus, Mpồl đơng lam rcang sơndră cau lơh tìs mờ bơt bơtàu srơh jơh gùt làng bol sền gàr bơta lơngap lơngai dà lơgar càr Gia Lai kơ̆p kờñ ală mpồl lơh broă, ală tiah pơn jat tai bơt bơtàu niam srơh tàm ƀòn lơgar; mblàng yal, hòi jà làng bol lơh ngan tus bal rcang sơndră, tam dră lơh ờ jai jơh ală jơnau kai bơh ală cau ờ niam dê; tam dră rcang sơndră mờ cau lơh tìs; sơlơ tam klăc bal gùt làng bol.

Cau mblàng K’Hạnh