VOV4.K’ho- Kờp tus nhai 3 nam 2022, tàm Gia Lai, kung gam geh 170 rơbô lồ brê kờp jơh bă brê rlau 632 rơbô lồ ờ hềt geh jàu ai ală mpồl atbồ, mpồl cau, mpồl bơtiàn in lơh jat broă sền gàr, atbồ. Bơta geh ngan do sồr gơnoar atbồ kấp xã pal sền gàr brê is tàm tŭ ală bơta bè mpồl cau, phan bơna mờ bơta pràn ờ hềt tơl. Bơta do lơh gơlik bơta kơn jơ̆ ngan gơwèt mờ broă lơh ală kơnòl broă cíñ trị ndai tàm tiah do dê, cồng nha atbồ, sền gàr brê tàm tiah do kal ke ngan geh lơh niam.

Bi Trần Quốc Châu, 34 sơnam, ơm tàm ƀòn Kla geh Ủy ƀan Ñân zân xã Ia Mơr, kơnhoàl Chư Prông kĭ sră pơrgon lơh cau sền gàr brê ai xã in bơh bồ nam 2022. Mờ khà priă nhai jàu jơh 6 tơlak đong, dùl nă cau, dùl nhai, kơnòl broă bơh bi Châu mờ 4 nă kwang bàng tờm tàm Anih sền gàr brê sồ 1 là lòt sền, sền gàr pơgap 4 rơbô lồ brê. Bă brê atbồ dờng ơnàng, tơngai lơh broă ờ kờp ngai hala mang, bơta ngòt rơngơ̆t pơhìn sùm mơya ờ geh phan rcang gàr dong kờl, gơnoar ơ hoan geh lơh mpồl sền gàr brê sùm ơm tàm bơta ờ pràn. Bi Trần Quốc Châu, đơs: Khi hòi điện thoại, gĭt oh mi lòt gùng lơi, cau đơs sồr lòt ndo, pờng chơ̆t; ià pềs, ià yoas mŭt lơh là bè ờs ngan. Cau atbồ anih sền gàr brê jàu oh mi in lòt sền, dilah sền gŏ den yal, ờ gơtùi lơh bơta lơi ờ, yal mờ xã ai mpồl cau lòt bơsong, mpồl sền gàr brê ờ gơtùi bơsong ờ.

Broă sào sa, ơm kis bơh cau sền gàr brê tàm xã Ia Mơr, kơnhoàl Chư Pưh dê

Ồng Nguyễn Tuấn Anh- Phó Củ tịc Ủy ƀan Ñân zân xã Ia Mơr, kơnhoàl Chư Pưh pà gĭt, kờp jơh bă brê geh is mờ ù brê bơnơm tàm xã dê tŭ do là 24 rơbô lồ. Tàm hơ̆, pa geh 10 rơbô lồ geh jàu ai Mpồl atbồ brê rcang gàr bồ tô dà Ia Mơr in lơm. Bă brê gam wơl, xã pal atbồ. Bơdìh mờ 20 nă cau lơh broă jat sră pơrgon, xã pal ai tai mpồl kwang bàng, kwang àng, ling griăp ƀòn tus dong kờl tàm trồ mang. Tài bơh do là tơngai brê gơtìp mus kơl uă ngan rlau jơh. Ồng Nguyễn Tuấn Anh pà gĭt, bơh nam 2021 tus tŭ do, să tờm ồng, mpồl cau tàm Ủy ƀan Ñân zân xã mờ mpồl sền gàr brê neh gơtìp lơh glài sền is tìs di rlau jơ̆t dơ̆ tài bơh ờ hềt kơryan jơh bơta mus kơl brê. Ồng Nguyễn Tuấn Anh, đơs: Bè să tờm añ, ngai lơh broă tàm xã, trồ mang gam tơbă ơyun tàm brê bal mờ oh mi kơryan, nàng jat sền ngan, bơsong di tŭ rlau. Mơya kal ke ngan ai tiah do in tàm ală gah lơh broă ndai. Pơn yơu bè geh tŭ tơrgùm jơh cau tàm broă atbồ, sền gàr brê, den ală gah broă ndai bè bơtàu tơnguh lơh sa, bơto pơlam làng bol bơtàu tơnguh kàl lơh sa den gơtìp ờ hoan geh tĕ. 

Mpồl sền gàr brê xã Ia Mơr, kơnhoàl Chư Pưh sa tàm brê nàng sền gàr brê

Ờ jai ngan tàm broă sền gàr brê kung là bơta geh ngan bơh Ủy ƀan Ñân za xã H’Bông, kơnhoàl Chư Sê dê. Ồng Bùi Văn Cường, Phó Củ tịc Ủy ƀan Ñân zân xã H’Bông pà gĭt, nggùl nam 2019, tŭ Mpồl atbồ brê rcang gàr bồ tô dà Ayun Pa gơtìp tơn jơh lơh broă, xã geh jàu rlau 3 rơbô 800 lồ brê, tàm hơ̆ geh rlau 2 rơbô 100 lồ là brê rcang gàr bồ tô dà. Kung bơh hơ̆ tus tŭ do, bơta mus kơl brê tàm do gơlik geh sùm, mờ bơh bàr pe lồ tus bàr pe jơ̆t lồ dùl dơ̆. Mìng kờp is tàm ờ hềt tơl 1 nam, bơh nhai 9 nam 2021 tus bồ nhai 7 nam 2022, brê tàm 15 lô, bơh 4 bă brê gơ wèt ală tiểu khu 1064 mờ 1065 neh gơtìp cau mus kơl brê, cò pơnring. Tàm ală tiah do, geh 23 lồ 5 sào neh gơtìp tam tờm ƀạch đàn, tŭ hòn ryas jòng rlau dùl nđàm tê, cau tờm brê hơ̆ sồng sền gŏ. Ồng Bùi Văn Cường pà gĭt: Tơnơ̆ tŭ xã H’ Bông dờp bă brê do den geh uă bơta kal ke bè pal lòt gan mờ gùng dà dờng halà lòt gan 2 kơnhoàl Phú Thiện, Ia Pa, jơh bal lòt mờ rê là pơgap 100 kơi sồ.

Brê tàm xã Ia Mơr sùm gơtìp chu aniai, sơgràm ù nàng tam phan

Ồng Thái Thượng Hải- Kwang atbồ Hạt kiểm lâm kơnhoàl Chư Sê pà gĭt, mpồl neh uă dơ̆ cribơyai mờ Ủy ƀan Ñân zân kơnhoàl Chư Sê lơh sră nggal dan mờ Ủy ƀan Ñân zân càr Gia Lai jàu brê, mơya ờ hềt geh cồng nha. Ồng Thái Thượng Hải đơs: Bơh ală dơ̆ broă mờ broă atbồ geh ală bơta ờ niam, den tàng nam 2021, Hạt kiểm lâm neh cribơyai mờ kơnhoàl pơyoa sră yal mờ Sở Nông nghiệp mờ Phát triển Nông thôn in yal mờ Ủy ƀan Ñân zân càr dan jàu bă brê do ai Mpồl atbồ brê rcang gàr bồ tô dà Ayun Pa in atbồ, tài bơh khi geh mpồl cau lơh broă ờs mờng, geh priă jền, den geh niam rlau. Bồ nam 2022 kung lơh dùl dơ̆ tai sơl.

Mờ rlau 632 rơbô lồ brê, tŭ do, càr Gia Lai là càr geh bă brê dờng dơ̆ 4 gùt lơgar dê mờ dờng ngan rlau jơh tàm 5 càr tiah Tây Nguyên. Tơngai pa do, bă brê geh is bơh càr dê kung gam pơn jat tai gơmù; khà chi che lơyah rlau mờ bơta kờp bal bơh gùt tiah dê. Tơngai bơh nam 2015-2020, tàm càr gơlik geh rlau 4 rơbô 300 dơ̆ lơh tìs mùs kơl gĭt nđờ rơhiang lồ brê.

Ồng Nguyễn Văn Hoan- Phó Kwang atbồ Sở Nông nghiệp mờ Phát triển Nông thôn càr Gia Lai pà gĭt, dùl bơnah jơnau gơbàn là ală xã kal ke ngan sền gàr brê, là bă brê geh jàu tàm bơr lŭ bal mờ ù lơh sa bơh làng bol dê. Nàng sền gàr brê geh cồng nha rlau tai, brê pal geh jàu ai ală mpồl lơh sa kă bro in halà làng bol in bè jơnau cih bơh Adat brê bơnơm dê. Mơya broă do gơrềng tus uă bơta, bè priă tă, đo was. Ồng Hoan kơ̆p kơnờm jơh alăbrê tàm càr geh jàu di cau mờ di jat broă rơndap lơh tus nam 2030. Ồng Nguyễn Văn Hoan, đơs: Tŭ do, Gia Lai gam geh bă brê dờng ngan ờ hềt geh jàu ai ală cau tờm atbồ brê in. Nùs nhơm bơh gah lơh sa suơn sre mờ brê bơnơm dê là jơh ală bă brê pal geh jàu ai cau tờm sền gàr, atbồ brê in, pơnđơl lơh ngan tus nam 2030, jơh ală bă brê do pal geh jàu ai cau tờm brê in atbồ.

Tàm tŭ kơ̆p brê geh cau tờm atbồ, Ủy ƀan Ñân zân ală xã tàm ală tiah geh brê ờ hềt jàu kung pal kwi kwơ ngan mờ kơnòl broă ờ gơtùi pleh klàs do.

Cau cih Nguyễn Thảo- Cau mblàng K’Hạnh