VOV4.K’ho- Lơh sa mpồl bơtiàn càr Gia Lai 9 nhai nam 2022 geh uă tềl bơtàu tơnguh wơl pràn ngan. Tàm hơ̆, khà mpồl lơh sa kă bro crơng gơs pa mờ cồng nha gơ hòi gơ jà bơcri priă ndrờm lơh geh cồng nha niam. Bơh bồ nam tus tŭ do, tàm càr Gia Lai geh rlau 740 mpồl lơh sa kă bro geh crơng gơs pa (gơguh mờr 17% pơndrờm mờ bal dùl tŭ nam 2021), mờ kờp jơh priă bơcri cih tàm sră  rlau 7 rbô 400 tơmàn đông.

Ñrùh dà 2 kai cờn tàm Gia Lai

Bè gơ hòi gơ jà bơcri priă, Ủy ƀan Ñân zân càr Gia Lai ring bal gùng dà bơcri priă ai 6 rơndap broă loh in, mờ kờp jơh priă bơcri rlau 600 tơmàn đông. 15 rơndap broă lơh ndai, kờp jơh priă bơcri rlau 3 rbô 400 tơmàn đông neh lơh sir sră nggal, gam kơp càr sền sơ wì. Jat ồng Nguyễn Hữu Quế, Kwang atbồ Sở Kế hoạc mờ Đầu tư càr Gia Lai đơs, nàng broă bơcri priă loh làng, ring bal rlau, càr ờ mìng tơnguh broă lơh niam wơl sră nggal lơh broă mờ gam kràñ cê wi wơl rơndap broă lơh lam lơh ờ di jơnau hơ pơrgon.

VOV Tây Nguyên – Cau mblàng K’Duẩn