VOV4.K’ho - Jơh ală kơnờm bơsram ală càr tàm tiah Tây Nguyên neh lòt bơsram wơl tơnơ̆ mờ uă dơ̆ gơtìp ơm ing tài gơrềng bơh kòp Kovid-19. Gah bơto bơtê mờ bơsram ală càr gam tơrgùm tơnguh jơnau git wă, gàr tơl bơta niam broă lơh, mờ bơcri priă bơtơl phan bơna hìu bơsram, gàr niam broă bơto – bơsram geh cồng nha niam ngan.

                     Kơnòm bơsram kấp 1 Nguyễn Công Trứ, ƀòn dờng Buôn Ma Thuột

Tàm mpồl cau gal ngan tềng đăp mpồng hìu bơsram kấp 1 Nguyễn Công Trứ, sơnah ƀòn Tân Lập, ƀòn dờng Buôn Ma Thuột, lŏ Trương Thị Ngọc Ánh jun kòn mŭt tàm ơdŭ 1, mờ nùs nhơm ngoh rơngăc ngan. “Jun kòn lòt bơsram gơlơh nùs nhơm chờ hờp mờ ngoh rơngăc ngan. Bơdìh hơ̆ tai, kung geh ờ uă jơnau ờ sŭk sơl tài kòn gam dềt ir mờ ờ hềt geh cit sơnơm vaccine. Kơ̆p kờñ là mờ broă rơcang lài nền nòn bơh hìu bơsram, kòn geh bơsram sră niam tàm hìu bơsram”.

Bè đah hìu bơsram, bơto bơsram tơn tàm ơdŭ tàm tơngai gam tai bơh nam bơsram là kwơ màng ngan, nàng tơnguh jơnau git wă ai kơnòm bơsram in, tàm hơ̆ uă ngan là gơwèt mờ kơnòm bơsram ơdŭ 1 mờ ơdŭ 5, tơnơ̆ mờ 1 nam geh uă tơngai bơsram tàm hìu. Jăt mò Bùi Thị Hương, kwang atbồ hìu bơsram kấp 1 Nguyễn Công Trứ yal, nàng bơto bơsram tơn tàm ơdŭ geh niam, hìu bơsram geh sền gròi niam ală broă rơcang sơndră mờ kòp gơtờp: “Bol añ neh lơh jăt tus jơh gùt cau pơgru, tơrgùm bơto wơl jơnau bơsram bơh bồ nam bơsram tus tŭ do, bal mờ hơ̆ geh bơto jơnau bơsram pa bơh poh bơsram gam tai in. Cau mè bèp ring bal, ală cau pơgru pal lơh ngan nàng ală kơnòm bơsram geh bơsram jơh ală jơnau bơsram niam bơnĕ ngan”.

                  Kơnòm bơsram ƀòn dờng Buôn Ma Thuột chờ hờp ngai sơnrờp geh lòt bơsram wơl

Mờ kơnòm bơsram Mầm non, broă ờ geh lòt bơsram tàm hìu bơsram tàm tơngai mờr 1 nam bơsram pa do là ờ niam uă ngan, tàm hơ̆ uă ngan là gơwèt mờ kơnòm 5 sơnam pal bơsram tàp uă tơngu me lài mờ tŭ mŭt bơsram ơdŭ 1. Tàm khà hơ̆, kơnòm 5 sơnam tàm ală ƀòn làng bol kòn cau pal bơsram tàp đơs dà yoan hơ̆ sồng git wă geh cồng nha ală tơngu me jơnau bơsram. Den tàng, ală hìu bơsram mầm non tàm càr Dăk Lăk ndrờm geh kơnòl tơnguh broă bơto dà yoan ai ală kơnòm bơsram in tàm tơngai tus. Pơgru Đặng Thị Tuyết, kwang atbồ hìu bơsram mầm non Tân Lập, ƀòn dờng Buôn Ma Thuột pà git: “Ơdŭ geh oh kòn làng bol kòn cau den geh rơndăp săp sèng ai 1 nă cau pơgru cau yoan mờ dùl nă cau pơgru kòn cau nàng tŭ bơyai bơto geh tơnguh đơs dà yoan nàng kòn dềt in geh bơta ƀuơn rơlao. Tŭ kòn dềt ờ wă dà yoan den neh geh cau pơgru cau yoan, tŭ kòn dềt ờ wă dà đơs mè deh den neh geh pơgru kòn cau dong kờl nàng kòn dềt in git bal đơs dà yoan mờ nàng ƀuơn rơlao tŭ mŭt bơsram ơdŭ 1”.

Gam tàm kơnhoàl Đăk Pơ, càr Gia Lai neh ai rơlao 1 tơmàn 600 tơlăk đong nàng bơ̆t bơtàu phan bơna, blơi tơl ală phan bơto bơsram nàng di pal mờ broă kờñ bơsram sră bơh kơnòm bơsram dê. Pơgru Thái Thị Cẩm Linh, bơto dà Mỹ tàm hìu bơsram kấp 1 Trần Phú, xã Tân An, kơnhoàl Đăk Pơ pà git, hìu bơsram geh bơcri priă bơ̆t bơtàu ơdŭ bơsram ngăc ngar mờ 21 nơm măi vi tính, măi sòl mờ phan bơto ngăc ngar. Bơh tŭ hơ̆ tus tŭ do, ơdŭ bơsram do neh pơgồp bal tàm broă tơnguh uă bơta niam broă bơto bơh hìu bơsram dê. Bơh tŭ hơ̆, geh dong kờl kơnòm bơsram gơboh kờñ rơlao mờ broă bơsram, cau pơgru kung geh bơto uă jơnau ngăc ngar rơlao ai kơnòm bơsram in. “Añ gŏ ƀuơn ngan ai broă bơto. Săp đơs, rùp pờ tơlik niam geh dong kờl broă bơto jơnau bơsram tus mờ kơnòm bơsram in mhar mờ ƀuơn wă rơlao. Phan măi mŏk geh niam, bol añ ngui jơh bơta pràn tơn”.

               Kơnòm bơsram tàm hìu bơsram kấp 1 Trần Phú, xã Tân An, kơnhoàl Đăk Pơ, càr Gia Lai

Tàm tŭ phan bơto bơsram bơh hìu bơsram kấp 1 Trần Phú gam geh ngui niam, den ơdŭ bơsram mờ 40 nơm măi vi tính bal mờ rùp bơh măi sòl ngăc ngar bơh hìu bơsram kấp 2 Chu Văn An neh ờ niam tai tus mờr nggùl. Nàng tơl niam ai broă bơto mờ bơsram in, kơnòm bơsram pal nggui bal bơh 2 tus 3 nă tàm 1 nơm măi vi tính. Pơgru Nguyễn Cao Trí, Kwang atbồ hìu bơsram kấp 2 Chu Văn An, kơnhoàl Đăk Pơ pà git: “Tŭ ờ hềt geh priă blơi phan den gam lơh niam wơl sùm, den tàng kung gam ngui gơtùi nàng bơto ai ală kơnòm bơsram in. Mơya, tàm bơta ală phan neh ngui jŏ den ngui ờ niam tai”.

Ală nam do, ală hìu bơsram tàm kơnhoàl Đăk Pơ, càr Gia Lai neh rơcang lơh rơndăp broă atbồ, ngui jơdŭ môn bơsram mờ phan bơto bơsram di pal mờ bơta geh bơh tơl hìu bơsram dê, gàr niam mờ tơnguh uă ngan cồng nha ngui. Tus tŭ do, 22 hìu bơsram ală kấp tàm kơnhoàl Đăk Pơ, càr Gia Lai ndrờm geh bơcri priă blơi tơl phan bơna, phan bơto mờ bơsram. Mò Nguyễn Thị Như Thuỷ, Phó kwang atbồ phòng Giáo dục mờ Đào tạo kơnhoàl Đăk Pơ pà git: Jăt rơndăp broă neh geh ai nam 2022, kơnhoàl Đăk Pơ bơcri rơlao 1 tơmàn 600 tơlăk đong priă nàng dong kờl ală hìu bơsram tàm kơnhoàl bơcri priă blơi phan bơna, pphan bơto mờ bơsram nàng drơng broă bơto mờ bơsram sră. Bơh tŭ hơ̆, rơhời di pal mờ kơnòl tam gơl pa broă bơto mờ bơsram tàm bơta pa. “Nam bơsram 2020-2021, Phòng kung neh bơyai lơh lòt sền ală phan bơto mờ bơsram mờ kung neh git sơl, mùl màl tàm ală hìu bơsram. Geh jơnau yal mờ UɃÑZ kơnhoàl blơi mờ bơtơl priă nàng geh tơl rơlao. Tŭ do, bồ nam 2022, kơnhoàl neh bơcri tơl hìu bơsram bơh 60 tus 80 tơlăk đong nàng bơtơl tàm broă blơi phan pa ha là lơh niam wơl nàng drơng tàm broă bơto mờ bơsram ai ală hìu bơsram in”.

Neh rơlao 1 nam bơsram mờ uă tơngai bơsram pờ tơlik tàm internet, tŭ do neh lòt bơsram tơn tàm ơdŭ, ală hìu bơsram tàm tiah Tây Nguyên gam mhar lơh niam broă, geh sùm bơta niam tàm broă bơsram sră, bơcri priă blơi phan bơna, ngui tơngai kơnòm bơsram geh lòt bơsram wơl tàm ơdŭ nàng bơyai bơto mờ bơsram geh cồng nha, nàng lơh gơs niam kơnòl nam bơsram neh geh ai.

Cau mblàng Ndong Brawl