Mùl màl tàm 2 jơ mho ngai òr (02/10), 4 nă kơnòm pa tào lòt ê kơnrồ tiă gan croh dà tềng tiah Ñrùh 2, gơwèt xã Ia Blứ nàng rê. Tŭ neh tiă tàm gùl croh dà den dà tàm croh ni sơna gơguh tih, geh 1 nă neh tiă rê tus, gam 3 nă gơtìp kòl tềng bồ lŭ tàm gùl croh dà.

Tơnơ̆ mờ tŭ dờp geh jơnau yal, mpồl dong klàs cau gơtìp rềs àr kwang àng càr Gia Lai geh 9 nă kwang bàng, cau ling neh lơh jăt ală gùng dà broă lơh nàng dong klàs mờ broă ngui phan pơdar che dang tus tàm gùl croh dà, kơ̆t che tềng bŭt tơl nă kơnòm dềt pa tào hơ̆ sồng duĭ rê hờ đang gờl. Di tàm tŭ do, geh 1 nă kơnòm pa tào tài ngòt ir, ờ thàn kwan che mờ neh gơtìp dà pơrdô dùl gơl, mơya bơtoah ngan neh geh cau tàm mpồl dong klàs re jăt bal mờ dong klàs di tŭ. Tus 6 jơ 45 phút mho, jơh 3 nă kơnòm pa tào neh geh dong klàs tus niam hờ đang ù gờl.