VOV4.K’ho - Tàm ngai òr (12/08), UɃÑZ càr Gia Lai neh bơyai lơh pơrjum lơh jăt kơnòl nam bơsram 2022-2023. Tàm pơrjum, kwang đơng lam UɃÑZ càr sồr gah bơto bơtê mờ bơsram càr bal mờ ală tiah tàm càr rơcang niam ai nam bơsram in, bañ lời kơnòm bơsram lơi tài bơta kal ke pal sơbì bơsram.

Càr Gia Lai bơyai lơh pơrjum cri bơyai bè broă drơng gàr niam kơnòm bơsram tiah kal ke mờ kòn cau tàm nam bơsram pa

Jăt kờp dŭ, nam bơsram 2022-2023 tàm càr Gia Lai geh sơn đờm bơh ngai 29 nhai 8 nam 2022 mờ mờr 400 rơbô nă kơnòm bơsram bal mờ kơnòm dềt mầm non. Nàng rơcang niam ai nam bơsram pa, càr neh ai rơlao 623 tơmàn đong bơcri tàm broă blơi phan bơna, phan bơto bơsram, tam pà tai 1 rơbô 244 nă cau pơgru bơto tàm ală kấp bơsram in. Tàm pơrjum, mò Nguyễn Thị Thanh Lịch, Phó Củ tịc UɃÑZ càr Gia Lai sồr gah bơto bơtê mờ bơsram pal gàr niam broă pơgồp bal niam mờ gah lơh sơnơm nàng tơnguh uă khà cit sơnơm vaccine kòp Kovid-19 ai kơnòm bơsram in; lơh jăt niam ală broă rơcang sơndră mờ kòp gơtờp tàm hìu bơsram; tơnguh bơta pràn, lơh niam jơh mpồl cau pơgru mờ kwang bàng atbồ; lơh jăt geh cồng nha, gàr niam broă tềm pềr gơwèt mờ 3 broă lơh jăt jơnau kờñ dà lơgar dê gơrềng tus mờ broă bơto bơtê mờ bơsram; pơn jăt tai tơnguh uă bơta niam broă bơto bơtê mờ bơsram tiah làng bol kòn cau.

Cau mblàng Ndong Brawl