Sa Tềp bơhiàn dà lơgar dê nam Qúy Mão 2023 gam mờr tus rềp ngan, broă gàr tơl phan mờ gàr niam giă tàm drà kă bro là broă tờm ngan geh gah Kông thương mờ ală tiah, mpồl lơh sa kă bro tàm càr Gia Lai rơcăng lài lam lơh. Jăt Sở Kông thương càr Gia Lai đơs, yal lài jơnau kờñ blơi phan tàm dơ̆ sa tềp bơhiàn dà lơgar dê nam Qúy Mão 2023 rơ̆p gơguh pơgăp 30%.

Nàng gàr tơl phan kă bro, Sở neh sồr ală anih, ală mpồl lơh sa kă bro lam lơh broă rơndăp lơh ơn prăp ală bơta phan kờñ pal geh, ngan là phan sa, lơh jăt geh cồng nha broă lơh gàr niam giă, tăc phan di giă neh lir. Mờ ală anih kung kĭ sră hơ gàr bơta niam phan kă bro, geh sră cih mat phan tăc blơi wil tơl, anih lơh gơlik loh làng. Ală mpồl lơh sa kă bro tàm càr kung tơnguh uă bơta niam rùp să kơldung ơn prăp phan bơna, lơh geh bơta pràn tàm pơrlòng mờ phan blơi bơh lơgar ndai pơgồp bơnah lơh jăt geh cồng nha dơ̆ hòi jà “Cau Việt Nam ngui sa lài phan Việt Nam”.