Mpồl atbồ, sền gàr brê ƀòn Keo, xã Ayun, kơnhoàl Chư Sê dờp ơpah sền gàr rlau 100 lồ brê bơh Mpồl atbồ brê rơcang gàr bồ tô Chư Sê. Ală bă brê tàm do geh uă nhơt ro, tơdau ƀuơn ngan gơlik geh ồs sa brê. Bi Bùi Văn Khánh, mpồl atbồ brê ƀòn Keo, xã Ayun pà git: “Oh mi sùm lòt sền gròi brê, ngan là tàm tơngai trồ tiah prang duh bè do. Dilah geh bơta ờ niam lơi gơlik geh den bol hi yal mơ mpồl atbồ brê mờ anih lơh broă geh gơnoar in nàng rơcang lài kơryan mơ”.

Mut tàm tơngai prang duh, Mpồl atbồ brê rơcang gàr bồ tô Chư Sê neh pồ tơl wơl 7 mpồl atbồ, sền gàr brê; sùm lòt sền, sền gròi tàm ală tiah ƀuơn gơlik geh ồs sa. Mờ kung lam lơh chu lài geh bơta rơndap tap sèng gùt dar bă ù rlau 400 lồ brê tam mờ brê geh is geh jơnau pơhìn gơlik geh ồs sa uă tàm 3 xã: Bar Maih, Ayun mờ H’Bông. Ồng Đinh Mạnh Phong, Kwang atbồ Mpồl atbồ brê rơcang gàr bồ tô Chư Sê, càr Gia Lai pà git, broă chu nhơt ro geh bơta rơndap tap sèng dong broă lơh rơcang lài kơryan ồs sa brê gơtùi sền gròi: “Tus kàl prang den phan ƀuơn gơbàn ồs sa uă ngan, den tàng tŭ chu lài geh rơndap tap sèng den rơp tơrmù phan ƀuơn ồs sa, ờ gơlik geh ồs sa dờng, bơh hơ̆ he gơtùi sền gàr bơta geh ngan brê dê niam rlau”.

Mpồl atbồ brê rơcang gàr bồ tô Chư A Thai geh bă brê ơm tàm ù tiah 2 kơnhoàl Ia Pa mờ Phú Thiện, càr Gia Lai, mờ mờr 19 rbô lồ brê. Ồng Phạm Đắc Vịnh, Phó kwng atbồ Mpồl drơng broă brê rơcang gàr bồ tô Chư A Thai pà git: Tŭ do, do là tiah geh jơnau tơngkah lài pơhìn ồs sa brê kâp V – là kâp ngòt rơngơt ngan: “Mpồl neh tam pà gơs 5 mpồl pơgồp bal mờ 125 hìu bơnhă dờp ơpah sền gàr brê bơh mpồl dê, lam lơh broă lơh atbồ, sền gàr brê mờ rơcang lài kơryan crùh ồs sa brê. Gơ wèt mờ brê dơm chi dờng mờ mpồl gam sền gàr den lài mờ tŭ mut tàm kàl prang mpồl neh lam lơh broă lơh chu lài geh rơndap tap sèng nàng tơrmù phan ƀuơn ồs sa, ờ lời gơlik geh ồs sa brê”.

Nàng rơcang lài kơryan ồs sa brê geh cồng nha, bơh nam 2023 tus tŭ do, Ủy ƀan Ñân zân kơnhoàl Ia Grai bal mờ ală mpồl tờm brê pơgồp bal mờ gơnoar atbồ kơnhoàl lam lơh 15 dơ̆ mblàng yal bè Adat atbồ, sền gàr mờ tam brê tàm 5 xã geh brê mờ rlau 1 rbô dơ̆ cau tus bal; kĭ jơnau hơ pơrgon gàr lơngăp lơngai ồs brê mờ git nđờ rhiang hìu bơnhă kis rềp brê, phàt rlau 2 rbô pang sră cih jơnau yal mblàng jơnau ai làng bol ală xã geh brê in nàng broă lơh rơcang lài kơryan ồs sa brê lơh geh cồng nha uă. Ồng Đỗ Văn Đông, Phó Củ tịc Ủy ƀan Ñân zân kơnhoàl Ia Grai, càr Gia Lai pà git: “Ủy ƀan Ñân zân kơnhoàl neh lam lơh lòt sền ngan ngồn tàm 2, 3 mpồl atbồ brê mờ 2, 3 mpồl tờm brê nàng tơnguh nùs nhơm geh kơnòl tàm broă rơcang lài kơryan ồs sa brê, ngan là broă lơh rơcang lài kơryan ờ lời gơlik geh ồs sa brê”.