Jăt jơnau kờp, tơl nă kông ñân gam gơtìp dồs priă nhai bơh 30 tơlăk tus 50 tơlăk đong. Ồng Lê Tấn Thanh, kis tàm xã Dăk Wer, kơnhoàl Dăk Rlấp, càr Dăk Nông pà git: tàm nhai 10 nam 2023, ồng hòi jà geh mờr 70 nă cau bơh càr Dăk Nông, Phú Yên, Bình Phước mờ tàm ală càr Tiah đah jum măt tơngai mŭt tus lơh wàng ròng sur dờng. Tus tŭ do neh mờr 4 nhai, mpồl lơh broă apah cau lơh broă mìng tơm 1 bơnah ờ uă ngan priă nhai.

Ồng Thanh neh uă dơ̆ lùp mơya mìng dờp geh wơl là ală jơnau hơ. Ồng Lê Tấn Thanh pà git tai: “Tŭ do añ ròng ală oh mi lơh broă neh git nđờ nhai do, bơh ngai 16 nhai 10 nam 2023 tus tŭ do, geh dùl dơ̆ đah Kông ty Vương Anh Thắng geh ai ing lài 600 tơlăk đong priă nhai, tus tŭ do priă cau lơh broă mờ priă apah phan lơh broă gam tàm 3 tơmàn 200 tơlăk đong tai. Añ neh dùl dơ̆ lùp mờ cau tờm bơcri priă lơh den cau hơ mờ añ tàm ngai 20 nhai 12 oh mi lơh broă tus poh tơnơ̆ geh priă mờ hơ sùm bàr pe dơ̆ mờ tus ngai do añ kung ờ hềt geh priă, ờ jai ròng oh mi lơh broă tai. Kơ̆p kờñ anih lơh broă geh gơnoar lơh bè lơi nàng ai tơl bơta niam añ in geh priă nàng tơm oh mi in geh priă rê Satềp. Gam jơh ală broă tơnơ̆ do yal yă cau lơi di cau lơi ờ di den jơh satềp bơsong tài ngai satềp neh mờr tus bloh, oh mi pal rê hờ ƀòn lơgar satềp”.

Kung ndrờm bè hơ̆ sơl, bi Trần Minh Hướng ƀòn tờm bơh càr Tây Ninh kung lam oh mi tàm ƀòn lơgar tờm lòt lơh broă tàm wàng ròng sur dờng do sơl. Rơlao 3 nhai do, să tờm bi Hướng mờ ală oh mi gam gơtìp cau tờm bơcri priă ờ hềt tơm mờr 500 tơlăk đong priă nhai sơl. Bi Trần Minh Hướng pà git: “Tus tàm do mờr 3 nhai bloh, sơnrờp ngan den geh git nđờ jơ̆t nă cau, tŭ do oh mi neh rê jơh gam 8 nă, ờ geh priă, ờ git ai priă bơh tàm tiah lơi nàng tơm oh mi in rẹ hờ ƀòn. Tàm bè ờs là oh mi dong kờl lơh geh priă nhai 12 tơlăk đong, cau chài lơh là 15 tơlăk đong, kơ̆p kờñ geh priă nàng oh mi rê hờ ƀòn di lah ờ tŭ do ờ git lơh bè lơi nàng oh mi geh priă rê”.

Ồng Hồ Công Anh Tuấn, kis tàm kơnhoàl Chư Sê, càr Gia Lai dờp lơh 6 nơm wàng ròng sur me tàm tiah lơh broă kung gơtìp tàm bơta ndrờm bal sơl. Ồng Hồ Công Anh Tuấn pà git: “Pe nhai bloh kung ờ hềt geh priă ai oh mi lơh broă in. Bơta kwơ màng là đah cau tờm bơcri priă lơh mờ cau dờp lơh den mùl màl bè lơi den añ ờ git loh. Mơya tŭ do lùp Vương Anh Thắng (đah mpồl lơh broă) den cau đơs là bơh cau tờm bơcri priă là cau tờm bơcri priă ờ hềt bài bơcri priă. Mờ mùl màl añ lơh broă mờ Vương Anh Thắng, ờ git mùl màl cau tờm bơcri priă là cau lơi. Kơ̆p kờñ geh gùng dà broă lơh lơi niam ngan là pal geh tơl priă nhai lơh broă ai oh mi lơh broă bơh tàm tiah ngài in, ờ gơtùi lời oh mi ơm tàm do neh 3 nhai, tàm hìu ală oh mi do gam geh kòn bao tai, tŭ do ờ geh priă mờ neh mờr stâèp tai den oh mi ờ geh priă nàng đì rơndeh rê kung sơnđàc ngan sơl”.

Rơndăp broă lơh Wàng ròng sur me deh kòn tàm thôn Cây Xoài xã Ia H’ La, kơnhoàl Chư Pưh, càr Gia Lai geh lơh bơh nhai 01 nam 2023, geh Kông ty TNHH MTV Phát Tài Gia Lai lơh tờm bơcri priă. Kờp jơh priă bơcri bơh rơndăp broă lơh do tàm pơgăp 80 tơmàn đong, Kông ty TNHH Vương Anh Thắng lơh mpồl lơh broă.

Broă lơyài tàm broă tơm priă nhai ai cau lơh broă tàm tiah lơh wàng ròng sur do geh sền là tài Kông ty TNHH MTV Phát Tài Gia Lai mờ mpồl lơh broă, Kông Ty TNHH MTV Vương Anh Thắng gơtìp uă kal ke gơrềng bal tus mờ ală kơrnoăt jăt broă lơh bal mờ ală gah neh kĭ lài mờ hơ̆. Tài ờ hềt geh jơnau ring bal tàm broă lơh, den tàng kung ờ hềt geh jơnau ring bal bè khà broă lơh, den tàng đah ngân hàng ờ hềt bơcri priă lơh kông ñân, cau lơh broă gơtìp ờ geh priă sùm. Ồng Rơ Lan Hoen, Củ tịc UɃÑZ xã Ia H’la pà git, UɃÑZ xã pa git geh git nđờ jơ̆t nă kông ñân lơh broă gơtìp ờ geh priă nhai. Tềng đăp măt, UɃÑZ xã neh ai mpồl kwang àng tus nàng sền gròi git ală bơta mờ gàr niam bơta lơngăp lơngai. Mờ geh lùp sền ală gah lơh broă gơrềng bal nàng di tŭ bơsong kal ke ai kông ñân cau lơh broă in. tơnơ̆ mờ hơ̆ geh yal mờ UɃÑZ kơnhoàl Chư Pưh mờ ală gah, mpồl lơh broă gơrềng bal bè bơta do in.