Jăt mò Đào Thị Thu Nguyệt, Phó Kwang ătbồ Sở Kông thương càr Gia Lai yal, priă geh bơh tăc phan mờ lơgar ndai gơguh pràn ngan tàm 2 nhai bồ nam là tài bơh bàr pe drà dờng neh sang tĕ broă lơh Zero Kovid. Ngui tŭ niam do, ală mpồl lơh sa kă bro bơh càr Gia Lai dê neh rơcăng lài phan bơna nàng drơng jơnau kờñ bơh drà kă bro dê. Tàm ală bơta phan tăc mờ lơgar ndai bơh càr Gia Lai dê, bơta phan tờm ngan là kơphê, kau su gơguh jơh bal bè khà phan mờ khà priă. Mìng is kơphê kung gam geh tus mờr 90% kờp jơh priă geh bơh tăc phan lơh geh bơh sươn sre mờ lơgar ndai. Bal mờ hơ̆, nam do, khà phan plai chi mờ ală phan bơna lơh bơh plai chi tăc uă mờ lơgar ndai kung gơguh mhar kơnờm bơh broă càr neh geh dờp rlau 150 mã tiah tam mờ anih ơn prăp tàm kơldung. Tàm hơ̆, ală bơta phan geh tăc mờ lơgar ndai uă là prìt mờ plai màk.