VOV4.K’ho - Tơngai pa do, càr Gia Lai sùm gơtìp ală dơ̆ bŭ dà sơnđàc ngan, cau gơtìp mìng tàm kơnòm bơsram. Bơta mùl màl do sồr anih lơh broă geh gơnoar, mpồl bơtiàn bal mờ cau tàm hìu nhă pal sền gròi rơlao tai tàm broă sền gàr mờ drơng gàr kơnòm dềt, tàm hơ̆ uă ngan là tàm dơ̆ rơlô bơkang.

Tàm hìu dềt geh lơh tàm ƀòn 2, xã Trà Đa, ƀòn dờng Pleiku, lŏ Nguyễn Thị Thanh Hương nggui sền gơlơh moăt ngan tềng gah hìu sền rùp kòn klao neh gơtìp chơ̆t tài bŭ dà tàm ƀòn Tây Hồ, xã Bàu Cạn, kơnhoàl Cư̆ Prông tàm ngai 14 nhai 6 pa do. Lŏ Hương yal, broă gơtìp do tài hìu nhă ờ hềt geh tơl priă nàng ai kòn in tus bơsram re dà mờ ală bơta ngăc ngar bè broă rơcang sơndră mờ bŭ dà. “Pa do cau tàm hìu geh ai kòn rê nhơl mờ mò, nhơl tàm hơ̆ den geh oh mi kòn mơi, bàr nă kung nhơl bal. Ngai 14 nhai 6 pa do lòt coh plai mờ ƀlàng coh plai ờ geh cau den tàng bàr nă kòn mù tus tàm tơnao dà nhơl, mơya gơtìp ntiar jơng mờ gơdùh tơn tàm tiah dà jrô tus 7 thơ̆k, den tàng bàr nă kòn ờ jai guh. Cau tàm hìu ờ geh tơl priă mờ kung ờ geh tơngai, pal lòt lơh broă sùm ngai kung bè mang den tàng ờ geh tơngai ai kòn lòt bơsram re dà, mìng nhơl gùt dar hìu”.

                     Uă hìu bơsram tàm càr Gia Lai neh bơyai lơh bơto re dà ai kơnòm bơsram in

Bŭ dà gam là bơta tờm lài ngan lơh gơtìp chơ̆t tus mờ kơnòm dềt bal mờ kơnòm pa tào, ơruh pơnu tàm càr Gia Lai dê, lời wơl nùs nhơm moăt jrùng tus mờ uă hìu nhă. Den tàng, broă tơnguh bơtàu mpồl bơsram rê dà bal mờ geh rơcang ală jơnau ngăc ngar tàm broă rơcang sơndră mờ bŭ dà ai kơnòm dềt in mờ mpồl bơtiàn là pal geh mhar ngan, kờñ ngan broă tus bal bơh ală kấp, ală gah lơh broă, cau tàm hìu nhă mờ gùt mpồl bơtiàn tus bal.

Bơh bồ nhai 6 nam 2022, Sở Văn hoá Thể thao mờ Zu lịc càr Gia Lai pơgồp bal mờ ală mpồl lơh broă gơrềng bal bơyai lơh sơn đờm ngai Olimpic kơnòm dềt mờ lam sồr gùt làng bol tus bal bơsram re dà, rơcang sơndră mờ bŭ dà. Ală kơnòm bơsram geh bơto bè jơnau git wă bal mờ lơh ală tơngu me: bơta git wă lơh tŭ gơtìp bŭ dà; ală kơrnoăt lơh tŭ gơtìp rềs àr chơ̆t jê; lơh tŭ gơtìp lơhan phan, khih phan sa... Oh Bạch Thị Mai Uyên, bơsram ơdŭ 8, hìu bơsram kấp 2 Nguyễn Du, ƀòn dờng Pleiku yal: ală broă lơh tàm kàl rơlô bơkang nam do geh kwơ màng ngan. Tàm hơ̆, re dà là môn ală kơnòm bơsram lơh ngan nàng bơsram niam: “Oh geh pơgru bal mờ ală bi, ală wa bơto tàm ală bơta gơtìp bè broă rơcang sơndră mờ bŭ dà, bơh tŭ hơ̆, oh kung git tàm broă mờng chài, jơnau git wă ai să tờm in, tŭ gơtìp ală bơta do tàm rài kis den oh git nàng rơcang sơndră nàng dong kờl ală cau kung bè să tờm in. Bơh kàl rơlô bơkang do, oh geh rơwah môn re dà là môn tòm ngan nàng tơnguh tàp pràn să jan. Oh kờñ yal ală cau in là pal bơsram re dà nàng tơnguh bơta pràn kơl dang să jan ai să tờm mờ rơcang sơndră mờ bŭ dà tàm ală bơta gơtìp jal mhar”.

Ồng Trần Ngọc Nhung, Kwang atbồ Sở Văn hoá, Thể thao mờ Zu lịc càr Gia Lai pà git, càr gam geh rơndăp broă chồl pràn broă gùt làng bol bơsram re dà, rơcang sơndră mờ bŭ dà. Jơnau kờñ tus nam 2025, geh tus 50% khà kơnòm dềt bơh 6 tus hờ đơm 16 sơnam git bơta niam ờ do ờ dă tàm dà. “Broă bơsram re dà gùt làng bol, tàm hơ̆ uă ngan gơwèt mờ kơnòm dềt là broă lơh geh kwơ mờ jal mhar ngan. Broă gơtìp bŭ dà tàm ală kơnòm dềt tàm tơngai do gùt lơgar bal mờ càr Gia Lai geh uă ngan. Gùt làng bol, ală mpồl lơh broă cíñ trị mpồl bơtiàn, ală tiah pal tơnguh jơnau git wă, geh kơnòl bơh să tờm mờ broă bơsram re dà ai ală kơnòm dềt, kơnòm pa tào mờ ơruh pơnu bal mờ gùt làng bol nàng tơmù ờ uă ngan broă gơtìp bŭ dà bơh làng bol kung bè kơnòm dềt”.

Bơh bồ nam tus tŭ do, gùt càr Gia Lai neh gơtìp 17 dơ̆ bŭ dà lơh 23 nă kơnòm dềt gơtìp chơ̆t. Ngan là bơh dơ̆ rơlô bơkang tus tŭ do neh pơn jăt sùm gơtìp 5 dơ̆ bŭ dà lơh 7 nă kơnòm dềt gơtìp chơ̆t. Geh uă cau gơtìp chơ̆t tài ờ git tàm bơta niam ờ do ờ dă tàm broă rơcang sơndră mờ bŭ dà mờ jòi is tàm tiah dà dờng, dà croh, ală tơnao dơng dà nàng nhơl mờ ờ geh broă sền gròi bơh cau dờng.

Nàng rơcang sơndră mờ rềs àr bŭ dà tàm kơnòm dềt cèng geh cồng nha uă, kờñ ngan broă tus bal bơh gùt mpồl bơtiàn, tơl hìu pal sền gròi rơlao tai tàm broă sền gàr mờ drơng gàr kơnòm dềt, tàm hơ̆ uă ngan là tàm dơ̆ rơlô bơkang nàng pleh mờ ală dơ̆ gơtìp rềs àr gơtìp mờ kơnòm dềt, tàm hơ̆ uă ngan là gơtìp rềs àr bŭ dà. Ồng Võ Như Minh Quang, Kwang atbồ anih sền gàr, drơng gàr kơnòm dềt mờ Ring bal cau klao mờ cau ùr gơwèt Sở Lao động-Thương binh mờ Xã hội càr Gia Lai pà git: “Pal dờp ngan là broă bơto jơnau git wă kis, jơnau git wă ai kơnòm dềt in kung gam uă bơta ờ pràn, broă ai môn re dà bơto tàm hìu bơsram kung ờ hềt geh lơh mờ lơh geh cồng nha, den tàng tŭ do broă gơtìp bŭ dà kung gam gơtìp sùm. Pal lơh ngan bè lơi ai broă lam sồr tus mờ tơl hìu, tus tơl gùt mpồl bơtiàn nàng tơnguh jơnau git wă bè broă sơndră mờ rềs àr chơ̆t jê mờ bŭ dà ai kơnòm dềt in. Ală broă lơh tuh dà, bơtơ̆t dơng dà, dà dờng, dà croh di gơlan lơh gơtìp chơ̆t uă den tàng pal geh tơlik jơnau cih yal lài. Tàm bơta gơtùi lơh, pal ai kơnòm dềt tus ală tơnao dà nàng kơnòm dềt geh nhơl, geh bơsram ală jơnau git wă tàm broă re dà nàng sền gàr să tờm”.

Mờ broă lơh ngan bơh ală gah, mpồl lơh broă geh gơnoar, geh chồl pràn tàm broă lam sồr mờ tơnguh broă bơto ală jơnau git wă, geh pơgồp bal kwơ màng tàm broă rơcang sơndră mờ bŭ dà ai kơnòm dềt in. bơdìh hơ̆ tai, kờñ ngan geh broă lam sền gròi, drơng gàr bơh ală cau mè, bèp, nàng pleh mờ gơtìp bŭ dà sơnđàc sơngit ngan.

Cau cih Hoàng Qui-Cau mblàng Ndong Brawl