VOV4.K’ho- Ngai 29/3, kơnhoàl Chư Sê, càr Gia Lai lam lơh ies, còp mờ tơp 2 ƀồc ntìng cau ling chơt màng (ờ hềt git mat sơnđan), geh jòi bàn tàm suơn bơh 1 hìu bơnhă dê gơ wèt thôn Phú Cường, xã Ia Pal. Tơnơ̆ tơ̆ còp, ies geh lơh tàm Ủy ƀan Ñân zân xã Ia Pal, dơ̆ bơyai lơh tơp 2 ƀồc ntìng cau ling chơt màng geh lơh tàm ƀlàng tơp ƀồc cau ling chơt màng kơnhoàl Chư Sê. Tàm nùs nhơm ki ngàm, kwang đơng lam bồ kâp ủy, gơnoar atbồ xã, mpồl ling mờ làng bol tàm kơnhoàl neh ơn guàng bơkàu, chu ñàng ai tơnggŏ nùs nhơm kah ưn ngài uă ngan gơ wèt tus bơta phi să dờng màng bơh ală cau ling chơt màng dê tus mờ broă lơh bơt bơtàu mờ sền gàr dà lơgar.

Lài hơ̆, ngai 26/3, Ủy ƀan Ñân zân xã Ia Pal dờp geh jơnau yal git gŏ 2 ƀồc ntìng tŭ hìu bơnhă cò tơnring ù tàm suơn tàm thôn Phú Cường, xã Ia Pal nàng lơh hìu. Tơnơ̆ tŭ klo yal, gah lơh broă geh gơnoar kơnhoàl Chư Sê neh tus tàm tiah jòi gŏ ƀồc ntìng, tờ geh 2 ƀồc ntìng. Tàm pơndrờm mờ ală jơnau yal bơh làng bol dê, phan lời wơl geh jòi bàn, bal mờ ală broă lơh mờng chài, anih lơh broă mờng chài pà git, do là ƀồc ntìng cau ling chơt màng phi să tàm dơ̆ tam lơh dră wơl bol sò tơm Mỹ tơngklàs dà lơgar; mờ kung lam lơh ai mẫu siñ phẩm ƀồc ntìng cau ling chơt màng dê nàng sền git ADN jat jơnau sồr.

Cau mblàng K’Duẩn