Drim ngai 28/7, Ƀan Jơi bơtiàn càr Gia Lai bơyai lơh Pơrjum tìp mat, jờng rơ cau geh bơngă pin dờn geh pơn rơ gơguh jak tàm tiah làng bol jơi bơtiàn dùl êt nă cau tàm càr Gia Lai tơngai bơh nam 2021 tus nam 2023. Gùt càr Gia Lai tŭ do geh 955 nă cau kra ƀòn, cau geh bơngă pin dờn geh pơn rơ gơguh jak tàm tiah làng bol jơi bơtiàn dùl êt nă cau. Tơnguh gơnoar broă, kơnòl broă gơ wèt mờ mpồl bơtiàn, cau geh bơngă pin dờn tàm càr Gia Lai neh ngui niam gơnoar broă he dê tàm broă hòi jà ƀòn lơgar lam lơh jat kơnòl broă bơtàu tơnguh lơh sa- mpồl bơtiàn, tus bal sền gàr lơngăp lơngai tàm ƀòn lơgar.

Mùl màl, tàm tơngai bơh nam 2021 tus nam 2023, ală cau geh bơngă pin dờn geh pơn rơ gơguh jak tàm càr Gia Lai neh sùm jơh nùs pơgồp bal mờ ală mpồl, gah broă lơh tàm kâp hơ đơm mblàng yal, hòi jà làng bol tus bal tă pơgồp, dong kờl jơh nùs ai srơh “Jơh gùt làng bol tam klac bal bơt bơtàu ƀòn lơgar pa, tiah drà gơguh jak” in mờ rlau 700 tơmàn đông, ai is rlau 132 rbô thơk vuông ù mờ tă pơgồp rlau 47 rbô ngai lơh broă. Bơdìh hơ̆ tai, cau geh bơngă pin dờn dong kờl rlau 20 rbô hìu bơnhă làng bol jơi bơtiàn dùl êt nă cau tam gơl mờng kwèng kơlôi sơnơng, broă lơh tàm lơh broă, lơh sa, brồ guh lik klàs rƀah. Càr Gia Lai kơp kờñ tàm tơngai tus, cau geh bơngă pin dờn pơn jat tai ngui niam rlau tai gơnoar broă, bơngă pin dờn he dê, hòi jà jơi nòi, mpồl bơtiàn tus bal bơtàu tơnguh lơh sa- mpồl bơtiàn, bơt bơtàu Đảng mờ ală anih lơh broă cíñ trị; sền gàr lơngăp lơngai, bơt bơtàu mpồl tam klac dờng ală jơi bơtiàn.