VOV4.K’ho- Drim ngai 14/06, tàm ƀòn dờng Pleiku, càr Gia Lai bơyai lơh Pơrjum jờng rơ cau pà mhàm dong kờl is nam 2022. Jăt Mpồl đơng lam hòi jà pà mhàm dong kờl is càr Gia Lai dê yal, bơh bồ nam 2021 tus tŭ do, càr neh lam lơh geh 125 dơ̆ pà mhàm dong kờl is, dờp geh mờr 24 rbô kơldung mhàm. Ală broă lơh dờng, bè “Lơh chờ Bồ sơnam pa dum bò”, “Ngai jơh gùt làng bol pà mhàm dong kờl is”, “Ală ntờc mhàm dum bò kàl rlô bơkang”, “Gùng lòt pơrhê”, gơhòi gơ jà gĭt nđờ rbô nă kwang bàng, kông cưk, viên cưk, đoàn viên ơruh pơnu mờ làng bol càr Gia Lai tus bal.

Bơh tŭ do tus lồi nam 2022, càr Gia Lai pơn jăt tai lơh ngan lơh sùm pah nhai bơyai lơh bơh 3 tus 4 dơ̆ pà mhàm dong kờl is, pơn jăt tai mblàng yal, lơh gơs ală mpồl pà mhàm dong kờl is, ală mpồl pà mhàm. Di tàm dơ̆ do, Ủy ƀan Ñân zân càr Gia Lai, Mpồl đơng lam hòi jà pà mhàm dong kờl is càr dê neh jờng rơ ală mpồl cau, cau dùl nă să mờ hìu bơnhă geh cồng nha jak ngan tàm srơh pà mhàm dong kờl is.

Cau mblàng Lơ Mu K’Yến