VOV4.K’ho- Tơngai do, sơmờm bơta ờ gĭt wă mờ rài kis kal ke bơh làng bol jơi bơtiàn kòn cau dùl êt nă cau tàm xã Chư Dang Ya, kơnhoàl Chư Păh, càr Gia Lai dê, bàr pe nă cau neh pơrlồm kơñau sră ngui ù. Mùl màl, uă dơ̆ broă mìng geh sền gŏ tŭ ală cau lơh ală sră tăc bro sră ngui ù ai cau dơ̆ pe in halà lơh sră nggal dan càn priă mờ ngân hàng, den tàng lời wơl jơnau aniai kal ke ngan bơsong.

Muh măt muăt jrùm ngan, bi Kưm deh nam 1978 ơm tàm ƀòn Xoá, xã Chư Dang Ya, kơnhoàl Chư Păh, càr Gia Lai pà gĭt, bi gam kơlôi rơcăng ngan tài rơngòt roh bă ù 5 sào kơphê tàm tê cau ndai dê. Bi Kưm yal, nam 2018, tài bơh gơjal ngan ir priă jền nàng lơh sa, ùr bơklau bi neh ai cau dùl ƀòn bal in là mò Vũ Thị Hằng apah ù tàm tơngai 10 nam mờ giă 100 tơlak đong. Tàm tơngai do, mò Hằng geh dờp ùr bơklau bi in kĭ bàr pe sră pơ àr nàng ring bal broă apah ù. Kư̆ tồn lah tơnơ̆ 10 nam geh tam wơl phan tàm bă ù do, mơya tus nhai 01/2022, tŭ kwang bàng lơh broă tàm Cơldŭ lơh broă lơh sră ù tiah kơnhoàl Chư Păh tus hờ hìu lùp sền, den bi hơ̆ sồng gĭt ù bơh he dê neh geh tăc ai mò Hằng in bơh nhai 08 nam 2020, tŭ do cau do gam lơh sră tăc mờ cau dơ̆ pe in. Bi Kưm muăt jrùm ngan yal: Kung kơlôi sơnơng sùm sơl jê bồ jê tơngoh ngan, kơlôi sơnơng sùm bĭc ờ gŏ lơhă ờ. Añ ai apah, mờ gơlik wơl tăc bro cih mat bơh mò hơ̆ dê, ờ gĭt là bè lơi tai. Khi sồr oh put, mè bèp lĭp tê, lơh wơl sră ngui ù mờ añ ờ gŏ gĭt ờ. Mò hơ̆ gam hơ jàu wơl sră ngui ù añ in. Dilah mò Hằng ờ jàu wơl sră ngui ù ai añ in den añ geh yă mò tus hờ xã.  

Ùr bơklau bi Kưm kơlôi rơcăng ngan tài bơh rơngòt roh ù 5 sàu

Tàm ƀòn Xóa, hìu bơnhă bi Chang deh nam 1981, kung kơlôi rơcăng ngan roh bă sươn ơnàng rlau 3 cuồng gam ơm kis. Jơnau là tài tàm nam 2020, hìu bơnhă bi neh jàu sră ngui ù, kơnờm mờ mò Hằng dong ƀà càn priă ngân hàng. Bơh tŭ hơ̆ tus tŭ do, hìu bơnhă bi Chang ờ hềt dờp geh priă càn, mờ sră ngui ù kung ờ gŏ bàn muh mat sơl. Pal tus dì lồi nhai 02 nam 2022, tŭ geh mpồl cau krơi tus hờ hìu lùp dồs 140 tơlak đong, den ùr bơklau bi hơ̆ sồng gĭt là sră ngui ù bơh he dê neh gơtìp mò Hằng càn priă sa priă cồng. Bi Chang muăt jrùm yal: Geh cau tus lùp dồs, mờ sồr añ pal tơm 140 tơlak đong hơ̆ den hơ̆ sồng geh ai wơl sră ngui ù. Añ đơs là añ ờ gŏ lèng càn priă jền do. Añ mŭt tàm hìu mò Hằng den mò Hằng đơs là mò Hằng kong, tài bơh Hằng ai, nàng jòi priă tơm wơl priă cau dê, hơ̆ sồng ai wơl sră ngui ù. Añ kơlôi rơcăng ngan bờh, sa ờ gơmŭt, bĭc ờ lơhă sơl. Añ pa yal mờ Kwang ătbồ thôn, ờ mờ hềt yal mờ gơnoar ătbồ tiah do in ờ.

Ùr bơklau bi Chang ơm tàm ƀòn Xóa, xã Chư Dang Ya, kơnhoàl Chư Păh 

Ồng Hoàng Anh Tuệ, Kwang ătbồ Cơldŭ lơh broă lơh sră ù tiah kơnhoàl Chư Păh, càr Gia Lai pà gĭt, tàm nam 2021, mò Vũ Thị Hằng neh uă dơ̆ lơh broă tăc bro sră ngui ù mờ ală ù do ndrờm ờ di mat cau tờm. Bồ nam 2022, mò Hằng lơh sùm tai ală sră nggal nàng dan càn priă mờ ngân hàng mờ tăc bro ală bă ù do ai cau dơ̆ pe in. Gŏ geh tềl tơngŏ ờ bè ờs, anih lơh broă bol añ dê neh lòt lùp 4 nă cau tàm xã Chư Dang Ya den jơh bal 4 hìu làng bol pà gĭt là ờ tăc ờ. Jăt ồng Hoàng Anh Tuệ yal, sền gŏ bơta do geh lơh gơrềng uă tus gơnoar kwơ bơh làng bol dê, den tàng anih lơh broă bol añ dê neh geh sră sồr Ủy ƀan Ñân zân ală xã pal tơnguh uă nùs nhơm geh kơnòl tàm broă dong kờl làng bol jơi bơtiàn kòn cau dùl êt nă cau lơh ală broă kă bro ù tiah. Ồng Hoàng Anh Tuệ, đơs: Gơwèt mờ ală xã tàm tiah jơi bơtiàn kòn cau dùl êt nă cau den kwang bàng kông cứk sền gàr adat boh lam xã pal tơnguh uă gơnoar broă, kơnòl broă. Tŭ lơh ală gơnoar ai làng bol in den sồr pal sền ai bàr đah in iăt, lùp geh tăc halà ờ, geh tŭ là pal tơngkah là do là tăc ù ai cau ndai in halà ờ. Cau kòn cau ờ wă wờng dà Yoan den pal geh kwang bàng kòn cau mblàng bơh dà Yoan tus dà kòn cau nàng cau tăc bro ù in gĭt geh.

Ồng Nguyễn Văn Nội, Củ tịc Ủy ƀan Ñân zân xã Chư Dang Ya, kơnhoàl Chư Păh pà gĭt, tŭ do, gơnoar ătbồ xã mờ ală mpồl cau tàm xã gam jơh nùs kờp sền, lùp broă lơh tăc bro ù tiah tàm xã tàm tơngai rềp ndo, mơkung pơgồp bal mblàng yal ai làng bol in rơcăng ngac rlau tàm tŭ lơh ală broă tăc bro bè ù tiah. Ồng Nguyễn Văn Nội, đơs: Tŭ gŏ broă do, den bol añ neh sồr kwang àng mờ anih lơh broă mpồl cau tus tơl hìu bơnhă tus tơn hờ ƀòn, hòi jà ală hìu bơnhă ờ gŏ di lời gơtìp cau pơrlồm bè hơ̆.         

Tơnơ̆ tŭ gĭt geh jơnau yal, tŭ do Ủy ƀan Ñân zân kơnhoàl Chư Păh, càr Gia Lai neh sồr ală mpồl lơh broă ơm ing ai lơh ală broă lơh tăc bro ù tiah nàng kwang àng kơnhoàl in tus lùp khàu, lơh loh làng ală dơ̆ broă tăc bro ù tiah ờ bè ờs gơrềng tus làng bol jơi bơtiàn kòn cau dùl êt nă cau tàm xã Chư Dang Ya.    

Cau cih Nguyễn Thảo- Cau mblàng Lơ Mu K’Yến