VOV4.K’ho - Drim òr (03/06), tàm ƀòn dờng Pleiku, UɃÑZ càr Gia Lai bơyai lơh lam sồr nhai lơh broă tài kơnòm dềt càr Gia Lai nam 2022.

Kwang bàng đơng lam UɃÑZ càr Gia Lai jào pà priă bơsram ai ală kơnòm bơsram geh rài kis gơtìp kal ke bơsram jăk in

Mờ tơngu me “Tus bal sền gàr kơnòm dềt, pal đơs sơndră mờ bơta sơgràm aniai, pù pờng kơnòm dềt” nhai lơh broă tài kơnòm dềt nam do tàm càr Gia Lai, geh bơyai lơh tus jơh ngai 30 nhai 6 nàng tơnguh broă git, bơta ngăc ngar bơh kơnòm dềt, cau tàm hìu nhă, mpồl bơtiàn bè broă tus bal sền gàr kơnòm dềt; di tŭ yal tơngit, yă ală broă lơh sơgràm aniai, pù pờng, rồn bơklơn kơnòm dềt lơh broă; bơyai lơh pờ ală ơdŭ bơto sồr kơnòm dềt bè bơta ngăc ngar kis, bơta ngăc ngar sền gàr is, rơcang sơndră mờ bơta sơgràm aniai, rềs àr chơ̆t jê mờ ală broă gơrềng bal. Bơdìh hơ̆ tai, nhai lơh broă tài kơnòm dềt tàm càr Gia Lai wèt tus broă gàr niam dơ̆ ơm rơlô bơkang ờ do ờ dă, niam mờ uă broă lơh bơsram tàp, chờ nhơl, pơrài bồ tơngoh; hòi jà ală mpồl lơh broă, ală cau, tus bal pơgồp bal bơta pràn tă kes priă ai kơnòm dềt geh rài kis kal ke, ờ pràn in.

Cau mblàng Ndong Brawl