VOV4.K’ho- Drà kă bro ƀañ Trung thu tàm Gia Lai kung neh hô hơng mờ ală gah phan geh rùp ƀañ mờ pơ àr niam lila, sền gơ kờñ ngan. Nam do, ală cau lơh bañ ràng tăc tàm drà kă bro uă bơta ƀañ bơh ƀañ bè ờs tus ƀañ kas priă jền, lơh geh jơnau kờñ bơh năc blơi dê.

Nam do, drà kă bro ƀañ Trung thu geh sơnđờm bơh gờñ. Bơh bồ nhai 7 nam he dê, uă mat kă bro ƀañ bè Kiñ đô, Yến sào Khánh Hòa, Richy... neh lơh ală anih ràng tăc ƀañ tàm ală gơl gùng tờm bơh ƀòn dờng Pleiku dê, gơ hòi gơ jà uă năc ngan. Pah nam, ală gah ƀañ blơi bơh lơgar Malaysia, Đài Loan geh ràng tăc bal tàm tiah ràng tăc ƀañ. Mơya nam do, uă anih ràng tăc ƀañ kờñ tăc ƀañ Trung thu lơh gơlik tàm lơgar lơm. Giă ƀañ Trung thu nam do geh pơgap bơh 280 rơbô đong tus 480 rơbô đong dùl hộp ƀañ bè ờs in, ƀañ kas priă jền geh giă bơh 560 rơbô đong tus 1 tơlak 700 rơbô đong.

Jat bi Bùi Thị Thúy Oanh – Anih ràng tăc phan Thúy Oanh, sơnah bòn Diên Hồng, ƀòn dờng Pleiku yal, bơdìh mờ ală bơta li la ngan bè mat kă bro den giă tăc ƀañ Trung thu nam do kung gơguh sơl tài bơh giă blơi phan lơh ƀañ gơguh rlau pơndrờm mờ tơl nam. Bi Bùi Thị Thúy Oanh, đơs: Jat tơl nă năc. Pơn yơu bè hộp ƀañ pà cau ndai in den giă krơi, ai ală gah ƀañ tăc rah rài den giă tăc krơi sơl, jat tơl ală ƀañ dê. Giă nam do den đơs bal là kas rlau dùl ết, geh ƀañ den dùl rơhiang nđờ mờ hộp ƀañ bàr pe rơhiang kung geh sơl.

Năc jòi blơi ƀañ Trung thu tàm ƀòn dờng Pleiku, càr Gia Lai

Bi Bùi Thị Lành, cau tờm anih ràng tăc ƀañ Trung thu Yến sào Khánh Hòa (ơm tàm sồ 127 gùng Phan Đình Phùng, ƀòn dờng Pleiku) pà gĭt, anih ràng tăc phan bi dê tăc 10 bơta ƀañ Trung thu mờ giă tam gơl tàm khà bơh 65 rơbô đong tus 110 rơbô đong dùl nơm, bơh 148 rơbô đong tus 657 rơbô đong dùl hộp ală bơta, hộp ƀañ lơh phan pà kas priă jền geh giă bơh 1 tơlak 200 rơbô đong tus 1 tơlak 700 rơbô đong. Kung jat bi Lành, gĭt loh jơnau kờñ bơh năc dê, nam do anih ràng tăc ƀañ bơh bi Lành dê geh tai bàr pe bơta ƀañ Trung thu pa nàng năc in sac rơwah. Bi Bùi Thị Lành, đơs: Nam do, ƀañ gah añ den geh tai 2 bơta pa, thập kẩm den geh tai bơta pa là phô mai, ai ƀañ lơbơn den geh tai bơta ƀô thồm cê.

Kụk Atbồ drà kă bro càr Gia Lai neh đơng lam ală Mpồl Atbồ drà kă bro sơlơ lòt sền phan lơh gơlik ƀañ Trung thu, tiah tờm lơh gơlik. Bal mờ hơ̆ lơh glài ală broă lơh tìs lơh gơlik ƀañ, kă bro phan ờ ngan, phan ờ tơl bơta niam, ờ loh tiah lơh gơlik, ờ gàr niam bơta ờdo ờdă phan ngui sa gơwèt mờ ală gah phan geh ngui sa tàm dơ̆ sa Tềp Trung thu. Ồng Lê Hồng Hà, Kwang atbồ Kụk Atbồ drà kă bro càr Gia Lai pà gĭt: Bơh tàm tơngai do tơn bol añ neh bơyai lơh ai broă lam lơh broă lòt sền, sền gròi geh gơrềng tus broă lơh Trung thu nam 2022 nàng kơryan bơta ƀañ Trung thu ờ loh tiah lơh gơlik lơh gơrềng tus ờdo ờdă phan ngui sa làng bol in. Mơkung sơlơ lòt sền gơwèt mờ jơh ală gah phan geh gơrềng tus phan bơna ngui sa đơs bal nàng di tŭ sền gŏ mờ lơh glài gơwèt mờ broă lơh lơh tìs mờ ală mpồl cau, cau dùl nă să is lơh broă kă bro tàm ù tiah càr dê nàng kờñ gàr niam bơta kwơ ai cau ngui sa in.

Cau cih Hoàng Qui- Cau mblàng K’Hạnh