Tài gơrềng bơh me mrềt dờng tàm dà lềng đah măt tơngai lik, ngai òr (24/09), tàm uă tiah tàm càr Gia Lai geh mìu dờng. Nàng tơmù bơta lơh aniai bơh dơ̆ tơrlah ù, gơbam dà di gơlan gơlik geh tài bơh mìu dờng, dà tih dà cò, ală tiah tàm càr Gia Lai, tàm hơ̆ uă ngan là ală kơnhoàl hờ đah măt tơngai lik, đah tô măt tơngai lik càr gam tơrgùm lơh jăt ală gùng dà broă lơh nàng rơcang sơndră.

Ală kơnhoàl hờ đah măt tơngai lik mờ đah tô măt tơngai lik càr Gia Lai di gơlan gơtìp uă dơ̆ gơbam dà, dà cò, tơrlah ù tàm tiah kơh bơnơm mờ lơh gơbam dà tàm tiah thòng là: kơnhoàl Kbang, Thị xã An Khê, kơnhoàl Dăk Đoa, kơnhoàl Mang Yang, kơnhoàl Ia Grai, kơnhoàl Chư Păh, ƀòn dờng Pleiku, kơnhoàl Chư Prông, kơnhoàl Đức Cơ, bơh ngai do tus ngai hìng, ală tiah do pơn jăt tai geh mìu di mơ, mìu sơr mờ càl, geh tiah mìu sơr ngan. Nàng rơcang sơndră mờ tơmù ờ uă ngan hoàc huơr, Mpồl đơng lam rơcang sơndră mờ rềs àr bơh trồ tiah mờ jòi dong klàs cau gơtìp rềs àr càr Gai Lai sồr ală mpồl lơh broă lơh jăt broă ai mpồl lam lài tus sền, sền wơl ală ƀòn ơm kis jăt gah dà dờng, croh dà, tiah thòng jrô nàng rơcang ntrờn làng bol tàm tiah di gơlan gơtìp uă gơbam dà, dà cò, tơrlah ù lik tàm tiah niam.