Bơh nam 2016 tus tŭ do, càr Gia Lai geh 257 rơndăp broă lơh geh pà sră cơng tàng cih măt, ai gùng dà bơcri priă, mờ khà priă cih tàm sră pơ àr rlau 78 rbô tơmàn đong. Ală rơndăp broă tơrgùm tàm uă broă tờm là lơh broă sa sươn sre brê bơnơm, năng lượng, lơh sa mờ măy mok, bơ̆t bơtàu, phan kwơ tàm ù...

Mơya bơta geh ngan, mìng geh 163 rơndăp broă lơh neh lòt mŭt lơh broă. 72 rơndăp broă lơh ờ hềt lơh. Tiah bơcri priă ờ hềt lơh gơkờñ tơngŏ loh bơh sơñio khà pràn jak tàm pơrlòng kâp càr PCI nam 2022 pa do, Gia Lai mìng ơm dơ̆ 45 tàm 63 càr, ƀòn dờng (gơmù 19 khà pơndrờm mờ nam 2021); ơm dơ̆ 4 tàm 5 càr Tây Nguyên. Nàng lơh niam wơl tiah bơcri priă, nhai 09 nam 2023, Ủy ƀan Ñân zân càr Gia Lai neh geh Broă rơndăp lơh bơsong, tơnguh uă sơñio khà pràn jak tàm pơrlòng kâp càr nam 2023 mờ ală nam pơn jăt tai. Jơnau kờñ lơh ngan tơnguh khà sơñio khà PCI kâp càr nam 2023 tàm mpồl 20 càr, ƀòn dờng jơnhoa điềm ngan rlau jơh.