VOV4.K’ho - Poh lài, tàm Tây Nguyên khà cau gơtìp kòp Kovid-19 sùm gơguh. Ală càr tàm tiah do neh gơdờp ndrờm bal tàm broă sơm kòp cau kòp in mờ bơyai lơh bơto bơsram. Bơta do geh dong kờl cau kòp ờ jroă geh nùs nhơm niam rơlao, tơmù gal ir tàm ală hìu sơnơm, mờ gàr niam ờ do ờ dă tàm broă bơto mờ bơsram.

Bơh broă xét nghiệm mhar tềng sơnah ƀòn Yên Thế, lŏ Bùi Thị Như Hoa, kis tàm sồ hìu 79, gùng Lê Văn Sỹ, ƀòn dờng Pleiku, càr Gia Lai cồng nha geh gŏ mờ virus Sars KoV-2.

                                 Cau gơtìp F0 tàm hìu tàm xã Diên Phú, ƀòn dờng Pleiku

Lŏ Hoa neh cit 3 ding sơnơm vaccine rơcang sơndră mờ kòp Kovid-19, ờ hềt geh tơngŏ bơsiă, duh să den tàng neh dan geh tam cah is, sơm kòp tàm hìu. Pah ngai, lŏ sền gàr is să jan, tơnguh uă bơta pràn rơcang sơndră mờ kòp, mờ was bơta duh să jan, pơyoa tus kwang bàng lơh sơnơm sơnah ƀòn in. bơh điện thoại, lŏ Hoa pà git, lŏ gơlơh sơm kòp is tàm hìu bè tŭ do niam ngan: “Pah ngai, añ pờ zalo lùp mờ kwang bàng lơh sơnơm. Añ ờ hềt tơngŏ bơta lơi, den tàng añ tơnguh uă bơta pràn rơcang sơndră mờ kòp bơh broă sào sa tơl phan bơkah, hùc uă dà plai kroăc, uă dà ngan, bơtơl dà điện giải, tơnguh bơta pràn rơcang sơndră mờ kòp. Añ sơm is kòp tàm hìu, di lah lòt tus hờ hìu sơnơm den ƀuơn ngan gơtờp bal, ha là gơguh jroă rơlao. Den tàng añ gŏ broă sơm is kòp tàm hìu kung niam ngan mờ di pal”.

                              Kwang bàng lơh sơnơm ai mẫu xét nghiệm kơnòm bơsram in

Bác sĩ Lê Thiện Thanh, Phó kwang atbồ Anih tờm gròi sền kòp tê jê să ƀòn dờng Pleiku pà git, bơh nggùl nhai 2 tus tŭ do, ƀòn dờng do neh ai rơlao 600 nă cau F0 ờ jroă sơm kòp tàm hìu. Tŭ do, mìng geh hờ đơm 1 bơnah 5 khà cau kòp tàm hìu, mìng là cau kra, cau geh kòp lài pal mŭt piam kòp tàm hìu sơnơm. Ồng Thanh pà git, tàm bơta ờ geh gal cau lơh sơnơm, ală hìu sơnơm xã, sơnah ƀòn gam ai tai kwang bàng pơgồp bal mờ ală mpồl Kovid-19 mpồl bơtìan tàm broă sền gròi cau kòp; gàr niam di tŭ broă sơm kòp, jun hờ hìu sơnơm di lah geh bơta tơngŏ jroă: “Mpồl lơh sơnơm tàm 1 sơnah ƀòn mìng geh bơh 5 tus 6 nă cau lơh sơnơm, lơh broă uă ngan, pah ngai pal hòi ală cau F0, bơsong ală cau kòp geh tơngŏ duh să, bơsiă, glar tă nhơm, den tàng bol añ kung gam crơng gơs geh 3 mpồl sơm kòp ntrờn, nàng rơcang lài tàm tiah lơi geh gal ir cau gơtìp kòp den tus lơh broă tàm dùl tơngai. Tŭ lơi ală hìu sơnơm geh niam den hơ̆ sồng rê, tam gơl tus hờ hìu sơnơm ndai”.

 Tàm ƀòn dờng Buôn Ma Thuột, càr Dăk Lăk, tềng đăp mờ bơta cau kòp F0 tàm hìu bơsram gơguh mhar, uă hìu bơsram mha lơh gơdờp bal, tam gơl broă bơto bơsram nơh broă bơto tơn tàm hìu bơsram tus mờ broă bơto tàm internet. Bal mờ ngui broă lơh “2 tàm 1”, geh bơto tơn mờ bơto tàm internet là broă lơh ngan nàng geh bơta ring niam nùs nhơm cau pơgru, kơnòm bơsram tềng đăp mờ bơta cau F0 tàm hìu bơsram gơguh uă.

Ơdŭ 9A hìu bơsram kấp 2 Lạc Long Quân, ƀòn dờng Buôn Ma Thuột bơsram tơn tàm ơdŭ bơsram mờ bơsram pờ tàm internet

Pa lòt bơsram tàm hìu bơsram mìng rơ̆p 1 poh, khà cau gơtìp kòp Kovid-19 gơguh mhar tàm kơnòm bơsram, UɃÑZ ƀòn dờng Buôn Ma Thuột geh jơnau sồr ală hìu bơsram mầm non, kấp 1 mờ kơnòm bơsram ơdŭ 6 tam gơl broă bơsram tơn tus mờ broă bơsram tàm internet. Hìu lŏ Trần Thị Đông, kis tàm sơnah ƀòn Tân Thành, ƀòn dờng Buôn Ma Thuột geh 2 nă kòn pal bơsram tàm internet tai. Lŏ Đông kờñ bal mờ gùng dà broă lơh di pal do. “Tŭ do kòp gơtờp bè do añ kờñ ngan broă bơsram tàm internet, mơya kung kơ̆p kờñ tus do tŭ kòp geh sền gròi den ală kơnòm geh lòt bơsram tài broă bơto bơh hìu bơsram geh niam rơlao, den cau mè bèp kơnòm bơsram geh iang nùs rơlao”.

Tềng đăp mờ khà cau gơtìp F0 ngai sơlơ uă tàm hìu bơsram, mìng tàm 1 poh, ƀòn dờng Buôn Ma Thuột neh dờp geh rơlao 40 nă cau gơtìp là cau pơgru mờ rơlao 430 nă là kơnòm bơsram. Phòng Giáo dục mờ Đào tạo ƀòn dờng do neh dan mờ UɃÑZ ƀòn dờng ai ơm ing broă tus lòt bơsram gơwèt mờ jơh ală mpồl ơdŭ, mìng geh ơdŭ 9 mờ ơdŭ 12 gam lòt bơsram bè ờs. Mơya, jăt jơnau sền gŏ, tàm mpồl ơdŭ 9 mờ ơdŭ 12 bơh uă hìu bơsram, ală jơnờng nggui bơsram ờ geh cau nggui sơlơ geh uă. Tŭ do, mpồl ơdŭ 9 bơh hìu bơsram kấp 2 Lạc Long Quân kung gam bơsram tơn mờ geh di pơgăp 50% khà kơnòm bơsram, khà kơnòm bơsram gam tai pal bơsram tàm internet. Hìu bơsram geh 38 nă cau F0 là cau pơgru, kơnòm bơsram. Ồng Phan Thanh Thuỷ, Kwang atbồ hìu bơsram kấp 2 Lạc Long Quân, ƀòn dờng Buôn Ma Thuột, càr Dăk Lăk pà git: “Geh uă ca F0 gơguh mhar tàm hìu bơsram là tàm ală hìu ơm bal, bol añ neh lùp mờ ală hìu ơm bal geh ròng kơnòm bơsram geh gơtìp cau F0 nàng sồr geh gùng dà broă yal mờ anih lơh broă geh gơnoar nàng rơcang sơndră ai ală kơnòm bơsram in iang nùs lòt bơstam”.

Jăt mò Mai Thị Hồng Hà, Kwang atbồ phòng Giáo dục mờ Đào tạo ƀòn dờng Buôn Ma Thuột, càr Dăk Lăk yal, kòp Kovid-19 tàm càr Dăk Lăk pơn jăt tai gơtìp kal ke mờ git nđờ rơbô nă cau gơtìp pah ngai. Tàm ală hìu bơsram, bŭ lah gơtìp cau kòp neh geh rơcang lài mơya khà cau F0 kung gơguh uă neh lơh gơtìp ờ niam uă ngan tus mờ nùs nhơm cau pơgru, kơnòm bơsram, cau mè bèp kơnòm bơsram. Rơcang sơndră mờ kòp Kovid-19, mờ bơto geh cồng nha, mờ gàr niam nùs nhơm cau kơnòm bơsram, cau mè bèp kơnòm bơsram, cau pơgru là là broă lơh lài ngan bơh ală hìu bơsram tŭ do dê. “Khà cau F0 ờ mìng tàm kơnòm bơsram mờ cau pơgru kung gơtìp sơl den tàng lơh gơrềng ờ niam tus mờ bơta niam broă bơto mờ bơsram, den bol añ kung bơto sồr ală hìu bơsram kờp cau gơtờp kòp, tàm hơ̆ uă ngan là tàm cau pơgru nàng dong kờl di tŭ, gah lơh broă do kung sền gròi nền nòn sră nggal đơng lam bơto sồr ală hìu bơsram lơh jăt niam broă bơto mờ bơsram, lơh gơs kơnòl nam bơsram 2021-2022”.

Cau mblàng Ndong Brawl