VOV4.K’ho- Kơnờm gờñ gròi sền gơtùi kòp Kovid-19, uă mpồl lơh sa kă bro tàm càr Gia Lai neh geh bơta niam nàng chồl pràn lơh sa, tơnguh khà tac hờ lơgar ndai phan bơh suơn sre. Bơta do pơgồp bơnah ai priă lơh geh bơh tac phan hờ lơgar ndai gùt càr gơguh mờr 39% pơndrờm mờ bal dùl tŭ nam lài, geh 368 tơlak dolar Mỹ. Do kung là bơnàng jă ƀuơn ngan nàng ală mpồl lơh sa kă bro tàm càr chồl mhar broă bơtàu tơnguh wơl, chồl pràn lơh sa kă bro, dong Gia Lai lơh geh ală jơnau kờñ lơh sa, mpồl bơtiàn bơh gùt nam 2022 dê..

Bơh bồ nam tus tŭ do, Kông ty Kổ phần lơh sa suơn sre kông nghệ kao Hưng Sơn, càr Gia Lai neh tac hờ lơgar ndai geh mờr 9 rbô tấn prìt, priă lơh geh 9 tơlak dolar Mỹ, jơh ală ndrờm tac hờ lơgar ndai jat sră hơ pơrgon. Ồng Lê Hoàng Linh, drơng broă rơndap broă lơh trang trại prìt bơh kông ty dê tàm xã Trang, kơnhoàl Đăk Đoa pà git, nàng drơng jơnau kờñ tac jat sră hơ pơrgon prìt, bơh tŭ crơng gơs, kông ty neh lơh sră dan mã tiah tam mờ anih ơn tàm kơldung. Kơnờm bơh hơ̆, tŭ prìt geh tơnhàu, broă tac hờ lơgar ndai kung geh tơn. Kơnờm tac hờ lơgar ndai ƀuơn ƀuài, tŭ do, kông ty neh ai geh broă lơh mờr 800 nă kông ñân in, tàm hơ̆ geh 80% là cau jơi bơtiàn kòn cau dùl êt nă cau tàm xã Trang mờ xã Hneng, kơnhoàl Đăk Đoa mờ priă nhai kờp bal bơh 6 tus 7 tơlak đông dùl nă cau dùl nhai: “Bơh tŭ tam, den neh dan mã tam tơn. Bè hơ̆ den tàng kông ty tam is, ơn tàm kơldung mờ tac tus lơgar ndai tơn. Tŭ geh pà mã tiah tam den geh gơnoar tac tus lơgar ndai, ờ duh pal geh mpồl lơh kòn gùng lơi, dong tơrmù priă lơh broă he dê. Jơnau kờñ bơh Kông ty dê là rề ơnàng drà kă bro hời rơ hời, geh tai drà kă bro pa, pleh bơta aniai tàm broă kă bro”.

Anih lơh gơlik, ơn tàm kơldung prìt tac hờ lơgar ndai tàm trang trại xã Trang, kơnhoàl Đăk Đoa bơh Kông ty Kổ phần lơh sa suơn sre kông nghệ kao Hưng Sơn dê

Kung lơh geh khà gơguh bơh tac hờ lơgar ndai jơnhua, 5 nhai do, Kông ty Kổ phần tac mờ blơi phan bơh lơgarndai Đồng Giao sơnĕ lơh broă càr Gia Lai neh tac hờ lơgar ndai rlau 15 rbô tấn phan bơna bơh plai màk, prìt sơ kò, pơ ò, khoah tương, biap, tơngời lơngồt tus drà kă bro lơgar Mỹ mờ câu Âu, priă lơh geh 40 tơlak dolar Mỹ, sơrlèt rlau 126% pơndrờm mờ bal dùl tŭ nam lài. Ồng Đinh Gia Nghĩa, Kwang atbồ sơnĕ lơh broă do pà git, gơtùi geh cồng nha do bơdìh mờ bơta rơcang lài bơh mpồl lơh sa kă bro dê gam kơnờm broă Cíñ phủ gròi sền gơtùi kòp Kovid-19, kông ñân geh cit sơnơm vaccine gờñ den tàng broă lơh sa ờ gơtìp aniai: “Tơnơ̆ tŭ kòp Kovid-19, mpồl lơh sa kă bro bol hi rơcang lài bơtàu tơnguh wơl lơh sa. Tŭ do, bol hi tơrgùm bơcri priă tàm măi mok, ngan là măi mok lơh gơlik uă, bơh hơ̆ tơnguh bơta niam phan lơh gơs, mut tàm drà kă bro lơgar Mỹ mờ Mpồl tam klac câu Âu. Bol hi kung lơh broă bal mờ cau lơh broă sa nàng gàr niam tiah tam phan kơ̆ kơljap jŏ jòng sùm, bơtàu tơnguh, gàr tơl jơnau kờñ ai hìu măi in gàr sùm broă lơh sa”.

Tŭ do, hìu măi lơh gơlik, ơn tàm kơldung plai chi ris mờ plai chi ơn mrềt IQF bơh Kông ty Kổ phần Hoàng Anh Gia Lai dê gam geh git nđờ jơt anih prap gàr, lơh gơlik biap, plai chi dềt bal mờ bơta pràn lơh geh mờr 100 rbô tấn phan pah nam mờ neh geh uă mpồl lơh sa kă bro cih mat lòt sền nàng bơcri riă ală rơndap broă lơh tam, lơh gơlik, tac hờ lơgar ndai biap, plai chi. Do là bơta niam nàng ală mpồl lơh sa kă bro chồl pràn tac hờ lơgar ndai, tàm hơ̆ geh drà kă bro EU.

Anih prap ơn lơh mrềt prap prìt lài mờ tŭ tac hờ lơgar ndai tàm Kông ty Kổ phần lơh sa suơn sre kông nghệ kao Hưng Sơn

Ồng Phạm Văn Binh, Kwang atbồ Sở Kông thương càr Gia Lai pà git, tac hờ lơgar ndai phan lơh gơs bơh suơn sre tàm càr gam geh uă bơta gơguh niam. Gùt càr tŭ do geh rlau 30 mpồl lơh sa kă bro tac phan hờ lơgar ndai phan bơh suơn sre, tac tus 40 lơgar tàm gùt dunia. Tàm hơ̆, ală lơgar gơ wèt Mpồl tam klac câu Âu geh mờr 40%. Bơdìh mờ ală mpồl lơh sa kă bro kơphe, kau su, tiêu, plai màk, neh geh uă mờng chài, neh geh uă mpồl lơh sa kă bro pa crơng gơs mơya neh lơh geh cồng nha niam ngan tài bơh broă lơh geh rơndap sap sèng niam. Ală mpồl lơh sa kă bro do neh geh cih mat 55 mã tiah tam mờ 21 anih ơn tàm kơldung ală phan lơh gơs bơh prìt, pơ nat, thañ long tac tàm drà kă bro ală lơgar Lo, Nhờk, Hàn Quôk. Jat ồng Phạm Văn Binh, tơngai tus, gah kông thương geh pơn jat tai lam lơh uă broă lơh lòt bal mờ mpồl lơh sa kă bro, tơnguh broă lơh tac hờ lơgar ndai phan bơh suơn sre tàm càr: “Tờm ngan là broă lơh atbồ dà lơgar, bol hi pơgồp bal mờ Kụk hòi jà kă bro mờ Kụk tac blơi phan bơh lơgar ndai - Ƀộ Kông thương nàng yal tơnggit drà kă bro mờ càr Gia Lai gơtùi tac phan lơh gơs nàng ală mpồl lơh sa kă bro in mut tàm hơ̆. Gơ wèt mờ mpồl lơh sa kă bro den khi lòt bal nàng gàr drà kă bro mờ rề ơnàng drà kă bro. Bồ nam pa do, càr Gia Lai kung bơyai lơh tìp mat ală đại sứ quán, lãñ sự quán, tìp mat Việt Nam- Nhờk, tìp mat Việt Nam- Hàn Quôk, rề ơnàng gùng dà pa ai broă lơh tac phan hờ lơgar ndai bơh càr Gia Lai dê tàm tơngai tus”.

Broă lơh gơlik bơh sơn rờp prìt sơ kò lài mờ tŭ lơh gơlik phan tac hờ lơgar ndai tàm Kông ty Kổ phần tac blơi phan hờ lơgar ndai Đồng Giao sơnĕ càr Gia Lai

Tŭ do, priă lơh geh bơh gah lơh sa suơn sre pah nam tàm càr Gia Lai geh mờr 32 rbô tơmàn đông, geh 65% tàm kờp jơh priă lơh geh 49 rbô tơmàn đông bơh gùt gah lơh sa tàm càr dê. Bè hơ̆ den tàng, broă tơnguh tac hờ lơgar ndai phan lơh gơs bơh suơn sre dong chồl pràn gơguh lơh sa, mờ kung tơnguh niam rài kis làng bol.

Nàng tơnguh priă jền lơh geh mờ tơrmù hoàc huơr tàm broă lơh sa suơn sre, càr Gia Lai gam lơh ngan hòi jà ală mpồl lơh sa kă bro bơcri priă tàm gah lơh sa mờ măi mok lơh gơlik phan bơh suơn sre, bơt bơtàu ală tiah tam phan suơn sre pa bè plai chi, biap, kơnuh, bùm blàng, phe... Tàm hơ̆ hòi jà lài ală mpồl lơh sa kă bro lơh broă bal nền nòn bơh broă lơh gơlik, tac phan lơh gơs. Bơh hơ̆, crơng gơs ală mpồl lơh sa kă bro lam lài, tơnguh kông nghệ lơh gơlik bơh ròt mpồl lơh bal dê, tơnguh phan lơh gơs bơh suơn sre.

Cau mblàng K’Duẩn