VOV4.K’ho- Ồng Nguyễn Văn Độ, Củ tịc Ủy ƀan Ñân zân xã Ia Me, kơnhoàl Chư Prông, càr Gia Lai pà gĭt, tàm mang ngai 25/08, mpồl lơh broă neh tus lùp còp, pơndờm pơnđiang mờ dong kờl hìu bơnhă 2 nă cau chơ̆t tài bơh gơtìp kơnàs còng.

Kwang đơng lam bồ Ủy ƀan Ñân zân xã Ia Me tus pơndờm pơnđiang, lùp còp  hìu bơnhă cau geh cau chơ̆t tài bơh kơnàs còng

Lài hơ̆, ngai 25/08, dùl mpồl 4 nă ơruh pơnu ơm tàm ƀòn Xom, xã Ia Me, tàm hơ̆ geh: bi Kpă Tuyên (deh nam 1985), Siu Béo (deh nam 1992), Rơ Mah Đuôm (deh nam 1983), Rơ Mah Hoang (deh nam 1998) lòt lơh broă tàm mìr tàm tiah dà croh gơwèt ƀòn Đê Sơ, xã Ia Me. Tus pơgap 2 jiơ 30 phuk mho dùl ngai bal, trồ mìu dờng den jơh bal 4 nă cau do ntoăt mŭt tàm rơnŭ nàng dòp mìu. Tŭ do, nisơna kơnàs còng tàm tiah rơnŭ lơh bi Kơpă Tuyên mờ Siu Béo chơ̆t, Đuôm mờ Hoang bơtoah ngan ờ gơtìp sồt să lơi. Dờp geh jơnau yal, mpồl lơh broă geh gơnoar neh tus tàm mìr jun ƀồc 2 nă cau do rê tơ̆p mơkung geh broă lơh dong kờl. Geh gĭt, hìu bơnhă 2 nă cau chơ̆t do ndrờm geh rài kis kal ke.

Cau mblàng K’Hạnh