Jơnau yal pơyoa tus Mpồl jat sền đơs loh: tŭ do, càr Gia Lai geh rơndap ù tiah 88 rơndăp broă lơh năng lượng lơh gơlik wơl mờ kờp jơh bơta pràn lơh geh rlau 4 tơlak 347 rơbô MW, tàm hơ̆ geh: 60 rơndap broă lơh Hìu măy pờ tơlik ồs đèng, 9 rơndăp broă lơh ồs đèng mat tơngai, 17 rơndăp broă lơh đèng càl, bơdìh hơ̆ gam geh rlau 3 rơbô 200 ală ồs đèng mat tơngai ơn tềng hơđang rơkàng hìu.

Càr dan mờ Thủ tướng Cíñ phủ, Ƀộ Kông thương mờ ală Ƀộ, ngàñ geh gơrềng sền sơ wì, ai tơmŭt tàm rơndap ù tiah lơh uă ồs đèng dà lơgar tơngai bơh nam 2021- 2030 gơwèt mờ 135 ală rơndăp broă lơh năng lượng lơh gơlik wơl mờ gùng che ồs đèng ngui geh bơta pràn, mờ kờp jơh bơta pràn lơh gơlik pơgap 15 rơbô 566 MW nàng kờñ hòi tơrgùm ală priă jền nàng lơh uă mờ bơta pràn ngai sơlơ uă. Càr Gia Lai kung dan mờ Quôk sồr lơh mờ ai lơh jat Adat bè năng lượng lơh gơlik wơl; dan mờ Cíñ phủ bal mờ ală ƀộ, ngàñ gờñ lơh jat jơnau sồr bè atbồ, lơh ală rơndăp broă lơh ồs đèng jal mhar gơwèt rơndăp ù tiah lơh uă ồs đèng nàng lơh bơnàng jă lam lơh jat, pơgồp bơnah kơ̆ kơljap lơngap lơngai cíñ trị, rơndăp tăp sèng lơngap lơngai mpồl bơtiàn tàm ù tiah càr dê.