Jat jơnau yal bơh kwang đơng lam bồ Ủy ƀan Ñân zân càr Gia Lai dê, nam 2023, càr lơh geh 14 tàm 21 broă jàu bè lơh sa- mpồl bơtiàn, broă lam lơh ală broă lơh gàr lơngăp lơngai rài kis mpồl bơtiàn gơ wèt mờ cau geh màng mờ dà lơgar, hìu bơnhă geh sră dong kờl bơh dà lơgar geh gàr niam, lơngăp lơngai tiah nhàr dà lơgar geh gàr kơ̆, rơndap tap sèng ring lơngai mpồl bơtiàn kơ̆ kơljap. Bulah bè hơ̆, càr gam 7 broă jàu ờ hềt lơh gơtùi jat broă rơndap lơh, khà gơguh lơh sa ờ hềt geh bè bơta kơp kơnờm, broă lơh gơ hòi gơ jà bơcri priă gơtìp uă kal ke, bàr, pe bơta kòl yan tàm broă lơh rơndap ù tiah, tơm priă, ai ù lơh rơndap broă, ù tuh tơnring, broă lam lơh ală broă lơh jơnau kờñ dà lơgar gam lơyài.

Nàng gơtùi lơh gơs ală kơnòl broă lơh sa – mpồl bơtiàn tàm nam 2024, càr Gia Lai dan Cíñ phủ mờ ală ƀộ, gah broă lơh dong kờl bơsong ală kòl yan bè uă gah broă bè: tam gơl broă jàu ngui ù tus nam 2025 dipal mờ bơta geh ngan càr dê; lơh ală khà ai tơlik bè lơh sa – kỹ thuật, broă drơng ala broă lơh dà lơgar tàm ngui kes priă dà lơgar gah lơh sơnơm, tă bơsong kòl yan tàm lam lơh broă lơh jơnau kờñ dà lơgar; ai lam lơh gùng rơndeh ntoat mhar Pleiku- Quy Nhơn jat broă lơh bơcri priă dà lơgar… Tàm gah năng lượng lơh geh wơl, ồng Phạm Văn Binh, Kwang atbồ Sở Kông thương càr Gia Lai đơs bơta geh ngan: “Gia Lai geh bơta pràn lơh gơlik 3000 MWp, mơya bơta pràn pờ tơlik mìng geh 30 MWp, den tàng lơh gơlik 10 bơnah, mìng ngui geh 1 bơnah tàm gùng che đèng dà lơgar. Nam 2020 mờ nam 2021, càr kung lam lơh dồ ròt 17 rơndap broă lơh năng lượng lơh geh wơl mờ kờp jơh bơta pràn 1.200 MWp. Bulah bè hơ̆, pa do, rơndap ù tiah ồs đèng sồ 8 mìng geh 604 MWp ai tơngai bơh nam 2021 tus nam 2030 in. Den tàng, pơn drờm mờ bơta pràn càr dê den lơyah ngan, kờñ geh bơta sền gròi uă rlau tai bơh dà lơgar”.

Tàm dơ̆ lơh broă, ala mat Ƀộ Giao thông Vận tải, Ƀộ Tài cíñ, Ƀộ Kông thương, Ƀộ Kế hoạc mờ Đầu tư, Ƀộ Ngoại giao, Ủy ƀan Jơi bơtiàn… kung neh mblàng lơh loh 2, 3 jơnau sồr, jơnau dan bơh càr dê gơ wèt gơnăp gơnoar atbồ; mờ kung cih dờp gơ wèt mờ ală tơngume sơrlèt rlau gơnăp gơnoar nàng tơr gùm wơl, yal Cíñ phủ gờñ sền sơ wì, bơsong càr in.

Đơs pơn dut dơ̆ lơh broă, Ƀộ trưởng ồng Bùi Thanh Sơn đơs loh: nam 2024, Cíñ phủ ai tơlik broă rơndap lơh “Tam klac lơh jat kơrnuat, bồ tơngoh ngac ngar, tam gơl pa bơceh lơh, di tŭ, geh cồng nha”. Bơh bơta geh ngan càr dê, sồr càr ngui, lam lơh ngan ngồn gơs broă rơndap lơh, lam lơh jat mùl màl. Jat hơ̆, càr pal tơrgùm lam lơh kràñ cê Nghị quyết sồ 23 bơh Ƀộ Cíñ trị dê, lam lơh rơndap ù tiah càr Gia Lai tơngai bơh nam 2021 tus nam 2030; kơlôi sơnơng jơnau sồr gùng dà broă lơh krơi is tiah Tây Nguyên; lam lơh di tŭ ală broă lơh jơnau kờñ dà lơgar; tơrgùm tam gơl wơl sră pơ àr gơnoar atbồ, dong kờl mpồl lơh sa kă bro tàm broă lơh sa kă bro. Ƀộ trưởng ồng Bùi Thanh Sơn đơs nền: “Añ sồr 3 broă pal lơh, là: lam lơh jat kràñ cê ală sră nggal sồr lơh bơh Đảng dà lơgar, Quôk hội, Cíñ phủ dê lam lơh ring bal, geh cồng nha broă rơndap lơh bơtàu tơnguh lơh sa- mpồl bơtiàn mờ broă rơndap lơh 5 nam. Tàm hơ̆, sền gròi uă tus 3 bơta tam gơl pràn mờ 6 kơnòl broă tờm, 12 mpồl broă lơh tờm ngan bơh Cíñ phủ dê ai tơlik; gàr niam lơngăp lơngai cíñ trị, rơndap tap sèng ring lơngai mpồl bơtiàn tàm càr, bơt bơtàu rài lơh sa lơh tờm is gơ jat bal mờ mut gơ rờm bal dunia jrô ơnàng, ngan ngồn, geh cồng nha. Mờ dơ̆ 3 là sơlơ lơh jat jơnau pal jat, tơnguh cồng nha lơh jat ală sră nggal kơrnuat boh lam, Nghị quyết bơh Quôk hội dê”.

Ƀộ trưởng sồr, nam 2024, càr Gia Lai pal lơh jat ală broă lơh, broă rơndap lơh bơh Cíñ phủ dê mờ jơnau đơs lơh broă “Jơnau pal jat geh kơnòl, rơcang lài, di tŭ, tơnguh mhar bơceh lơh mờ lơh geh cồng nha kơ̆ kơljap”, mờ kung git nền do là nam “jal mhar” tàm broă lam lơh broă rơndap lơh bơtàu tơnguh lơh sa – mpồl bơtiàn 5 nam nàng tơrgùm đơng lam bồ, sồr lơh.

Bơdìh mờ đơs tus ală kơnòl broă tờm mờ càr Gia Lai pal tơrgùm lam lơh, Ƀộ trưởng ồng Bùi Thanh Sơn kung sồr ală ƀộ, gah broă lơh, anih lơh broă dà lơgar geh gơ rềng pơn jat tai sền gròi, lơh jat ală jơnau sồr, jơnau dan bơh càr dê nàng tơrgùm tă bơsong, mờ kung geh jơnau pơlam ngan ngồn nàng càr lam lơh geh cồng nha 3 broă lơh jơnau kờñ dà lơgar, bơtàu tơnguh kơ̆ kơljap năng lượng lơh geh wơl, lơh mờ măi mok lơh gơlik phan, lơh sa suơn sre ngui măi mok pa, sơlơ tơnguh kă bro tiah nhàr dà lơgar, lòt nhơl… kung bè dong kờl kơlôi sơnơng 2, 3 gùng dà, broă lơh krơi is nàng bơtàu tơnguh tiah Tây Nguyên, tàm hơ̆ geh càr Gia Lai.