VOV4.K’ho- Drim ngai 08/3, Ƀan Cấp hàñ Đảng ƀộ càr Gia Lai neh bơyai lơh pơrjum bè broă lơh kwang bàng. Jat Kơrnuat bơh Ƀan Thường vụ Tỉñ ủy Gia Lai dê bè broă tàm pơdar, tơn pồ kwang bàng, ồng Dương Minh Đức, Tỉñ ủy viên, Phó Củ ñiệm Thường trựk Ủy ƀan sền sơ wì Tỉñ ủy geh tơn pồ lơh Kwang atbồ Cơldŭ lơh broă Tỉñ ủy. Tơngai at gơnoar broă do là 5 nam, kờp bơh ngai 01/3/2022.

Jàu kơrnuat, Ƀí thư Tỉñ ủy ồng Hồ Văn Niên pin dờn, tàm gơnoar broă pa, ồng Dương Minh Đức geh pơn jat tai tơnguh pràn jak, geh kơnòl mờ broă lơh nàng bal mờ mpồl kwang đơng lam bồ, kwang bàng, kông cứk Cơldŭ lơh broă Tỉñ ủy tam klac bal, ring bal; lơh niam broă lơh ai tơlik jơnau đơs dong Thường trựk Tỉñ ủy, Ƀan Thường vụ Tỉñ ủy tàm broă lơh đơng lam, pơlam, lam lơh ală kơnòl broă cíñ trị bơh càr dê.

Kung tàm broă lơh pơrjum drim ngai 08/3 dê, Ƀan Cấp hàñ Đảng ƀộ càr Gia Lai neh đùh sră ring bal sră yal tơnggit kwang bàng pồ bơ tơl Ủy viên Ủy ƀan sền sơ wì Tỉñ ủy tơngai lơh broă bơh nam 2020 tus nam 2025 mờ tam gơl rơndap sap sèng Ƀan Cấp hàñ Đảng ƀộ càr tơngai lơh broă bơh nam 2020 tus nam 2025.

Cau mblàng K’Duẩn