Tơnơ̆ mờr 1 nam lam lơh, mơya Rơndap broă lơh gùng Nguyễn Chí Thanh, gơl bơh gùng Trường Chinh tus gùng Lê Duẩn, ƀòn dờng Pleiku mìng rơp pa ai geh 1 tơmàn 500 tơlak đông tàm kờp jơh priă bơcri geh tam pà là 185 tơmàn đông, geh 3,6%. Kung tàm Pleiku sơl, rơndap broă lơh gùng Nguyễn Văn Linh mìng rơp pa ai geh mờr 27% tàm kờp jơh priă bơcri 100 tơmàn đông bơh nam dê. Ai rơndap broă lơh gùng kềng lơh sa tiah đah mat tơngai lik (gùng pleh gùng dờng 19)- rơndap broă lơh kuơmàng bơh càr dê, geh priă bơcri 1 rbô 200 tơmàn đông, kung mìng rơp pa ai geh 3,6%.

Jơh bal 3 rơndap broă lơh do ndrờm gơtìp lơyài, tài geh bal dùl jơnau là ờ hềt lơh gơs broă ai ù lơh rơndap broă, ờ hềt jàu ai mpồl lơh rơndap broă in. Ồng Phan Việt Tân, Phó Kwang atbồ cơldŭ atbồ rơndap broă lơh lơh sa suơn sre, gơ wèt Mpồl atbồ bơcri priă bơt bơtàu càr Gia Lai pà git, jat jơnau cih bơh Adat bơcri priă dà lơgar dê, broă git nền giă ù nàng ai ù lơh rơndap broă pal geh uă bơnah, den tàng lơh gơbàn bơta lơyàu: “Tŭ do kung gam kơp ai ù lơh rơndap broă. Uă ngan ală tiah (geh kơnhoàl Đăk Đoa mờ ƀòn dờng Pleiku) ndrờm neh lơh gơs broă lơh kờp sền tàm bă ù gơ rềng bơh rơndap broă lơh dê. Mơya tŭ do, gam gơ kòl tàm broă git nền giă ù mùl màl, den tàng pal sồr mpồl pơlam git nền nàng Sở Tài nguyên Môi trường in ring bal. Tơnơ̆ tŭ mpồl lơh rơndap broă lơh sir den gơtùi ai priă bơcri lơh tai broă. Mơya tus tŭ do den ờ lơh geh jat broă rơndap lơh ai tơlik”.

Bơdìh mờ jơnau gơ kòl tàm broă ai ù lơh rơndap broă den bơta ờ tơl ù bồr kung lơh uă rơndap broă lơh tàm càr Gia Lai gơtìp lơyài tơngai lam lơh neh hơ pơrgon. Mùl màl, tàm càr Gia Lai geh 4 bă ù cò tơnring, bồr geh ai gơnoar tờ mờ 5 bă bơtô lŭ geh ai gơnoar tơnhàu phan kuơ tàm ù gơ jat bal. Mơya uă ngan ală bă do ndrờm ơm ngài ală broă lơh kờñ pal geh khà ù bồr uă. Tàm uă nhai do, càr Gia Lai neh ai tàm pơrlòng giă, ring bal, lơh sră ai gơnoar ală bă ù, lŭ nàng drơng ală rơndap broă lơh in, mơya tus tŭ do, bơta do kung ờ hềt geh bơsong jơh sơl. Ồng Nguyễn Văn Quảng- ala mat mpồl lam lơh rơndap broă Kông ty kổ phần lơh broă lơh 510, drơng bơnah broă sồ 7, Rơndap broă lơh Gùng kềng lơh sa tiah đah mat tơngai lik đơs bơta kal ke bơh mpồl dê tŭ lơh rơndap broă: “Bơnah broă sồ 7 geh 3 rbàng mờ 1,5 kơi sồ gùng, tus tŭ do mìng rơp lơh geh 1 bơnàng rbàng M2 tàm Biển Hồ là gơtùi lơh. Tàm 1,7 kơi sồ gùng den cau tờm bơcri priă pa rơp jàu 500 thơk gùng, cau lơh rơndap broă kung gam lam lơh, mơya ờ hềt geh bă ù geh sồr ai nàng bơ tơl ù bồr. Kờñ tơnguh mhar tơngai lam lơh den bơta kuơmàng ngan rlau jơh là pal geh ù bồr”.

Bơta pal đơs tàm Gia Lai là jơh bal tàm 2, 3 rơndap broă lơh gàr tơngai hơ pơrgon, kung gơtìp kal ke tàm broă ai priă bơcri, tài càr ờ tơl priă. Do là bơta geh ngan tàm ală rơndap broă lơh ngui priă bơcri bơh priă ngui ù mờ ai ơpah ù, tŭ bơh nam 2022 tus tŭ do, drà kă bro ù tiah hìu đam ờ duh hồl, càr gơtìp gơmù priă ai bơh broă do. Ồng Trương Hải Long, Củ tịc Ủy ƀan Ñân zân càr Gia Lai pà git, ală sở, gah broă lơh, ală tiah tàm càr gam jal mhar jòi broă lơh tă bơsong kal ke: “Sở Kế hoạc mờ Đầu tư là anih duh broă sùm ai 3 mpồl lơh broă jal mhar yal mờ kâp geh gơnoar in tam pà ală bơnah priă bơcri gam wơl; lơh gơs ală sră nggal bơcri priă, tơnguh mhar tơngai ai ù lơh rơndap broă mờ rơndap ƀòn ơm kis pa. Sở Kế hoạc mờ Đầu tư đơng lam, pơgồp bal mờ ală cau tờm bơcri priă, sở, gah broă lơh, ală tiah tơrgùm tă bơsong ală kal ke tàm broă lam lơh ală broă lơh bơtàu tơnguh wơl, bơtàu tơnguh lơh sa- mpồl bơtiàn mờ 3 broă lơh jơnau kờñ dà lơgar. Rơcang lài ală tơngume tă pơgồp jơnau đơs ai Ủy ƀan Ñân zân càr in nàng bơyai lơh pơrjum sền sơ wì tă bơsong ală kòl yan lài mờ ngai 20/9/2023”.