Tŭ do, tàm 7 xã bơh 3 kơnhoàl tiah nhàr dà lơgar càr Gia Lai dê neh bơt bơtàu tiah rơcang gàr kơ̆ kơljap tàm 49 thôn, ƀòn mờ kờp jơh khà làng bol ơm kis tàm tiah nhàr dà lơgar là rlau 11 rbô 700 hìu bơnhă. Tàm do, Tỉñ ủy, Ủy ƀan Ñân zân càr Gia Lai neh sồr ală sở, mpồl, gah broă lơh, gơnoar atbồ kâp hơ đơm pơgồp bal mờ mpồl ling sền gàr tiah nhàr dà lơgar lam lơh dờp lơh oh mi, dong kờl ală thôn, ƀòn lam lơh uă broă lơh bè “Hìu ơm tiah nhàr dà lơgar”, hìu ơm ai làng bol tiah nhàr dà lơgar, bồt dà lềng in; kơn rồ sơntìl ai cau rƀah in; Lòt bal mờ cau ùr tiah nhàr dà lơgar,… Kwang bàng, cau ling sền gàr tiah nhàr dà lơgar tă pơgồp priă nhai mờ kờp jơh khà priă git nđờ rhiang tơlak đông pah nam nàng lam lơh broă lơh “Dong oh tus hìu bơsram – Kòn ròng ling sền gàr tiah nhàr dà lơgar”. Bơh hơ̆, dờp ròng 52 nă kơnòm bơsram tiah nhàr dà lơgar, geh rài kis kal ke geh lòt bơsram bơh ơdŭ 1 tus ơdŭ 12, bơto sră ai git nđờ rhiăng nă sau dềt tiah sar lơgar ngài in. Mò Ksor H’Lâm, xã tiah nhàr dà lơgar Ia Mơr, kơnhoàl Chư Prông pà git: “Gơ wèt mờ làng bol tiah nhàr dà lơgar bè bol hi, den tiah nhàr dà lơgar neh là hìu bloh. Tơl broă dềt bè lơh hìu, rồ ù, lơh niam ƀlàng sre, ling sền gàr tiah nhàr dà lơgar tŭ lơi kung rơcang dong kờl; geh broă lơi tam lah kung sồr ling sền gàr tiah nhàr dà lơgar tus tơrña gơ rờm bal, kòp jê kung kơnờm tàm cau ling sền gàr tiah nhàr dà lơgar sơl”.

Bal mờ hơ̆, mpồl ling sền gàr tiah nhàr dà lơgar bal mờ gơnoar atbồ tàm ƀòn lơgar kung pơgồp bal lam lơh niam ală srơh dong làng bol bơtàu tơnguh lơh sa, tơn jơh jơgloh tơrmù rƀah, tam gơl mờng kwèng kơlôi sơnơng, broă lơh tàm lơh sa. Bơta do dong bơtàu tơnguh lơh sa mpồl bơtiàn tàm tiah nhàr dà lơgar, lơh gơlik bơta ring bal bơh làng bol mờ gơnoar atbồ tàm ƀòn lơgar dê tàm broă pơgồp bal sền gàr lơngăp lơngai tiah nhàr dà lơgar.

Đơs tàm pơrjum, ồng Trương Hải Long – Phó Ƀí thư Tỉñ ủy, Củ tịc Ủy ƀan Ñân zân càr Gia Lai cih dờp mờ jờng rơ ală cồng nha tàm broă lơh bơt bơtàu mpồl rơcang gàr tiah nhàr dà lơgar tàm tơngai lài. Mờ kung đơs nền, gơnoar tờm tiah nhàr dà lơgar là dờng màng ngan mờ ờ gơtùi sơ gràm aniai, sồr mpồl ling sền gàr tiah nhàr dà lơgar pơn jat tai tơnguh kơnòl broă bơh mpồl lơh broă sùm dê tàm broă lơh atbồ, sền gàr tiah nhàr dà lơgar; sơlơ tơnguh bơta git gơp đềt mềr mờ làng bol; sơlơ tơnguh tai mblàng yal, bơto bơtê sền gàr gơnoar tờm tiah nhàr dà lơgar; sền dờng màng tus broă lơh bơt bơtàu mpồl ling kơ̆ kơljap, pràn kơldang tơl làm, bơt bơtàu ală xã tiah nhàr dà lơgar kơ̆ kơljap, pràn kơldang bè tơl bơta, pơgồp bơnah sền gàr rơndap tap sèng ring lơngai tàm ƀòn lơgar.

Bè đah mpồl ling sền gàr tiah nhàr dà lơgar, Thiếu tướng Nguyễn Đức Mạnh, Phó kwang đơng lam bồ Mpồl ling sền gàr tiah nhàr dà lơgar Việt Nam ưn ngài Tỉñ ủy, Ủy ƀan Ñân zân càr mờ ală tiah, sở, gah broă lơh bơh càr Gia Lai dê mờ làng bol tiah nhàr dà lơgar neh pơgồp bal, dong kờl mpồl ling sền gàr tiah nhàr dà lơgar lơh gơs kơnòl broă. Jat Thiếu tướng Nguyễn Đức Mạnh đơs, broă tàm dunia mờ tàm ală lơgar rềp bal geh uă tam gơl, ai tơlik jơnau sồr pa, sồr tơnguh bơta pràn jơh gùt làng bol, bơt bơtàu mpồl sền gàr jơh gùt làng bol kơ̆ kơljap mờ anih lơh broă cíñ trị kâp hơ đơm sàng goh, kơ̆ kơljap, pràn kơldang tơl làm. Tàm hơ̆, mpồl ling sền gàr tiah nhàr dà lơgar pal ngui niam gơnoar broă pơgồp bal, tă pơgồp jơnau đơs mờ làng bol, gơnoar atbồ càr dê nàng lơh gơs jơnau kờñ bal: “Gơ wèt mờ mpồl ling sền gàr tiah nhàr dà lơgar càr Gia Lai sồr ală oh mi pơn jat tai lơh niam broă lơh tă pơgồp jơnau đơs ai Đảng ủy Gah đơng lam mpồl ling mờ Tỉñ ủy, Hội đồng Ñân zân, Ủy ƀan Ñân zân càr in tàm broă lơh đơng lam, sồr lơh ală kâp, ală gah broă, ală mpồl bal mờ làng bol ngui niam bơta pràn tơrgùm bal tàm tus bal bơtàu tơnguh lơh sa mpồl bơtiàn, tơn jơh jơgloh tơrmù rƀah, bơt bơtàu anih lơh broă cíñ trị kâp hơ đơm, pơgồp bơnah lơh gơs jak ngan kơnòl broă bơt bơtàu, atbồ, sền gàr gơnoar tờm ù tiah, lơngap lơngai tiah nhàr dà lơgar”.

Di dơ̆ do, Gah đơng lam mpồl ling sền gàr tiah nhàr dà lơgar Việt Nam, Ủy ƀan Ñân zân càr Gia Lai neh jàu pà ƀằng khen; Gah đơng lam Mpồl ling sền gàr tiah nhàr dà lơgar càr Gia Lai jàu gai lòng kir sơnrai ai ală mpồl bal, cau dồ nă să geh tă pơgồp tàm srơh in.