VOV4.K’ho - Drim òr (11/03), Kwang àng càr Gia Lai bơyai lơh pơrjum cri bơyai pơgồp jơnau đơs bơ̆t bơtàu 2 rơndăp broă adăt, tàm hơ̆ geh: Adăt mpồl tus bal sền gàr bơta lơngăp lơngai ờ do ờ dă tàm ală tiah mờ rơndăp adăt ờ do ờ dă tàm gùng lòt ù gờl.

         Pơrjum cri bơyai pơgồp jơnau đơs tàm 2 rơndăp broă adăt bơh Ƀộ Kwang àng càr Gia Lai dê

Tus bal pơrjum cri bơyai geh ala măt Mpồl kwang bàng ala măt Quốc hội càr Gia Lai, ală sở, gah lơh broă. Bè rơndăp broă adăt mpồl tus bal sền gàr bơta lơngăp lơngai ờ do ờ dă tàm ală tiah, ală jơnau tus bal đơs ndrờm ring bal bè gơnoar, bơta kwơ màng bơh mpồl tus bal sền gàr bơta lơngăp lơngai ờ do ờ dă tàm ală tiah. Ală jơnau pơgồp bal ndrờm đơs là, mpồl sền gàr ờ do ờ dă bơta lơngăp lơngai tàm ală tiah là mpồl pơgồp bal kwơ màng bơh mpồl kwang àng mờ làng bol dê. Gơwèt mờ rơndăp broă Adăt ờ do ờ dă tàm gùng lòt mờ pơn diang phan tàm gùng lòt ù gờl, ală jơnau đơs là, ờ do ờ dă tàm gùng lòt, broă lơh gùng lòt mờ pơn diang phan tàm gùng ù gờl là ală gah dờng ngan, pal geh lơh, tơlik ală adăt gah broă do nàng lơh niam tus tơl gah broă.

Cau mblàng Ndong Brawl