Ràng tơlik geh 70 pang rùp sềr, rùp hin, ƀàng cih jơnau yal, phan lời kir, geh tam pà gơs 3 tơngume: Rài kis mờ broă lơh bơh cau sềr rùp Xu-Man dê, jơnau tơrgùm rùp sềr Xu-Man tàm Ƀảo tàng càr Gia Lai mờ 2, 3 rùp hin bè rùp sềr Xu-Man tàm Ƀảo tàng Mỹ thuật Việt Nam. Bơh hơ̆, ai gŏ wơl rài kis, broă lơh mờ mờng kwèng sềr rùp bơh cau sềr rùp Xu-Man dê. Ală pang rùp sềr ndrờm geh cau sềr rùp Xu- Man sềr tàm tŭ tơngai bơh nam 1975 tus nam 2005, uă ngan geh ngui sơng zờu.

Ală tơngume tờm mờ rùp sềr Xu-Man ai gŏ wơl là nùs nhơm bơh cau Tây Nguyên dê gơ wèt mờ Kwang đơng lam bồ kờñ gơboh Hồ Chí Minh bơh ală pang rùp sềr bè Bác Hồ lơh broă, Bác Hồ mờ làng bol Tây Nguyên; Bơta kờñ gơboh dà lơgar bơh làng bol Tây Nguyên dê geh ai tơnggŏ bơh ală pang rùp sềr pơn jờng hô hơng; niam chài bơh cau Tây Nguyên dê kung geh ai gŏ wơl niam ngan bơh ală pang rùp sềr bè dơ̆ lơh pơthi, niam chài cing mồng mờ rài kis pah ngai bè ƀŏ phe, tàñ sơ̆.