Bi Th. dùl nă ùr ơm tàm sơnah ƀòn Tây Sơn, ƀòn dờng Pleiku pa tus Cơldŭ lơh broă lơngap lơngai internet mờ rcang sơndră cau lơh tìs ngui kông nghệ kao, Kwang àng càr Gia Lai yal broă he pa gơtìp pơrlồm roh 160 tơlak đong. Pơgap mờ do 2 ngai, bi dờp geh dơ̆ hòi điện thoại yal geh pà dùl bơnah phan pà geh kwơ tài bơh lài hơ̆ bi neh blơi phan tàm siêu thị điện măy. Nàng dờp geh phan pà do, bi Th tải app Telegram tàm điện thoại nàng tàm hòi điện thọai. Lơh jat jơnau cau pơrlồm dê, bi lĭp tàm ală gùng link nàng sac rơwah phan pà, mờ tơl dơ̆ bơh 10 rơbô đong tus 40 rơbô đong. Tŭ neh lơh geh bơta pin dờn, cau do pơn jồ sồr bi pơyoa khà priă uă nàng bơcri lơh, priă cồng geh bơh 40 tus 60%. Tàm ngai 11/ 5, bi neh geh 10 dơ̆ ngui mat is bơh he dê nàng pơyoa priă rlau 160 tơlak đong tàm 2 mat, den hơ̆ sồng gĭt he gơtìp pơrlồm.

Geh gĭt, bồ nam 2023, tàm càr Gia Lai neh geh cau gơtìp pơrlồm tus 3 tơmàn 500 tơlak đong. Bơdìh mờ broă lơh pơrlồm pa, ală broă lơh yau, bè: lơh bè kwang àng yal broă lơh tìs, pơhìn khoă sim, khoá tài khoản, pơyoa priă nàng drơng broă lùp sền; lơh bè cau lơgar ndai dan lơh kwèng, pà phan; sac rơwah cau lơh broă tăc phan, blơi phan bơna mờ priă pà uă; hòi jà bơcri priă; ai càn priă online… kung geh ală cau pơrlồm “lơh pa” den kung gam geh làng bol gơtìp pơrlồm sơl. Tàm nam 2022, mpồl lơh broă lơngap lơngai internet càr Gia Lai, dờp geh 124 jơnau yal bè pơrlồm mờ kờp jơh hoàc huơr rlau 40 tơmàn đong. Cau gơtìp pơrlồm uă ngan rlau jơh là rlau 10 tơmàn đong.