VOV4.K’ho- Mìng gam pơgap 1 nhai tai là tus dơ̆ pơrlòng jơh bơsram kấp pe dà lơgar nam 2022. Gah bơto bơtê càr Gia Lai gam lơh ngan sơlơ lòt sền, jat sền, gàr niam dơ̆ pơrlòng jơh bơsram kấp pe dà lơgar nam 2022 geh bơyai lơh ờdo ờdă mờ niam.

Bơsram jơnau gĭt wă ai kơnòm bơsram in nàng rcang ai dơ̆ pơrlòng jơh bơsram káp pe dà lơgar mờr tus

Tus bal dơ̆ pơrlòng jơh bơsram kấp pe nam do, gùt càr Gia Lai geh rlau 14 rơbô nă kơnòm bơsram tus bal cih mat dan pơrlòng; tàm hơ̆ geh mờr 13 rơbô nă kơnòm bơsram kấp pe, 384 nă kơnòm bơsram giáo zụk thường xuyên, gam wơl là kơnòm bơsram khat gơboh. Tàm kờp bơh ală kơnòm bơsram cih mat dan pơrlòng geh rlau 13 rơbô nă kơnòm bơsram tus cih mat dan pơrlòng sac rơ wah mut bơsram đại họk, cao đẳng. Jat tàm khà kơnòm bơsram tus bal pơrlòng, càr Gia Lai neh geh gùng dà broă lơh mờ 40 anih pơrlòng ngan ngồn (gơguh 1 cơl dŭ pơrlòng pơndrờm mờ nam 2021) mờ 623 cơl dŭ pơrlòng, hòi jà 2 rơbô 400 nă kwang bàng, cau pơgru, cau lơh broă tus bal tơn tàm ală mpồl bơh mpồl duh broă pơrlòng dê. Tŭ do, Sở neh sồr ală hìu bơsram lơh sir broă lơh bơto bơtê phổ thông jat di mờ rơndap broă lơh. Bal mờ hơ̆, ală hìu bơsram tam pà kơnòm bơsram nàng geh ală broă lơh bơsram wơl geh cồng nha rlau jơh, dong ală kơnòm bơsram pin dờn mut tàm dơ̆ pơrlòng.

Cau mblàng K’Hạnh