Dơ̆ pơrlòng jơh bơsram kấp pe dà lơgar nam do, jơh gùt càr Gia Lai geh rlau 15 rơbô 200 nă cau pơrlòng dan cih mat tus bal pơrlòng; tàm hơ̆ geh mờr 14 rơbô 300 nă kơnòm pơrlòng kấp pe, 483 nă kơnòm pơrlòng giáo dục thường xuyên, gam wơl là kơnòm pơrlòng khat gơboh.

 Tàm kờp jơh kơnòm pơrlòng dan cih mat tus bal pơrlòng geh rlau 14 rơbô nă kơnòm pơrlòng dan cih mat sền sơ wì mut bơsram đại họk, cao đẳng. Rcang ai dơ̆ pơrlòng, càr Gia Lai neh geh broă rơndap lơh bal mờ 41 anih pơrlòng ngan ngồn (gơguh 1 cơldŭ pơrlòng pơndrờm mờ nam 2022) mờ 17 anih pơrlòng rcang lài mờ 652 cơldŭ pơrlòng, hòi jà pơgap 2 rơbô 500 nă kwang bàng, cau pơgru, cau lơh broă tus bal tơn tàm ală mpồl bơh Mpồl duh broă pơrlòng dê. Ồng Nguyễn Văn Long, Phó Kwang atbồ Sở Giáo dục mờ Đào tạo càr Gia Lai pà gĭt, tŭ do, Sở neh sồr ală hìu bơsram lơh sir broă lơh bơto bơtê pe kấp jat di mờ broă rơndap lơh.