VOV4.K’ho - Tus tŭ do, gah lơh sơnơm càr Gia Lai neh rơcang ală bơta nàng cit sơnơm vaccine kòp kovid-19 ai kơnòm dềt bơh 5 tus hờ đơm 12 sơnam in. Ồng Nguyễn Đình Tuấn, Phó kwang atbồ drơng broă Sở Y tế càr Gia Lai pà git: Tŭ do, tàm càr Gia Lai geh rơlao 212 rơbô nă kơnòm dềt bơh 5 tus hờ đơm 12 sơnam.

Kờñ rơcang ai tơl ală bơta nàng cit sơnơm vaccine kòp kovid-19 ai kơnòm dềt tàm sơnam do in, tơngai pa do, Sở Y tế càr Gia Lai neh jào Anih tờm gròi sền kòp tê jê să lơh jăt broă pơlam tàp ai kwang bàng lơh sơnơm tàm ală tiah in bè broă kham rơwah, cit mờ bơsong broă tơnơ̆ mờ tŭ cit; pơlam tàp ală mpồl lơh broă dong kờl broă tam cah, tơrgùm dữ liệu, gàr tơl niam ờ do ờ dă tàm anih cit sơnơm in. Kờp dŭ, broă cit sơnơm geh bơyai lơh tàm ală hìu bơsram mờ ală hìu sơnơm tàm ală xã tơnơ̆ mờ tŭ geh Ƀộ Y tế tam pà sơnơm vaccine tus; kơnòm dềt bơh 5 tus hờ đơm 12 sơnam geh cit sơnơm vaccine tŭ geh jơnau ring bal bơh cau mè bèp, ha là cau sền gròi.

Cau mblàng Ndong Brawl