Oh Hoàng Thị Anh Thơ- kơnòm bơsram ơdŭ 12C1, Hìu bơsram kâp pe Phạm Văn Đồng- xã Ia Sao, kơnhòal Ia Grai, càr Gia Lai pà git, pơrlòng jơh bơsram kâp pe mờr tus geh gơtha lơh nền tus tơnơ̆ do oh dê.

Bè hơ̆ den tàng oh neh rơcang bơsram wơl ală jơnau bơsram bơh gờñ nàng pơrlòng geh điểm jơnhua ngan rlau jơh: “Oh geh cih mat lòt bơsram tai ală ơdŭ bơsram tàm hìu nàng tàp lơh ală jơnau lùp pơrlòng. Dơ̆ 2 là oh sàu sa wil tơl, bic tơl nàng gàr bồ tơngoh in ngac ngar, pơn jat tai bơsram sră. Bè broă cih mat dan sac rơ wah mut đại họk den oh geh hìu bơsram pơlam nền nòn ngan, sền sơwì wơl sră nggal uă dơ̆. Den tàng bè broă nggal cih mat tus bal pơrlòng, oh neh lơh sir jơh”.

Đơs bè broă lơh rơcang lài tàm anih pơrlòng sồ 11 bơh càr Gia Lai dê, pơgru  Nguyễn Trọng Tuấn- Phó Kwang atbồ Hìu bơsram kâp pe Phạm Văn Đồng- xã Ia Sao, kơnhòal Ia Grai pà git: “Tus tŭ do, 186 nă kơnòm bơsram neh lơh sir jơh broă cih mat dan tus bal pơrlòng jơh bơsram kâp pe bơh phần mềm. Bè phan bơna, hìu bơsram neh rơcang wil tơl 12 cơldŭ bơsram, ală cơldŭ prap jơnau lùp pơrlòng, cơldŭ lơh broă bơh mpồl duh broă pơrlòng dê, ồs đèng, rơcang sơndră crùh ồs sa kung neh geh sền wơl, lơh niam wơl”.

Ai tàm hìu bơsram kâp pe Tân Lập, kơnhòal Kông Chro, pơgru Phạm Hữu Hùng- Kwang atbồ hìu bơsram pà git, nam do anih pơrlòng geh 57 tàm 246 nă cau pơrlòng là cau jơi bơtìan dồ êt nă cau. Bal mờ broă gàr niam bơto wơl jơnau bơsram mờ rơcang lài wil tơl ală bơta pal geh bè phan bơna, hìu bơsram kung neh rơcang lài phan sa, anih ơm dong ală oh tiah ngài: “Hìu bơsram lơh jơnau yal pơyua Ủy ƀan Ñân zân kơnhòal in dan dong kờl tơl nă oh 400 rbô đông tàm 3 ngai geh lơh pơrlòng. Bè đah hìu bơsram, sồr đoàn ơruh pơnu pơgồp bal mờ Huyện đoàn kơnhòal kơlôi rơcang ai 57 nă oh jơi bơtìan dồ êt nă cau in sàu sa tàm hìu ơm bal bơh hìu bơsram dê. Pah nam mờ nam do kung bè hơ̆ sơl, hìu bơsram geh 12 cơldŭ tàm hìu ơm bal lời ai ală oh kal ke cih mat dan ơm wơl. Ală oh ờ ơm wơl den geh mpồl lơh broă dong kờl is dong kờl nhai pơrlòng jun mờ rò ală oh”.

Kờp dŭ lài dơ̆ pơrlòng jơh bơsram kâp pe nam 2024 tàm càr Gia Lai geh rlau 15 rbô 200 nă cau tus bal pơrlòng. Tàm hơ̆ geh rlau 14 rbô 400 nă oh bơsram ơdŭ 12 mờ 800 nă oh là cau bơsram khat gơboh. Càr rơndap lài, rơcang 41 anih pơrlòng ngan ngồn mờ 2, 3 anih pơrlòng rơcang lài tàm 17 kơnhòal, thị xã, ƀòn dờng. Sở Giáo zụk mờ Đào tạo càr Gia Lai pơgồp bal nền nòn mờ ală gah kwang àng, lơh sơnơm, ồs đèng,…rơcang lài sền gàr lơngăp lơngai bơh dơ̆ pơrlòng dê in.

Broă lơh bơto pơlam kơrnuat mờ mờng chài bơyai lơh pơrlòng, phần mềm atbồ pơrlòng, sră nggal cih mat dan tus bal pơrlòng ai 15 rbô 200 nă cau pơrlòng in ndrờm neh lơh sir jơh. Ồng Nguyễn Văn Long – Phó Kwang atbồ Sở Giáo zụk mờ Đào tạo càr Gia Lai pà git tai: “Bơh tŭ do tus ngai pơrlòng, sở rơp kờp sền wơl jơh ală jơnau tơnggit cau pơrlòng, lam lơh bơto pơlam mờng chài sền pơrlòng, lam lơh bơto pơlam kơrnuat pơrlòng ai kwang bàng, cau pơgru lơh broă pơrlòng mờ cau tus bal pơrlòng in. Ală broă do rơp geh lơh sùm bơh tŭ do tus ngai pơrlòng. Sở Giáo zụk mờ Đào tạo pơgồp bal mờ Ủy ƀan Ñân zân ală kơnhòal sền sơ wì ngan ngồn tơl anih pơrlòng, bơh phan bơna, măi mok tus âlư bơta pal geh nàng cau pơrlòn in geh bơta dong kờl dipal”.

Mờ bơta rơcang lài wil tơl, jơh nùs, Gia Lai gam wèt tus dơ̆ pơrlòng jơh bơsram kâp 3 nam 2024 lơngap lơngai mờ geh cồng nha.