Nàng rơcăng lài tàm broă lơh rơcăng sơndră ồs sa brê, càr neh geh broă rơndăp lơh, mơkung lam lơh dùl ròt bal uă broă lơh nàng kờñ rơcăng lài rơcăng sơndră tềng đăp jơh ală jơnau digơlan gơlik geh.

Làng bol thôn 1, xã Hà Tam, kơnhoàl Đăk Pơ, càr Gia Lai dờp ătbồ, sền gàr mờr 260 lồ brê bơh Mpồl Ătbồ sền gàr brê rơcăng gàr bồ tô dà đah tô An Khê. Ală ngai nhai pe do, trồ tơngai duh jŏ jòng lơh ală bă brê tàm do geh uă ñhơ̆t ro, chir proh ƀươn lơh gơbàn ồs sa brê. Nàng rơcăng lài rơcăng sơndră lài, xã Hà Tam neh lơh ală mpồl ătbồ, lơh uă anih căng kơryan lòt sền, gròi sền sền gàr brê. Kwơmàng, mpồl geh broă rơndăp lơh chu lài geh bơta sền uă lồ tàm ală tiah kwơmàng ƀươn gơbàn ồs sa. Ồng Phạm Đông Mạnh ơm tàm thôn 1, xã Hà Tam, kơnhoàl Đăk Pơ là hìu bơnhă dờp ătbồ sền gàr brê, pà gĭt: Ală mpồl bơh 2 tus 3 nă cau lòt sền sùm ngai kung bè mang, tŭ geh jơnau lơi gơlik geh den bol rơ̆p yal wơl ai mpồl ătbồ brê đah tô An Khê in gĭt mờ bol añ rơ̆p hòi jơh ală cau tàm mpồl bơsong bal mờ jơnau đơs 4 tơn dùl bă tiah, tàm hơ̆ geh mpồl cau tàm tiah hơ̆, sồr lơh tơn dùl bă tiah, phan ngui tàm tiah hơ̆ tơn, dong broă tàm tiah hơ̆ tơn, bol añ lơh niam ngan, pơgồp bal niam ngan nàng bơsong ală jơnau ờ niam gơlik geh.

Mpồl Ătbồ brê rơcăng gàr bồ tô dà đah tô An Khê, gơwèt kơnhoàl Đăk Pơ, càr Gia Lai tŭ do gam ătbồ rlau 10 rbô lồ brê, tàm hơ̆ geh bă brê geh is tus 3 rbô 600 lồ, brê tam pơgăp 1 rbô lồ. Bơh bồ nam do tơn, mpồl neh lơh pràn kơldang wơl Mpồl đơng lam rơcăng sơndră mờ crùh ồs sa brê kung bè rơndăp wơl 4 mpồl làng bol pa dờp ătbồ sền gàr brê, là mpồl cau rơcăng sơndră ồs sa brê tơn.

Ồng Lê Thái Hùng, Phó Kwang ătbồ Mpồl Ătbồ brê rơcăng gàr bồ tô dà đah tô An Khê, kơnhoàl Đăk Pơ, càr Gia Lai pà gĭt: Mpồl sơlơ lơh tai broă lòt sền, ai kwang bàng drơng gak bal mờ ală mpồl dờp sền gàr brê sùm tus drơng gak tàm ală anih drơng gak kwơmàng ƀươn gơbàn ồs sa nàng kờñ gŏ, mờ crùh gơsơ̆t tơn di tŭ ală tiah gơbàn ồs sa. Mơkung lơh ală mpồl rơcăng sơndră ồs sa brê mờ mpồl cau gơguh tus gĭt nđờ rhiang nă. Mpồl kung lam lơh ală broă lơh bơta chài bè chu ñhơ̆t chi che hòn lềng geh bơta sền gròi, lơh ală gùng cang bơkang kơryan ồs gơwèt mờ ală bă brê geh pơhìn gơtìp ồs sa uă. Ồng Lê Thái Hùng, đơs: Mpồl kung sơlơ tơnguh tai broă lòt sền, drơng gak bal mờ ală mpồl dờp ătbồ sền gàr brê, pơgồp bal mờ gơnoar ătbồ tàm tiah hơ̆ mờ ală ƀan ngàñ mpồl cau tàm broă lơh mblàng yal, pơgồp bal tŭ geh ồs sa brê gơlik geh den kung rơ̆p hòi cau tus bơsong di tŭ. Bal mờ hơ̆, den Ủy ƀan Ñân zân càr mờ ală sở, ngàñ geh sền gròi mờ ai tơl bơta ai lơh jăt ală broă lơh chu lài bè chu lài geh bơta sền gròi nàng tơrmù ƀà broă gơbàn ồs sa brê, tơrmù uă ngan rlau jơh broă ồs sa brê gơlik geh tàm tơngai kàl prang dờng.

Kơnhoàl Đăk Pơ tŭ do gam ătbồ mờr 24 rbô lồ brê, tàm hơ̆ geh rlau 19 rbô lồ brê geh is. Ồng Đào Duy Tuấn, Kwang ătbồ Hạt Kiểm lâm kơnhoàl Đăk Pơ pà git, mpồl neh geh broă rơndăp lơh rơcăng sơndră ồs sa brê mờ pồ tơl ală mpồl đơng lam rơcăng sơndră ồs sa brê kâp kơnhoàl, xã; sơlơ mblàng yal hòi jà làng bol, lòt sền ală mpồl cau tờm brê, Ủy ƀan Ñân zân ală xã nàng broă lơh rơcăng sơndră ồs sa brê lơh geh cồng nha uă. Ồng Đào Duy Tuấn, đơs: Bơh bồ nam tus tŭ do ờ hềt gơlik geh dơ̆ ồs sa brê lơi, bulah bè hơ̆ den hạt kiểm lâm kung ờ gŏ ờ rơcăng ngăc ờ tàm broă lơh rơcăng sơndră ồs sa brê. Sùm sồr kwang bàng kông cưk pơgồp bal mờ Ủy ƀan Ñân zân ală xã, ală mpồl cau tờm brê sơlơ tơnguh tai broă lơh mblàng yal lơh jăt niam jơnau đơs 4 tơn dùl bă tiah nàng dilah geh jơnau ồs sa brê den di tŭ crùh gơ sơ̆t ờ gŏ lời sa gơ rề, ngan là sơlơ drơng gak tai tàm ală anih geh pơhìn ồs sa brê uă.