VOV4.K’ho- Tơngai do, càr Gia Lai kung gam tàm tơngai prang duh ngan, uă tiah gam geh jơnau đơs lài ồs sa brê kâp ngòt rơngơt mờ ngòt rơngơt ngan. Nàng rơcang sơndră mờ tơrmù tus khà lơyah ngan rlau jơh gơlik geh ồs sa brê, mpồl lơh broă geh gơnoar bơh càr Gia Lai dê neh pơgồp bal jơh nùs mờ ală cau tờm brê rơcang lài sơndră ồs sa brê jat jơnau đơs 4 tơn tàm dùl anih.

Mpồl hìu bơnhă ồng Phạm Đăng Ngọc ơm tàm thị trấn Kon Dơng, kơnhoàl Mang Yang gam dờp ơpah atbồ, sền gàr 250 lồ brê gơ wèt bă brê rơcang gàr tiah bồ tô Mang Yang, dùl tàm ală tiah geh jơnau pơhìn uă gơlik geh ồs sa brê. Tŭ do, bơdìh mờ broă lơh gròi sền, sền gàr, mpồl hìu bơnhă bơh ồng Ngọc dê gam sùm pơgồp bal mờ mpồl lơh broă geh gơnoar mut tàm brê gròi sền mờ chu lài nhơt rŭ rơm nàng rơcang sơndră ồs sa brê bơh ngài. Bơdìh hơ̆ tai, mpồl hìu bơnhă ồng Ngọc dê gam rơcang lài mblàng yal, hòi jà làng bol bañ mus kơl brê, chu brê lơh mìr rềp tiah kềng gah brê: “Lam lơh kơnòl dờp ơpah sền gàr brê den bol hi neh crơng gơs mpồl sùm tàm pơ dờn gơp mut tàm brê gròi sền, rơcang sơndră ồs sa brê tàm nhai prang duh, ro kơnrrañ. Bơdìh hơ̆ tai gam sùm bal mờ kwang bàng mpồl atbồ, lòt sền ală gùng pơng gàr geh nha chi jrùh den khòm mờ chu nàng ờ lời gơlik geh ồs sa gơ rề tàm nhai prang duh”.

Ồng Nguyễn Văn Hùng, kwang atbồ Mpồl atbồ brê rơcang gàr bồ tô Mang Yang pà git, mpồl sùm pơgồp bal jơh nùs mờ ală mpồl, gah broă lơh càr dê sơlơ lòt sền, sền gròi, lơh glài kràñ ală broă lơh tìs adat Lâm nghiệp. Ai cau lơh broă ơm gak ngai mang nàng dờp jơnau yal ồs sa brê bơh kâp hơ đơm, bơh hơ̆ di tŭ bơsong ală broă gơlik geh: “Mpồl atbồ brê rơcang gàr bồ tô Mang Yang neh hòi jà jơh mpồl lơh broă lòt sền tàm tơngai prang duh do. Bal mờ ală hìu bơnhă dờp ơpah, làng bol tàm ƀòn kĭ jơnau hơ pơrgon gàr ờdo ờdă ồs brê, ờ lời ồs sa gơ rề mut tàm brê. Bal mờ hơ̆ bol hi gam lam lơh ală broă lơh drơng sền gàr brê, chu lài ală tiah pơhìn gơlik geh ồs sa nàng tơrmù ƀà phan ƀuơn ồs sa tàm kàl prang duh”.

Kơnhoàl Mang Yang geh rlau 47 rbô lồ brê, tàm hơ̆, rlau 40 rbô lồ brê geh is mờ rlau 7 rbô 400 lồ brê tam. Bơh đal git, jơh gùt kơnhoàl geh rlau 6 rbô lồ brê, uă ngan là brê geh is gơ wèt 6 tiah kuơmàng ƀuơn gơlik geh ồs sa geh: Ayun, H’ra, Đăk DJrăng, Đê Ar, Đăk Trôi, Kon Chiêng.

Ală mpồl hìu bơnhă geh jàu ơpah sền gàr brê chu lài nhơt ro rŭ rơm nàng rơcang sơndră ồs sa brê

Ồng Trần Tất Đắc, Phó kwang atbồ Hạt Kiểm lâm kơnhoàl Mang Yang pà git, nàng rơcang lài sơndră ồs sa brê, bơh bồ kàl prang, kơnhoàl neh pồ tơl kwang bàng Mpồl đơng lam rơcang sơndră ồs sa brê kâp xã, jat hơ̆ neh crơng gơs ală mpồl rơcang sơndră ồs sa brê mờ jơnau đơs 4 tơn tàm dùl anih: “Hạt kiểm lâm là anih lơh broă sùm neh pơgồp bal mờ kwang àng kơnhoàl, hạt kiểm lâm mờ ală mpồl lơh broă geh gơnoar kơnhoàl dê, Phòng nông nghiệp nàng lòt sền ală mpồl tờm brê mờ ală xã. Hạt kiểm lâm neh sền sơ wì mờ sơlơ tơnguh broă lơh mblàng yal tàm 12 xã, thị trấn bal mờ 4 kông ty Mpồl atbồ brê rơcang gàr bồ tô, brê dà lơgar Kon Ka Kinh neh lam lơh broă lơh mblàng yal, hòi jà broă lơh atbồ, sền gàr brê, broă lơh rơcang sơndră ồs sa”.

Gia Lai tŭ do geh rlau 226 rbô lồ brê gam geh jơnau pơhìn gơlik geh ồs sa, bulah bè hơ̆, tàm khà do mìng rơp pa geh nggùl bă brê geh tă priă lơh ală broă lơh rơcang sơndră ồs sa brê. Bè hơ̆ den tàng broă lơh rơcang sơndră ồs sa brê tàm càr bơh tŭ do tus lồi kàl prang sùm geh ală mpồl lơh broă geh gơnoar lơh ngan lam lơh nàng rơcang sơndră mờ tơl broă digơlan gơlik geh. Ồng Trương Văn Nam, Kwang atbồ Cơldŭ atbồ, sền gàr brê mờ sền gàr phan geh is, Ci kụk Kiểm lâm càr Gia Lai đơs: “Ci kụk kiểm lâm neh đơng lam jơh nùs, sồr ală hạt kiểm lâm mờ ală mpồl tờm brê lam lơh niam broă lơh rơcang sơndră ồs sa brê ngai kung bè mang. Neh lơh gơtùi mờr 250 kơi sồ gùng pơng gàr kơryan ồs, ndrờm mờ 700 lồ neh chu nhơt ro rŭ rơm nàng tơrmù ƀà jơnau pơhìn ồs sa brê, tơrmù tus khà lơyah ngan rlau jơh gơlik geh ồs sa brê tàm càr. Bơdìh hơ̆ tai, Ci kụk kiểm lâm sùm yal tiah gơlik geh ồs sa tus tơl sồ điện thoại mờ tơl nă kwang bàng kiểm lâm, kiểm lâm tàm ƀòn lơgar, mpồl lơh broă sùm dê nàng lơh bè lơi mìng rơp pa gơlik geh ồs sa den git gŏ mờ crùh chơt ồs mơ tơn”.

Cau mblàng K’Duẩn