VOV4.K’ho- Nam 2022, kờp jơh priă bơcri dà lơgar dê tàm càr Gia Lai là 3 rbô 350 tơmàn đong. Tus bồ nhai 05 do, càr neh ai mờr 400 tơmàn đong.

Ủy ƀan Ñân zân càr Gia Lai neh lơh Mpồl lơh broă sồr mhar ai priă bơcri dà lơgar nam 2022 bơh dùl Phó Củ tịc Ủy ƀan Ñân zân càr dê lơh Kwang ătbồ mpồl mờ Kwang ătbồ Sở Kế hoạc mờ Đầu tư pơgồp bal mờ ală sở, ƀan, ngàñ kờp sền ală anih, ală tiah lơyài lam lơh rơndăp broă lơh, ai priă lơyài nàng geh bơta tàm ntrờn priă gơ in dipal; sồr kwang đơng lam bồ ală kơnhoàl, thị xã, ƀòn dờng sồr lơh jơh nùs, di tŭ tă bơsong kal ke, bơta gơkòl bè ai ù, tơm wơl priă ai ù, ntrờn ơm kis pa, bơsong di tŭ jơnau yal yă, lơh gơlik geh bơta ring bal bơh làng bol dê tàm tŭ lam lơh rơndăp broă lơh. Ală cau tờm bơcri priă pah poh geh jơnau yal tŭ tơngai lơh jăt, tŭ tơngai ai priă jền bơh tơl rơndăp broă lơh, tơl broă lơh dê.

Cau mblàng Lơ Mu K’Yến