VOV4.K’ho- Rlau nggùl nam 2022, khà tă priă bơcri dà lơgar tàm càr Gia Lai pa rơp geh mờr 23%, lơyah rlau mờ khà kờp bal bơh gùt lơgar dê là rlau 27%. Tàm hơ̆, uă rơndap broă lơh kuơmàng bơh càr dê gơtìp lơyài tơngai lam lơh tài pal tam gơl khà priă bơcri tơ nơ̆ gơ rềng bơh bơta gơguh khà priă ù mờ gơguh kas khà priă phan bơna bơt bơtàu. Gah lơh broă geh gơ noar càr lơh ngan ai tơlik jơnau đơs Ủy ƀan Ñân zân càr in bè broă lơh tă praiă bơcri kuơmàng nàng kờñ lơh geh jơnau kờñ ai tơlik.

Bơh lồi nam 2021, Mpồl atbồ bơcri priă bơt Bơtàu kơnhòal Chư Păh, càr Gia Lai neh lơh sir ală sră nggal bơcri priă ai 4 gơl gùng tơrbŏ ală xã tiah sar lơgar ngài nàng lam lơh tơn bơh bồ nam 2022. Bulah bè hơ̆, tŭ mut tàm tơngai lam lơh den khà priă phan bơt bơtàu gơguh kas nisơna. Jat hơ̆, sơmăng, lòs, lŭ, zờu diezel, cài lă gùng ndrờm gơguh khà priă bơh 10 tus 20%, geh tŭ gơguh kas jơnhua rlau 1 dơ̆ mờ nggùl khà priă neh geh ring bal bơh sơn rờp. Bơta do lơh kơnhòal pal ơm ală rơndap broă lơh nàng kơp ală gah broă lơh bơh càr dê geh jơnau pơlam. Ồng Đặng Thái Huy, Kwang atbồ Mpồl atbồ ală rơndap broă lơh bơcri priă bơt bơtàu kuơmàng kơnhòal Chư Păh pà git: “Tàm khà kòp jơh 100 tơmàn đồng hơ̆, uă rlau mờ khà priă bơcri pơgap 10 tơmàn đông. Tŭ hơ̆, kơnhòal lơh sră yal Ủy ƀan Ñân zân càr in dan jơnau đơs. Tŭ do, ring bal là lơh 4 gơl gùng, tŭ do kơnhòal rơ wah 2 gơl gùng nàng geh ring bal lơh lài. Dut ndơl bơh tơngai lơh broă dê, khà priă xăng zờu, phan bơna bơt bơtàu dilah gơmù den geh ring bal pơn jat tai lơh bè ờs. Dilah sơrlèt rlau mờ priă bơcri neh ring bal bơh sơn rờp den pal dan càr tam gơl rơndap broă lơh ".

Rơndap broă lơh gùng lòt ală xã bơh kơnhòal Chư Păh dê lơyài tài bơh khà priă phan bơna gơguh kas

Bal mờ broă gơguh kas khà priă phan bơt bơtàu den bơta gơguh khà priă ù pa do lơh broă ai ù lơh rơndap broă gơtìp kal ke, uă rơndap broă lơh kuơmàng tàm Gia Lai pơhìn gơtìp lơyài tơngai lam lơh. Pơn rơ là rơndap broă lơh Gùng lòt tus ală kơnhòal Chư Sê- Chư Pưh- Chư Prông jòng 33 kơi sồ, kờp jơh priă bơcri 320 tơmàn đông. Rơndap broă lơh sơn đờm lam lơh bơh nhai 3 nam 2021, tus tŭ do, bơnàng gùng, tuh lŭ tàm uă gơl neh lơh gơs. Mìng is, gơl lòt gan 2, 3 tiah làng bol ơm kis tàm thị trấn Nhơn Hòa, kơnhòal Chư Pưh gơtìp kòl yan tàm broă ai ù tài bơh làng bol ờ bài ring bal. Ồng Phạm Xuân Điệp, Kwang atbồ Mpồl atbồ rơndap broă lơh bơcri priă bơt bơtàu càr Gia Lai là mpồl tờm bơcri priă lơh pà git: “Tŭ do, gam rlau 2 kơi sồ kung gam ờ hềt geh broă rơndap lơh ai ù bơh kơnhòal dê. Ủy ƀan Ñân zân càr mờ ală mpồl lơh broă, anih lơh broă geh gơ rềng neh sồr tơnguh mhar tơngai lam lơh broă ai ù. Bol hi kờp dŭ nhai 9 tus den broă lơh bơnàng gùng, tuh lŭ, tuh ù, ală anih lơh rbàng geh lơh gơs. Tơn jơh kàl mìu, ală mpồl geh tơrgùm ai broă lơh lă cài in". 

Jat Sở Kế hoạc mờ Đầu tư càr Gia Lai yal, nam 2022 là nam lam lơh uă rơndap broă lơh sơn đờm lơh pa bơh tơngai bơcri priă dà lơgar di mơ tơngai bơh nam 2021 tus nam 2025 dê. Gơwèt mờ ală rơndap broă lơh sơn đờm lơh pa, roh uă tŭ tơngai lam lơh ală sră nggal lòt sền, bơceh lơh, sền sơ wì ring bal, jòi cau lơh,... pal tus lồi nam hơ̆ sồng gơtùi sơn đờm lam lơh broă lơh, den tàng ală nhai bồ nam broă tă priă bơcri geh mìng dùl êt. Khà priă xăng zờu, phan bơna, phan bơt bơtàu gơguh kas nisơna neh lơh gơlik kal ke dờng ngan ai ală cau tờm bơcri priă lam lơh rơndap broă lơh in, ngan là ală rơndap broă lơh kĭ sră pơrgon jat broă lơh khà priă ờ tam gơl, sơn đờm lam lơh tàm ală nam 2020, 2021.

Rơndap broă lơh gùng lòt ală kơnhòal Chư Sê- Chư Pưh- Chư Prông uă gơl neh mut tàm tơngai lă cài 

Mùl màl, nam 2022, càr Gia Lai geh 27 rơnap broă lơh bơcri priă dà lơgar, mờ kờp jơh priă bơcri rlau 3 rbô 600 tơmàn đông. Kờp tus ngai 19/7/2022, càr mìng rơp pa tă priă bơcri geh mờr 993 tơmàn đông, ndrờm mờ 22,88% (lơyah rlau mờ khà kờp bal bơh gùt lơgar dê là rlau 27%). Ồng Nguyễn Hữu Quế, Kwang atbồ Sở Kế hoạc mờ Đầu tư càr Gia Lai pà git, tŭ do geh 2 rơndap broă lơh kuơmàng gơtìp kòl yan tàm broă ai ù, 11 rơndap broă lơh ờ hềt lơh sir ală sră nggal bơcri priă. 2 , 3 rơndap broă lơh gơ rềng tus khà priă phan bơna bơt bơtàu tam gơl, ală cau tờm bơcri priă pal dan tam gơl priă bơcri. Càr neh crơng gơs 4 mpồl lơh broă sùm lòt sền, chul chồl ală tiah, mpồl lơh broă, ai tơlik broă lơh di tŭ tă bơsong ală bơta kòl yan tàm bơcri priă dà lơgar. Jat ồng Nguyễn Hữu Quế đơs, tŭ do ală kòl yan neh gơtùi bơsong: “Ală bơta tam gơl gơlik geh bồ nam 2022 digơlan ờ gam gơlik geh tai, pơn yơu bè khà priă xăng zờu neh gơmù, bơta gơguh khà priă ù ờ gam tai; 2, 3 broă lơh gơtìp kòl yan bè jơnau sồr den neh geh ală gah broă lơh ring bal. Bè hơ̆, bơh tŭ do tus lồi nam, broă lam lơh bơcri priă bơt bơtàu kuơmàng mờ tă priă bơcri dà lơgar, bơta tờm ngan là gơ wèt ală cau tờm bơcri priă mờ ală mpồl atbồ rơndap broă lơh. Bol hi geh lơh ngan ai tơlik jơnau đơs Ủy ƀan Ñân zân càr in bè broă lơh tă priă bơcri kuơmàng tàm càr Gia Lai lơh jat jơnau sồr, lơh geh jơnau kờñ ai tơlik”.

Kung jat Sở Kế hoạc mờ Đầu tư càr Gia Lai pà git, càr tŭ do geh ală rơndap broă lơh kuơmàng bè: Rơndap broă lơh gơl gùng lòt iah nhàr dà lơgar jal mhar kơnhòal Đức Cơ, càr Gia Lai (sơn đờm lam lơh nhai 12 nam 2020, kờp dŭ lơh gơs nhai 11 nam 2022); Rơndap broă lơh gùng lòt ală kơnhòal Chư Sê - Chư Pưh - Chư Prông, càr Gia Lai (sơn đờm lam lơh nhai 3 nam 2021, kờp dŭ lơh gơs nhai 12 nam 2022); Rơndap broă lơh lơh niam wơl gùng càr 663 (sơn đờm lam lơh nhai 12 nam 2021, kờp dŭ lơh gơs nhai 11 nam 2023); Rơndap broă lơh lơh niam wơl gùng càr 664 (sơn đờm lam lơh nhai 12 nam 2021, kờp dŭ lơh gơs nhai 11 nam 2023).

Cau mblàng K’Duẩn