VOV4.K’ho- Drim ngai 27/07, tàm ƀòn dờng Pleiku, Ủy ƀan Ñân zân càr Gia Lai bơyai lơh pơrjum tìp mat cau geh màng mờ dà lơgar pơn rơ jak di dơ̆ tơngkah kir sơnrai 75 nam ngai cau ling sồt să, cau ling chơ̆t màng. Tus bal tìp mat dơ̆ do geh 75 nă cau ala mat, geh 2 nă Mè Việt Nam khin cha jak chài, 1 nă  cau ling khin cha jak chài phàu crong bal mờ ală cau ling sồt să, cau pròc mhàm bal mờ cau linh chơ̆t màng ala mat ai rlau 12 rơbô nă cau geh dờp bơta dong kờl cau geh màng mờ dà lơgar tàm càr Gia Lai.

Ủy ƀan Ñân zân càr Gia Lai pà bằng khen ai cau geh màng mờ dà lơgar nam 2022 in

Tàm dơ̆ tìp mat, ală cau ala mat neh kah wơl bơhiàn dờng màng bơh jơi bơtiàn de bơh ală dơ̆ tam lơh. Kwang đơng lam bồ càr Gia Lai neh tơngŏ nùs nhơm gĭt ưn ngài mờ kah rơngal tus mờ ală hìu bơnhă cíñ sác, cau geh màng mờ dà lơgar. Bơh nam 2017 tus tŭ do, càr Gia Lai neh dong kờl lơh niam wơl mờ lơh pa rlau 2 rơbô nơm hìu ơm ai cau geh màng mờ dà lơgar geh rài kis kal ke in, mờ rlau 73 tơmàn đong. Lam lơh sền gàr, dong kờl ai rlau 20 rơbô nă cau geh màng mờ dà lơgar in mờ priă tă 22 tơmàn đong. Geh 14 nă Mè Việt Nam khin cha jak chài gam kis geh lơh hìu ơm nùs nhơm mờ geh ală anih lơh broă, mpồl lơh broă dờp ròng siam tus jơh rài kis...

Cau mblàng K’Hạnh