VOV4.K’ho - Gia Lai gam tàm tơngai trồ prang uă, trồ tơngai duh jŏ neh lơh bă brê di gơlan gơtìp ồs sa uă. Nàng rơcang sơndră mờ ồs sa brê, ală tiah neh bơ̆t bơtàu mờ lơh geh uă broă nàng rơcang sơndră.

Mpồl bơtiàn ƀòn Ngăng, xã Chư Don, kơnhoàl Chư Pưh geh jào atbồ, sền gàr rơlao 600 lồ brê bơh Mpồl atbồ brê rơcang gàr lài Nam Phú Nhơn. Tŭ do, trồ tơngai duh jŏ neh lơh ală bă brê tàm do ƀuơn ngan gơtìp ồs sa. Nàng rơcang sơndră mờ ồs sa, ƀòn Ngăng neh tam pà ală hìu làng bol in lòt sền brê sùm, lơh gùng dà broă lơh nàng chu chi che jăt gah brê.

                    Làng bol ƀòn Ngăng chu chi che jăt gah brê nàng rơcang sơndră mờ ồs sa brê

Hìu nhă bi Gru, dùl tàm ală hìu nhă geh jào sền gàr brê tàm ƀòn Ngăng, xã Chư Don, kơnhoàl Chư Pưh pà git: “Là hìu geh dờp sền gàr brê, tŭ do tàm ƀòn añ geh 22 hìu geh jào rơlao 600 lồ brê. Lòt lơh broă tàm brê mờ oh mi den kung lam sồr ală cau pal git tàm broă sền gàr brê, ờ mus kơl chi brê, ờ chu brê lơh mìr. Kàl prang den he bal mờ ală oh mi tàm ƀòn sùm lòt mus chi che jăt gah brê nàng rơcang sơndră mờ ồs sa brê”.

Mpồl atbồ brê rơcang gàr lài Nam Phú Nhơn gam atbồ rơlao 15 rơbô lồ brê. Bơh tàm bồ kàl prang, mpồl atbồ do neh tam pà kwang bàng, cau lơh broă sùm lòt sền nàng gŏ, rơcang bơ̆t bơtàu gùng dà broă lơh 4 tàm tiah hơ̆ tơn, mờ crơng gơs ală mpồl rơcang sơndră mờ ồs sa brê.

Ồng Nguyễn Văn Tường, Kwang atbồ Mpồl atbồ brê rơcang gàr lài Nam Phú Nhơn, kơnhoàl Chư Pưh pà git, bă brê bơh mpồl sền gàr geh tàm bàr kơnhoàl là Chư Sê mờ Chư Pưh. Tŭ do, mpồl sền gàr neh lơh jăt ală gùng dà broă lơh geh kwơ nàng rơcang sơndră mờ ồs sa brê. Tàm hơ̆ geh dùl bơnah bơta pràn uă ngan gơwèt mờ làng bol tàm ƀòn tàm broă dong kờl mpồl atbồ sền gàr brê mus mờ chu chi che jăt gah brê nàng sền gròi mờ rơcang sơndră mờ ồs sa brê. “Đơs ngan bă brê geh jào sền gàr ai làng bol in sền gàr niam ngan, làng bol kung geh tai priă, pah nhai ală hìu tus bal sền gàr brê geh mờr 1 tơlăk đong. Oh mi kung lơh ngan lam sồr bal sơrlèt mờ kal ke nàng lơh ngan lơh gơs kơnòl. Geh kơrnoăt pơgồp bal đah mpồl sền gàr brê, gơnoar atbồ xã, mpồl atbồ brê ală kấp tŭ geh broă ni sơna, geh rơndăp broă tàm tơngai lơh broă, tàm nhai nàng geh rơndăp broă tus bal lòt sền nàng geh rơndăp broă dong kờl Mpồl atbồ brê”.

Chư Pưh tŭ do geh rơlao 20 rơbô lồ brê, tàm hơ̆ tiah tờm ngan di gơlan gơtìp ồs sa geh ai tam pà tàm 6 xã, tàm hơ̆ geh: Ia Hla, Ia Hrú, Ia Phang, Ia Le, Ia Blứ, Chư Don. Ồng Phạm Văn Đạo, Kwang atbồ mpồl sền gàr brê kơnhoàl Chư Pưh pà git, bơh bồ kàl prang, mpồl lơh broă do neh geh gùng dà broă lơh nàng lơh gơs Mpồl đơng lam rơcang sơndră mờ ồs sa brê kâp kơnhoàl, xã, bơ̆t bơtàu gùng dà broă lơh 4 tàm tiah hơ̆ tơn, crơng gơs ală mpồl rơcang sơndră mờ ồs sa brê. Bơyai lơh kĭ 2 rơbô 400 pang sră hơ bal, pà 800 pang rùp gơwèt mờ ală hìu kis rềp mờ brê... Bơh tŭ hơ̆ lam sồr, hòi jà làng bol tơnguh jơnau git wă tàm broă rơcang sơndră mờ ồs sa brê. Ồng Phạm Văn Đạo, Kwang atbồ Mpồl sền gàr brê kơnhoàl Chư Pưh pà git: “Mpồl lơh broă neh lòt sền ală tiah rê mờ kung neh cih jơnau yal pơyoa tus UɃÑZ kơnhoàl, Sở Nông nghiệp mờ Phát triển Nông thôn kung neh lòt sền mờ neh đơs bè broă rơcang sơndră mờ ồs sa brê tàm kơnhoàl Chư Phư niam ngan, rơcang nền nòn. Đơs bal tàm nam pa do, kơnhoàl Chư Pưh ờ lời gơtìp ồs sa brê, mơya broă do ờ gơtùi ờ sền gròi tài bơta trồ tiah geh ală tam gơl ni sơna. Broă do mpồl sền gàr brê geh tam pà kơnòl sền gàr rơcang sơndră mờ ồs sa brê tàm kàl prang, kơ̆p kơnờm tàm nam do geh sùm cồng nha bè nam lài”.

Cau cih Hoàng Qui-Cau mblàng Ndong Brawl