VOV4.K’ho- Ồng Đoàn Ngọc Có, Phó Kwang atbồ Sở Nông nghiệp mờ Phát triển Nông thôn càr Gia Lai pà git, tŭ do, kờp jơh bă ù lơh sa suơn sre tàm càr do là rlau 550 rbô 590 lồ mờ ală bơta chi tam tờm ngan bè: kơphe, kau su, tiêu, chi sa plai, chi lơh sơnơm, kòi, bùm blàng, tơngời mờ biap. Ală nam rềp ndo, gah lơh sa suơn sre càr Gia Lai lơh geh rlau 30 rbô tơmàn đông pah nam, tàm hơ̆, mìng is gah tam phan geh rlau 26 rbô 140 tơmàn đông.

Kơphe tam jat tơl khà 4C tàm Gia Lai

Nàng rơndap sap sèng wơl gah lơh sa suơn sre kơ̆ kơljap, ală nam do, càr Gia Lai neh tam gơl git nđờ rbô lồ chi tam ờ huan geh cồng nha nàng tam ală bơta chi tam dipal rlau. Gùt càr tŭ do geh mờr 231 rbô lồ ală bơta chi tam geh tam jat tơl khà, lơh broă bal tac phan lơh gơs. Jat ồng Đoàn Ngọc Có đơs, tơngai tus, càr pơn jat tai lam lơh uă broă lơh nàng tơnguh bơta kuơ lơh geh phan bơh suơn sre, ngan là tơrgùm chồl pràn tac phan hờ lơgar ndai.

Cau mblàng K’Duẩn