VOV4.K’ho- Lơh jăt Nhai ơruh pơnu, Rơnàng kơnòm să càr Gia Lai gam geh uă broă lơh geh kwơ ngan, tơngŏ nùs nhơm lam lài, lơh is, bơceh lơh. Nhai ơruh pơnu nam 2022, Tỉñ đoàn Gia Lai lơh uă broă lơh pơnrơ ngan, tàm hơ̆ broă pơnrơ ngan rlau jơh là bơyai lơh broă lơh “Nhai Ơruh pơnu” nam 2022 mờ srơh tàm pơrlòng gờm chờ Pơrjum dờng Đoàn Ơruh pơnu Kộng sản Hồ Chí Minh ală kâp, tơngai lơh broă bơh nam 2022- 2027 geh bơyai lơh tàm Hìu bơsram Kâp dùl Lê Hồng Phong, xã Ia Trôk, kơnhoàl Ia Pa, càr Gia Lai.

Tỉñ đoàn Gia Lai pà phan ai ală kơnòm bơsram in tàm Hìu bơsram Kâp dùl Lê Hồng Phong, xã Ia Trôk, kơnhoàl Ia Pa, càr Gia Lai

Tàm broă lơh broă, mpồl neh pà 135 bơnah phan ai ală kơnòm bơsram in; Pà 1 broă lơh “Anih sền sră, tă pơgồp jơnau đơs mờ pơrjum mpồl kơnòm dềt” kờp priă 50 tơlak đong; pà 2 nơm hìu “Chèu wan pơrhê” ai kơnòm dềt geh rài kis kal ke in. Bơdìh hơ̆ tai, mpồl kung neh lam lơh dùl ròt ală broă lơh broă tài mpồl bơtiàn, bè: Pà rlau 400 kơldung mhàm dong kờl cau, dong kờl ngai lơh broă, lơh bơka niam wơl gùng ƀòn, pà hìu bơta nđàc, ală broă lơh dong kờl tàm broă lơh rơcăng sơndră kòp Kovid-19...

 Cau mblàng Lơ Mu K’Yến