VOV4.K’ho - Nam bơsram pa 2022-2023, gah bơto bơtê mờ bơsram càr Gia Lai gam ờ tơl rơlao 3 rơbô 700 nă cau pơnru bơto. Tềng đăp mờ bơta kal ke do, uă broă lơh jal mhar geh ală hìu bơsram lơh jăt nàng gàr niam broă bơto mờ bơsram.

Tàm nam bơsram pa do, Hìu bơsram mầm non Hoa Hồng, ƀòn dờng Pleiku rơwah geh 850 nă kơnòm bơsram tàm rơlao 22 mpồl ơdŭ. Pơgru Trần Thị Thuỷ, Kwang atbồ hìu bơsram mầm non Hoa Hồng pà git, hìu bơsram gam ờ tơl 15 nă cau pơgru tàm nam bơsram pa, den tàng kơlôi rơcang ngan. “Tŭ do hìu bơsram mìng rơ̆p rơndăp tơl ai 22 nă cau pơgru nàng tơl ai 1 nă cau pơgru bơto, gam tai là ai lài kơnòm bơsram 5 sơnam, gam tai khà kơnòm bơsram tàm hìu bơsram bơh 3 tus 4 sơnam den tŭ do khà cau pơgru gam ờ tơl. Bol añ kung gam dan mờ cơl dŭ lơh broă geh bơto bơtê mờ bơsram ƀòn dờng bal mờ UɃÑZ ƀòn dờng là tơnơ̆ mờ tŭ sơn đờm nam bơsram pa pal geh tơl cau pơgru nàng lơh jăt broă sền gàr mờ bơto bơtê kơnòm dềt”.

Ồng Phạm Văn Đại, Kwang atbồ Cơl dŭ lơh broă gah bơto bơtê mờ bơsram kơnhoàl Ia Grai pà git: Gùt kơnhoàl geh 46 hìu bơsram mờ rơlao 1 rơbô 200 nă kwang bàng, cau pơgru bal mờ cau lơh broă. Tŭ do, kơnhoàl Ia Grai gam ờ tơl mờr 300 nă cau pơgru, cau lơh broă. Lơh jăt kơrnoăt bơh broă bơto bơtê phổ thông jơh ală bơta nam 2018, nam bơsram 2022-2023 geh là nam bơsram sơnrờp ngan ai môn dà Mỹ mờ Tin họk gơs môn pal bơsram bơh ơdŭ 3 tàm kấp 1, ala mờ broă rơwah is bè lài do tai. Bơta mùl màl do lơh kơnhoàl gam ờ tơl uă cau pơgru den pơn jăt tai gơtìp kal ke tŭ ờ hềt geh tơl di pal khà cau pơgru bơto 2 môn do: “Tŭ do kal ke ngan bơh gah bơto bơtê mờ bơsram kơnhoàl Ia Grai dê là lơh jăt sră măi pa mờ môn bơsram dà Mỹ ơdŭ 2 mờ tin họk ơdŭ 3 tŭ do uă ngan. Mờ kờp jơh khà cau pơgru bơto dà Mỹ gam ờ tơl ờ uă ngan tàm 1 hìu bơsram là gam 5 hìu bơsram ờ hềt geh cau pơgru bơto dà Mỹ mờ 8 hìu bơsram ờ hềt geh cau pơgru bơto môn Tin họk den tàng kal ke ngan”.

Kung tàm nam bơsram do, ƀòn dờng Pleiku ờ tơl 600 nă cau pơgru tàm ală kấp bơsram. Ồng Nguyễn Đình Thức, Kwang atbồ Cơl dŭ lơh broă gah bơto bơtê mờ bơsram ƀòn dờng Pleiku pà git, nàng tơl bơta niam tàm broă bơto mờ bơsram, gah bơto bơtê mờ bơsram ƀòn dờng tơrgùm sền gròi tàm broă rơndăp wơl mpồl cau pơgru ờ tơl tàm ală hìu bơsram. Mờ jăt tàm khà cau pơgru geh jào, rơcang hợp đồng mờ cau pơgru, cau lơh broă gam ờ tơl. “Cơl dŭ bơto bơtê neh lơh broă mờ ală hìu bơsram nàng sền wơl ală hìu bơsram bal mờ ơdŭ bơsram mờ ai cau pơgru tus tàm ală hìu bơsram. Tềng đăp mờ broă ờ tơl cau pơgru gal bè do, den neh geh cri bơyai mờ ală hìu bơsram nàng rơndăp, săp sèng wơl hìu bơsram, ơdŭ bơsram, tơrgùm pơgồp bal hìu bơsram, ơdŭ bơsram uă ngan nàng tềm pềr cau pơgru geh jào tàm bơta geh. Cơl dŭ lơh broă gah bơto bơtê mờ bơsram kung dan mờ ală kấp geh gơnoar sền wơl tàm nùs nhơm ală kơrnoăt bơh gah do dê, bơh dà lơgar dê nàng ai tơl khà cau pơgru kung bè cau lơh broă ai ală hìu bơsram nàng lơh jăt broă bơto mờ bơsram”.

Ồng Lê Duy Định, Kwang atbồ Sở Giáo dục mờ Đào Tạo càr Gia Lai pà git: Sở Giáo dục mờ Đào tạo gam pơgồp bal mờ Sở Nội vụ lơh broă mờ ală kơnhoàl, thị xã mờ ƀòn dờng nàng kơlôi sền, dan mờ UɃÑZ càr ai tơlik kơrnoăt bè broă tam pà pơgồp bal mờ rơndăp, săp sèng, rơndăp lơh wơl hìu bơsram, ơdŭ bơsram, tơrgùm ală hìu bơsram dềt, tơnguh khà kờp kơnòm bơsram tàm ơdŭ tus tàm khà uă ngan jăt mờ bơta bơh ală kấp bơsram geh ai. Tơnơ̆ mờ tŭ neh lơh gơs ală tơngu me hơ̆ sồng kơlôi sơnơng wơl broă ờ tơl cau pơgru tàm ală kơnhoàl, thị xã mờ ƀòn dờng tàm càr nàng tam pà 1 rơbô 244 nă cau pơgru mờ dà lơgar jào. “Gơwèt mờ ală ơdŭ tàm kấp 1 pal là 35 nă kơnòm bơsram tàm 1 ơdŭ, gam gơwèt mờ ală ơdŭ tàm kấp 2 là pal 45 nă kơnòm bơsram tàm 1 ơdŭ. Ală kơnhoàl lơh jăt broă tơrgùm ală hìu bơsram dềt kung bè broă gàr tơl khà kờp kơnòm bơsram tàm ơdŭ bè hơ̆ geh tềm pềr dùl khà cau pơgru uă ngan. Tŭ geh tam pà dùl khà cau pơgru, bal mờ broă tơrgùm bal wơl ală hìu bơsram dềt kung bè broă ai khà kơnòm bơsram tàm ơdŭ den broă bơto bơtê mờ bơsram tàm càr Gia Lai geh tơl cau pơgru bơto, di gơlan bơta niam broă bơto bơtê mờ bơsram càr dê geh niam rơlao”.

Cau cih Hoàng Qui-Cau mblàng Ndong Brawl