Bơh bồ nam tus tŭ do, jơh gùt càr Gia Lai gơlik geh 23 dơ̆ bŭ dà lơh 31 nă kơnòm dềt chơ̆t, gơguh uă pơndrờm bal dùl tŭ mờ nam lài. Jat Sở Lao Động, Thương ƀiñ mờ Xã hội càr Gia Lai, rềs àr bŭ dà gam gơguh là tài bơh bơta gĭt wă bơh hìu bơnhă, mpồl bơtiàn bè bơta pơhìn gơlik geh bŭ tàm dà kơnòm dềt gam ờ hềt uă; kơnòm dềt ờ hoan geh bơta jat sền bơh mè bèp dê; kơnòm dềt ờ hềt gĭt re dà, ờ hềt geh bơta chài tàm dà, ờ tơl tiah nhơl ai kơnòm dềt in, ngan là tàm tiah sar lơgar ngài, tiah ƀòn lơgar.

Jat ồng Võ Như Minh Quang, Kwang atbồ Cơldŭ lơh broă Sền gàr, dong kờl kơnòm dềt mờ Ring bal ùr klau- Sở Lao động, thương ƀiñ mờ Xã hội càr Gia Lai pà gĭt, bal mờ broă lơh pràn broă bơtê re dà ai kơnòm dềt in, tơl hìu bơnhă kung pal atbồ lơh broă nhơl lơh rài bồ tơngoh ai kơnòm dềt in, ngan là tàm tơngai kàl rlô bơkàng.