VOV4.K’ho - Bè jơnau bol añ neh yal, uă làng bol kòn cau kis tàm càr Dăk Lăk gam ờ sŭk ngan tŭ mìng tăc dùl bơnah ù roh mờ tơnơ̆ mờ tŭ lơh sră kă bro, hìu nhă gơtìp jơh ù thổ kư ha là gơtìp đah cau blơi at sră dờp ngui ù bơh làng bol; ờ git loh bă ù neh gơtìp blơi, tăc ha là ờ. Broă do pà gŏ, gam gơtìp ală broă lơh ờ niam tàm broă lơh jăt ală kơrnoăt bè broă lơh sră tăc ù, tàm hơ̆ uă ngan là tàm tiah làng bol kòn cau, do là tiah làng bol gam ờ git wă bè ală kơrnoăt tàm adăt boh lam. Mờ geh ală bơta tơngŏ pà gŏ, ală broă lơh ờ niam bơh ală cau blơi ù tàm càr Dăk Lăk gam lơh ờ niam drà kă bro, lơh kal ke tus mờ broă atbồ dà lơgar mờ lơh ờ niam tus mờ bơta lơngăp lơngai ờ do ờ dă tàm ƀòn lơgar.

Dùl bă ù tơnơ̆ mờ tŭ neh tăc, bơnah ù thổ kư gơtìp ai jơh mờ tam pà gơs 3 bă tàm gùl, gam ù lơh sa suơn sre bè rùp akhar U gùt dar lời cau tăc in

Tàm tơngai ù gơguh khà priă nam 2021 mờ ală nhai bồ nam 2022, xã Cư̆ Suê, kơnhoàl Cư̆ Mgar tiah rềp bal mờ ƀòn dờng Buôn Ma Thuột hờ đah tô, là dùl tàm ală tiah geh uă ngan càr Dăk Lăk dê bè broă tăc ù. Ồng Đặng Văn Hoan, Củ tịc UɃÑZ xã Cư̆ Suê pà git, tŭ gơguh geh gal ngan cau lik mŭt tàm xã gal ngan, tus tơl tàm gùng dờng, gùng dềt. Tơngai do, geh uă ngan làng bol kis tàm ală ƀòn neh tăc ù. Mơya, tàm broă tăc ù làng bol kis tàm ƀòn ờ git wă bè adăt boh lam, ờ lùp cau git wă nàng geh bơto pơlam den tàng gơtìp ală cau tăc ù pơrlồm roh jơh ù thổ kư. Lài ngan xã neh kơno geh ờ uă ƀòn bè Sút H’ luốt, Sút M’đưng yal bè bơta do, khà cau di gơlan tus git nđờ rơhiang hìu. Jăt ồng Hoan yal, jơh tàm bă ù làng bol gam ngui tơl hìu geh ai 400 thơ̆k vuông nàng lơh ù lơh hìu ơm, mơya tài ờ git tàm tiah lơi tàm pang sră ngui ù. Den tàng, tŭ tăc ù, cau blơi di gơlan neh sơgràm ai jơh ù thổ kư mờ lời wơl mìng ù lơh sa suơn sre làng bol in: “Tàm xã tơngai pa do broă gơguh khà priă ù, gơguh khà priă ù ờ ngan den tàng neh lơh gơtìp broă làng bol kòn cau neh tăc ù. Mơya, broă tăc ù tài làng bol ờ git wă, den tàng geh uă cau gơtìp sơgràm bè broă kă bro ù tiah, geh 400 thơ̆k vuông ù lơh hìu ơm, jơh tăc cau tam gơl jơh măt cau blơi dê. Broă do mìng geh tài làng bol lơh broă mờ đah kông cứng cau dùl nă să lơh is, làng bol ờ geh bơto pơlam nền nòn”.

Broă lơh mpồl bơtiàn tàm ală ƀòn gơtìp ờ geh tài broă kă bro ù lơh hìu ơm ờ niam, geh uă nùs nhơm sơgràm bơh ală cau blơi

Dùl nă kwang đơng lam Anih lơh broă dan cih măt lơh sră ù tiah càr Dăk Lăk pà git, neh git geh broă làng bol tăc ù roh jơh ù thổ kư, ha là gơtìp đah cau blơi at sră ngui ù git nđờ nam mờ ờ hềt geh ai wơl tàm càr. Bè kơrnoăt, tŭ sră nggal neh lơh jăt mờ ală kơrnoăt tŭ do den anih lơh broă atbồ dà lơgar geh lơh ală sră nggal nàng tam gơl măt, tam pà bă ù. Ală cau blơi ù nùs nhơm neh lăc lơyào, di lah làng bol ờ git wă, neh kĭ tàm ală pang sră bè kă bro den mìng lah is să tờm: “Geh bàr broă pal lơh. Dùl là hợp đồng lơh broă, gam sơnđan là hợp đồng nàng ai geh khà tam klah bă ù hơ̆. Bàr là tŭ neh geh cồng nha tă ai den tus kông cứng nàng lơh sră nggal tăc ù den làng bol kung pal kĭ. Mờ lài mờ tŭ kĭ là bi tăc nđờ thơ̆k vuông ù ơm den làng bol git, cau hơ̆ pal git. Bơta do mìng geh git wă, jơnau ngăc ngar bơh làng bol tŭ ai gơnoar ală cau ndai in blơi, lòt lơh sră”.

Cau chài cah rơña Tạ Quang Tòng, Kwang atbồ mpồl cau chài cah rơña càr Dăk Lăk mblàng, làng bol kis tàm ală ƀòn gam ờ git wă bè adăt boh lam den tàng ƀuơn ngan kĭ tàm ală pang sră, hợp đồng geh đah cau blơi ù cih lài. Tàm hơ̆, ngòt rơngơ̆t ngan là broă làng bol kĭ tàm sră nggal ai gơnoar jơh mờ jào sră ai đah blơi ù in lòt lơh ală sră nggal. Broă ai jơh ù thổ kư gam ờ hềt là hoàc huơr uă ngan, geh ờ uă cau, gam jào jơh, tam gơl măt jơh bă ù, làng bol di gơlan gơtìp roh gời jơh mờ kal ke ngan kờñ gơtùi yă. Mờ ờ uă cau mùl màl, làng bol neh geh hợp đồng ai lài mờ tơngu me is mờ tŭ tam gơl măt, tam cah bă ù, tŭ kă bro geh cau lơh cơng, cau chài cah rơña Tạ Quang Tòng đơs là, làng bol kung gam geh tơngu me nàng yă tus tàm anih cah rơña nàng sồr ơm ing ală broă lơh gơrềng bal tus mờ bă ù mờ yal tơn jơh hợp đồng tài geh nùs nhơm pơrlồm. Gơwèt mờ ală bơta làng bol đơs là ờ kĭ mờ đah blơi neh kĭ is nàng lơh gơs sră nggal tam gơl măt, tam pà ù den geh tơngŏ pơrlồm mờ làng bol gơtùi lơh sră nàng yă tus mờ anih lơh broă kwang àng nàng sồr lùp khào: “Tŭ cau neh ring bal bè broă tăc nđờ thơ̆k ù thổ kư mờ lời wơl nđờ thơ̆k ù thổ kư den jơnau ring bal mờ bơta lơi, geh cơng tàng lơi lah ờ, di lah ring bal mờ bơr den cau lơi git, cau lơi kơno bal. Di lah cau hơ̆ geh cơng tàng ală jơnau hơ̆ den gơtùi yă mờ sồr tơn jơh hợp đồng tài geh jơnau pơrlồm tàm broă lơh sră hợp đồng tam gơl phan bơna. Mơya tàm bơta làng bol ờ geh cau ai gơnoar, mìng geh dùl đah den loh làng geh bơta uă rơlao pơrlồm, di gơlan geh nùs nhơm sơgràm”.

Ồng Nguyễn Văn Hoàng, Phó Kwang atbồ Sở Tài nguyên Môi trường càr Dăk Lăk pà git, tàm tơngai gơguh khà priă ù pa do neh geh cau tơrgùm, dờp tam gơl ù bơh làng bol kòn cau kis tàm tiah jăt gah ală ƀòn drà. Broă lơh do gơtìp kal ke neh gơtìp ală bơta ờ niam gơwèt mờ drà kă bro, lơh kal ke tàm broă atbồ dà lơgar mờ lơh ờ niam tus mờ bơta lơngăp lơngai ờ do ờ dă tàm ƀòn lơgar bal mờ rài kis mpồl bơtiàn làng bol dê. Mờ ală bơta làng bol tăc ù roh jơh ù thổ kư, ồng Hoàng đơs là, geh kơnòl bơh gơnoar atbồ xã mờ ală anih lơh broă geh gơnoar tàm xã tŭ ờ lơh niam broă lam sồr, yal bè adăt boh lam tus mờ làng bol, tàm hơ̆ uă ngan là làng bol kis tàm ală ƀòn kòn cau. Sở Tài nguyên Môi trường gam đơng lam anih lơh broă tờm tàm kơnhoàl nàng pơgồp bal mờ gơnoar atbồ xã bơto pơlam nàng làng bol lơh sră yă tus tàm anih cah rơña tŭ geh tơngŏ jơnau pơrlồm ha là lơh sră yă tus kwang àng tŭ geh tơngŏ pơrlồm nàng sơgràm ù tiah. Mờ sở do kung gam dan mờ UɃÑZ càr nàng di tŭ lơh niam wơl bơta do: “Nàng pleh mờ broă làng bol gơtìp sơgràm bè ù tiah, tàm tơngai tus, Sở Tài nguyên Môi trường geh pơn jăt tai pơgồp bal kung bè lam sồr UɃÑZ kơnhoàl, thị xã, ƀòn dờng lơh jăt ală sră nggal đơng lam bơh UɃÑZ càr bè broă lơh niam wơl kung bè tơnguh broă atbồ ù tiah, kung bè drà kă bro ù tiah mờ hìu ơm tàm càr. Tơnguh uă gơnoar, kơnòl bơh ală kấp, gơnoar atbồ bal mờ ală mpồl lơh broă cíñ trị mpồl bơtiàn tàm broă chồl pràn broă lam sồr, yal, bơto bơtê adăt boh lam bè ù tiah nàng làng bol in wă, rơcang ngăc tềng đăp mờ jơnau pơrlồm”.

Gơguh khà priă ù tàm càr Dăk Lăk kung bè tàm uă tiah ndai tàm tơngai do, bal mờ broă tus bal là chồl pràn drà kă bro, chồl pràn broă tơnguh bơtàu lơh sa mpồl bơtiàn càr dê den kung lơh jăt uă bơta gơrềng bal ờ niam. Broă làng bol kis tàm ală ƀòn jăt gah ƀòn drà tàm jà bal tăc ù ai ală cau tus blơi in mờ ờ sền gròi nền nòn, gơtìp pơrlồm, geh tŭ gơtìp sơgràm lơh làng bol gơtìp mờ ală bơta tam phà gơrềng tus mờ adăt boh lam kal ke ngan kờñ tơn jơh. Broă lơh bal mpồl bơtiàn tàm ală ƀòn di gơlan gơtìp ờ geh tài ală broă kă bro ù tiah ờ niam, geh uă nùs nhơm sơgràm bơh ală cau tus blơi. Broă do, hòi jà gơnoar atbồ, anih lơh broă geh gơnoar ală kấp tàm càr Dăk Lăk pal tus bal rơcang lài, lơh pràn nàng di tŭ kơrian mờ bơsong di pal.

Sền jơnau cih dơ̆ sơnrờp: https://vov4.vov.gov.vn/Kho/chuyen-muc/gia-u-goguh-ua-neh-lot-gan-on-logar-ndac-songt-nganjonau-cih-do-dul-tac-dul-bon-c162-430990.aspx

Cau cih Công Bắc- Cau mblàng Ndong Brawl