VOV4.K’ho- Tơnơ̆ dùl tŭ tơngai geh lơh duh hồl ngan, tus tŭ do dơ̆ giă ù gơguh uă ngan tàm càr Dăk Lăk neh gơmù đau dùl êt mơya neh lời wơl uă jơnau gơ aniai. Tàm bàr pe tiah pơneh giă ù gơguh uă ngan, uă hìu bơnhă jơi bơtiàn kòn cau gŏ he gơtìp roh jơh ù lơh hìu tơnơ̆ tŭ tăc dùl pèt ù mờ jàu ai cau lơi in lòt lơh is sră nggal cah bă ù, tam gơl wơl măt. Uă hìu bơnhă ờ gŏ loh sră ngui ù tŭ do gam ơm tềng lơi, bă ù gam geh cih mat he dê halà ờ tơnơ̆ tŭ lơh ală broă lơh tăc dùl bơnah ù. Geh ală tềl tơngŏ pà gŏ bơta sơmờm bơta ờ tơl bơta gĭt wă bơh làng bol dê kung bè ală bơta ờ hềt wil tơl tàm broă lơh jăt ală broă kă bro bè ù tiah, ngan là tàm tiah jơi bơtiàn kòn cau, tiah sar lơgar ngài nàng pơrlồm mờ geh tŭ là sa kơñau.

Hìu bơnhă mò H’Bluên Niê ơm tàm ƀòn Sút H’luốt, xã Cư Suê, kơnhoàl Cư M’gar geh 3 sàu ù, geh pà 400 thơk vuông ù lơh hìu mờ neh lơh dùl nơm hìu kâp 4 tàm bă ù do. Pơgăp mờ do rlau 1 nam, giă ù tàm do gơguh uă ngan, hìu bơnhă mò H’Bluên Niê cribơyai mờ tăc dùl sàu ù (tàm hơ̆ geh 240 thơk ù lơh hìu) mờ giă 590 tơlak đong ai dùl nă cau ơm tàm ƀòn dờng Buôn Ma Thuột in. Tài bơh ờ tơl bơta gĭt wă bè ală jơnau cih bơh kơrnoăt boh lam dê den tàng mò neh jàu ală sră pơ àr ai cau blơi in lòt lơh is ală sră pơ àr cah ù mờ tam gơl wơl măt. Mơya, tơnơ̆ tŭ neh cah bă ù, cau blơi jàu wơl sră ngui ù den hìu bơnhă mò gŏ ờ gam dùl thơk ù lơh hìu lơi tai. Gơjrañ ngan, mò H’Bluên ờ dờp wơl sră ngui ù mờ sồr cau blơi pal tơm wơl bă ù lơh hìu 160 thơk vuông bơh hìu bơnhă mò dê bè neh ring bal bơh sơnrờp. Mò H’Bluên Niê yal: Ngai pa do, khi jàu wơl sră ngui ù ai añ in sền, añ ờ gŏ ù lơh hìu ndrờm bè sră lài do, añ là añ ờ dờn ờ. Khi đơs, ờ geh ù lơh hìu den mơi dờn sơl priă lah ờ, añ đơs añ ờ gŏ kờñ priă, ai wơl bă ù lơh hìu bè tàm sră ngui ù lài.

Hìu bơnhă mò H’Bluên Niê tăc dùl bơnah ù mơya roh jơh bă ù lơh hìu

Kung gơtìp jơnau bè do sơl, hìu bơnhă mò H’Luyên Niê ơm tàm ƀòn Sút H’luốt, xã Cư Suê neh tăc 900 thơk vuông ù, tàm hơ̆ geh 300 thơk ù lơh hìu ai dùl nă cau tàm ƀòn dờng Buôn Ma Thuột in mờ jàu sră pơ àr ai cau do in lòt lơh ală sră pơ àr. Mơya, mờr 2 nam lòt gan, cau blơi ù kung gam ờ hềt jàu wơl sră ngui ù ai hìu bơnhă mò H’Luyên in, lơh hìu bơnhă mò kơlôi rơcăng ngan, ờ gĭt cau blơi ù neh lơh bơta lơi mờ sră ù bơh he dê sơl. Mò H’Luyên đơs: Jơh 400 thơk vuông ù lơh hìu, khi blơi 300 thơk vuông ù lơh hìu, añ gam wơl 100 thơk vuông ù lơh hìu. Lòt kĭ tàm kông ty ù tiah hìu đam đah ne mờ 2 nam do rao ờ gŏ sră pơ àr tềng lơi sơl, tŭ do gam kơlôi rơcăng ngan, gam jê bồ ngan do. Khi lơh sră hơ pơrgon tăc bro khi ai jơh rao, ai sră pơ àr do khi đơs là jồm nàng lơh sră pơ àr tus dì tŭ do ờ hềt gŏ sơl.

Mò H’Đàn Niê, Kwang ătbồ ƀòn Sút H’luốt pà gĭt, bơh lùp broă gơlik geh tàm ƀòn geh uă cau tăc dùl bơnah ù mơya roh jơh ù lơh hìu. Ƀòn gam hòi jà ală hìu yal nàng cih jơnau cih mờ ală kâp gơnoar ătbồ. Jăt mò H’Đàn đơs, sền bal ală hìu làng bol ndrờm ờ tơl bơta gĭt wă bè kơrnoăt boh lam kung bè ală sră nggal tăc bro ù tiah, làng bol mìng gĭt kĭ măt mờ sơñio mờ tê lơm mờ ờ gĭt loh tơngume cih tàm sră hơ tăc bro loh làng bè lơi den tàng ƀươn ngan gơtìp pơrlồm, gơtìp cau pơndòc. Mò H’Đàn Niê, yal: Jơnau do, đơs ngan là gơ kal ke ngan ai làng bol in, ờ gam ù ơm tai. Hìu den geh lơh lài do, lài mờ tŭ tăc ù den geh ù ơm, ai tŭ do sền bè là hìu lơh tàm ù lơh broă sa sươn sre rao gơ. Geh bàr pe nă cau den mờr 2 nam mơya ờ hềt jàu wơl sră ngui ù. Đơs bal kung tài bơh bơta gĭt wă bơh làng bol dê ờ huan uă, ờ gĭt bè adat ù tiah, sră hơ tăc bro cau cih bè do bè ne, bàr pe nă cau den ờ chài sền sră den tàng kơno cau blơi sồr kĭ là khăt kĭ bè hơ̆ gơ.

Sră pơrgon blơi tơm lài dùl êt priă, làng bol ring bal mìng tăc dùl bơnah ù lơh hìu ơm lơm

Ồng Nguyễn Công Văn, Phó Củ tịc Ủy ƀan Ñân zân kơnhoàl Cư M’gar pà gĭt, kơnhoàl gam sồr ală xã, thị trấn tơrgùm kờp, yal, mơkung sồr ală anih lơh broă ờs mờng gah do mŭt lùp khàu, lùp nền, lơh loh sền geh tềl tơngŏ lơh pơrlồm sa kơñau sơl halà ờ. Bè đah ală anih lơh broă geh gơnoar, dilah geh broă lơh tìs, ờ niam, dong kờl ai broă ai jơh ù lơh hìu ơm bơh làng bol dê, kơnhoàl geh lơh glài halà yal mờ anih lơh broă kâp hơđang in lơh glài kràñ jăt ală jơnau cih bơh kơrnoăt boh lam dê. Ồng Nguyễn Công Văn, đơs: Bol añ geh pơn jăt tai sồr anih lơh broă kwang àng kung bè Ủy ƀan Ñân zân ală xã, thị trấn lùp gĭt nền broă gơlik geh ngan ngồn tàm ƀòn lơgar, lùp nền loh làng tơl nă cau, tơl broă, jăt tàm bơta hơ̆ yal mờ Ủy ƀan Ñân zân kơnhoàl in sền swì, sồr lơh jăt di jơnau sồr. Ală cau lơi sơmờm bơta lơbơn lơhơ nùs, mhar pin dờn nàng lơh blac pơrlồm, sa kơñau, dilah tơl jơnau gơ gơs cau lơh tìs den ngan ngồn anih lơh broă lùp khàu geh pal tus lơh broă, mờ ờ gŏ di lời jơnau do jŏ jòng ờ.

Tơnơ̆ dơ̆ gơguh giă ù uă ngan, uă hìu bơnhă tàm xã Cư Suê đơs is mờ tàm càr Dăk Lăk đơs bal gam ñă ntàu ờ gŏ iang tài bơh ờ gĭt loh cau blơi ù neh lơh bè lơi nàng ai jơh bă ù lơh hìu ơm bơh he dê. Tàm tŭ hơ̆, uă hìu bơnhă ờ gŏ gĭt loh làng wơl sră ngui ù jàu cau blơi ù in tŭ do gam ơm tềng anih lơi, bă ù geh gam sơl măt halà ờ halà neh gơtìp tăc bro, halà lòt pơyua càn priă jền. Làng bol gơtìp pơrlồm, mờ geh tŭ là gơtìp kơñau mờ ờ gŏ git dùl êt lơi, mơkung ờ hềt gĭt lơh bè lơi nàng jòi geh wơl gơnoar kwơ bơh he dê!

            Cau cih Công Bắc- Cau mblàng Lơ Mu K’Yến