Nam do, càr Dăk Lăk geh rlau 31 rbô nă kơnòm bơsram rơ̆p lòt pơrlòng dơ̆ pơrlòng jơh bơsram kâp 2. Digơlan tơnơ̆ tŭ jơh bơsram kâp bàr geh pơgăp 23 rbô nă kơnòm bơsram mŭt bơsram tàm ală hìu bơsram kâp pe dà lơgar dê lơh, 4 rbô nă kơnòm bơsram geh bơsram tàm ală anih tờm bơto bơtê sùm, khà gam wơl rơ̆p bơsram tàm ală hìu bơsram làng bol dê lơh is halà bơsram broă lơh jăt “Broă rơndăp lơh bơto broă lơh mờ pơlam gùng săc rwah kơnòm bơsram tàm bơto bơtê pe kâp tàm ù tiah càr Dăk Lăk tơngai bơh nam 2018- 2025”.

Sở Jăp zụk mờ Đào tạo càr Dăk Lăk neh dan mờ Ủy ƀan Ñân zân càr bơyai lơh rwah kơnòm bơsram mŭt ơdŭ 10 kâp pe bơh broă pơrlòng rwah pơgồp bal mờ sền swì rwah nàng kờñ săc rwah ală kơnòm bơsram geh tơl nùs nhơm niam, bơta pràn jak mờ geh pơlam gùng gah broă lơh dipal nàng bơsram jăt Broă lơh bơto bơtê pe kâp nam 2018.