VOV4.K’ho- Gĭt nđờ rhiang tờm nho tàm ù tiah sơnah ƀòn 8, ƀòn dờng Dà Làc, càr Lâm Đồng gơtìp mus kơl jơh. Bơta pal đơs là, broă mus kơl brê do ờ gŏ di là nàng ai dơm chi ờ mơya bal mờ jơnau kờñ lơi den anih lơh broă geh gơnoar gam lùp khàu lơh loh. Anih brê mus kơl gơ ơm tàm lô A, lô B, khoảñ 15, tiểu khu 148 B, sơnah ƀòn 8, ƀòn dờng Dà Làc dê, tiah brê rơcăng gàr bồ tô dà bơh Mpồl ătbồ brê Lâm Viên dê ătbồ mờ sền gàr.

Gĭt nđờ rhiang tờm nho pe nha tàm brê rơcăng gàr bồ tô dà gơtìp bol blơ̆ mus kơl

Tàm do, gĭt nđờ rhiang tờm nho geh tờm dờng bơh 20 tus 60 phơng gơtìp òt jơh ơm bĭc ning rơnang. Tàm khà do geh tờm chi nha neh pàl ñòp ƀa jơh mơya kung geh sơl uă tờm chi nha gam tơlir niam ngan, nggu gam gơ hòr cài sơl. Dơ̆ mus kơl brê ờ hềt gĭt nền tơngai gơlik geh broă do, mơya tàm drim ngai 17/05, ală anih lơh broă bơh ƀòn dờng Dà Làc dê neh sơrbac mhar tus lùp khàu, pơgồp bal kờp sền, sền swì tiah mus kơl brê, lơh sir sră pơ àr nàng jòi kŭp cau tờm mus kơl brê do.

Cau mblàng Lơ Mu K’Yến